Buligi Ang Iban Nga Makakita Sing Lugpay
1 Madamo nga tawo ang natak-an na sa pagpamati tuhoy sa mga kalamidad, inaway, krimen, kag pag-antos. Walay sapayan nga indi makita ang lugpay sa mga balita sa karon, amo ini ang butang nga ginakinahanglan gid sang mga tawo. Ang paglugpay nagakahulugan sing “paghatag sing kusog kag paglaum” kag “pagpaumpaw sa kalisod ukon kabudlayan” sang iban. Subong mga Saksi ni Jehova, nasangkapan kita sa pagbulig sa mga tawo sa sining paagi. (2 Cor. 1:3, 4) Ang aton pasad-sa-Biblia nga mga brosyur nga itanyag naton sa Hulyo kag Agosto nagaunod sing makalulugpay nga mga mensahe sang kamatuoran. (Roma 15:4) Yari ang pila ka panugda sa pagtanyag sini sa lainlain nga mga sirkunstansia:
2 Ang isa ka masubo nga balita mahimo mangin isa ka kahigayunan nga makapanaksi kag makahatag sing lugpay sa iban, ayhan paagi sa imo paghambal sing subong sini:
◼ “Kon ang subong sini nga mga butang mahanabo, ang iban nagapalibog kon bala nagaluntad gid ang Dios kag, kon nagaluntad gid man sia, kon bala nagaulikid sia sa aton. Ano ang masiling mo? [Pasabta sia.] Ang isa ka paagi sa paghibalo kon bala may Dios amo ang pag-aplikar sa kilala nga prinsipio.” Basaha ang Hebreo 3:4. Ipatalupangod ang pila ka butang sa palibot naton nga maathag nga nagakinahanglan sing isa ka magbubuhat. Nian magpadayon: “May dala ako nga brosyur nga nahibaluan ko makalugpay gid sa imo. Ginatig-uluhan ini nga Nagaulikid Gid Bala ang Dios sa Aton? [Basaha ang pamangkot sa panghapin.] Nagaunod ini sing makakumbinse nga pamatuod nga ang Dios wala lamang nagaluntad kundi dulaon niya sa dili madugay ang dimakatarunganon nga mga kahimtangan nga ginaatubang naton karon. Luyag mo bala ini mabasa?” Maghimo sing kahimusan sa pagbalik.
3 Sa pagduaw liwat, mahimo ka makasiling:
◼ “Ginhambalan naton anay ang pamatuod tuhoy sa pagluntad sang Dios sang ginbilin ko ang brosyur nga Nagaulikid Gid Bala ang Dios sa Aton? Ayhan natalupangdan mo ini nga punto sa pahina 7. [Ipakita ang larawan kag sumaryuha ang parapo 15.] Isa lamang ini ka halimbawa nga ang isa ka mainulikdon nga Dios tunay nga nagaluntad. [Basaha ang parapo 27 sa pahina 9.] Ang personal nga pagtuon sa Biblia nakabulig sa akon nga malandas ang adlaw-adlaw nga mga problema sa kabuhi bangod ginahatag sini ang pagtamod sang Dios sa sining mga butang.” Magpanugda nga ipasundayag ang isa ka pagtuon.
4 Ang pagpanaksi sa telepono sarang mahimo nga nagagamit sing brosyur nga “Ano ang Katuyuan sang Kabuhi?—Paano Mo Masapwan Ini?” Mahimo mo mapakilala ang imo kaugalingon kag magsiling:
◼ “Sanglit indi ko ikaw maduaw sing personal, gintawgan ko ikaw bangod sang isa ka importante nga mensahe.” Basaha sing natural ang nahaunang parapo sa pahina 4 sang brosyur, subong nga daw nagapakigsugilanon ka sa iya sing personal. Pamangkuta sia kon ano ang opinyon niya, kag pasabta sia. “Nakabukas ang akon Biblia sa Isaias 45:18. Ginapakita sini nga bersikulo nga kita ang ginahunahuna sang gintuga ang duta. Mahimo ko bala ini mabasa sa imo?” Pagkatapos sini, ipaathag ang katuyuan sang brosyur, kag mamangkot kon paano mo madul-ong ang isa ka kopya.
5 Sa pagtawag liwat, mahimo nimo tilawan ining paagi sa pagsugod sing isa ka pagtuon:
◼ “Luyag ko padayunon ang aton paghambalanay sang nagligad paagi sa pagpakita kon sin-o ang makasugid sa aton sang katuyuan sang kabuhi. [Ipaathag sa kaugalingon nga mga tinaga ang parapo 1 kag 2 sa pahina 6 sang Katuyuan sang Kabuhi nga brosyur.] Ginapaathag sang Bugna 4:11 nga si Jehova nga Dios amo ang aton Manunuga. [Basaha.] Pat-od gid nga may rason sia sang gintuga niya kita. Agod mahibaluan ang rason, gintun-an sang iban nga mga tawo ang nasulat nga Pulong sang Dios, ang Biblia. Luyag ko itanyag sa imo ina nga kahigayunan.” Ipaathag kon paano ginahimo ang aton walay bayad nga kurso sang pagtuon sa Biblia sa puluy-an kag maghimo sing mga kahimusan sa pagsugod sing pagtuon.
6 Ining positibo nga paagi mahimo nga makalugpay sa mga namatyan sing isa ka hinigugma:
◼ “Nagahimo ako sing serbisyo publiko para sa tanan nga namatyan sing isa ka hinigugma. Sanglit mahimo nga isa ini sang pinakamabudlay nga butang nga dapat atubangon sang bisan sin-o sa aton, ining brosyur nga Kon ang Isa nga Ginahigugma Mo Mapatay ginbalhag. Minilyon na ka tawo ang nabuligan sini. Luyag ko ipakita sa imo kon ano ang ginasiling sini tuhoy sa makakulunyag nga saad ni Jesucristo. [Basaha ang ikalima nga parapo sa pahina 26, lakip ang Juan 5:21, 28, 29.] Talupangda ining larawan sa pahina 29 nga nagalaragway sang rekord sang Ebanghelyo tuhoy sa aktuwal nga pagbanhaw ni Jesus kay Lasaro gikan sa minatay. Kon luyag mo mabasa ining makalulugpay nga brosyur, nalipay ako nga mabilin ini sa imo.”
7 Kon magbalik ka, mapakita mo liwat ang larawan sa pahina 29 sang brosyur nga “Kon ang Isa nga Ginahigugma Mo Mapatay” kag magsiling:
◼ “Hinumduma ang aton paghambalanay tuhoy sa pagbanhaw ni Cristo kay Lasaro. [Basaha ang kapsion sa pahina 28, kag binagbinaga ang materyal sa ubos sang subtitulo nga “Natabo Gid Bala Ini?”] Kon ang imo tagipusuon nalangkag sa pagpati nga mahimo nimo liwat makita ang isa ka hinigugma nga napatay, tuguti ako nga mabuligan ko ikaw nga matigayon ang pagtuo sa paglaum nga pagkabanhaw.” Magtanyag sing isa ka pagtuon sa Biblia sa puluy-an.
8 Kabay nga himuon naton ang aton bug-os nga masarangan sa masunod nga mga bulan nga mailog si Jesus paagi sa ‘paglugpay sa tanan nga mga nagalalaw.’—Isa. 61:2.