Bag-ong Programa Sang Sirkito nga Asambleya

“Tumana ang mga Sugo Sang Dios kag Magkabuhi” amo ang tema sang duha ka adlaw nga programa sang sirkito nga asambleya sugod sa Pebrero. (Hulu. 4:4) Ipadaku sini kon ngaa ang pagsunod sa mga sugo sang Dios indi mabug-at. Dugang pa, ipakita sini kon paano ang paghimo sa kabubut-on sang Dios magahatag sing kapahuwayan kag matuod nga kalipay subong man sing paglaum para sa palaabuton.​—⁠Mat. 11:​28-30; Juan 13:⁠17.

Bilang pagtuman sa sugo ni Cristo, yadtong luyag magpabawtismo sa asambleya dapat makigsugilanon sa nagadumala nga manugtatap, kag magahimo sia sing kinahanglanon nga mga kahimusan.​—⁠Mat. 28:​19, 20.

Ipaathag sang isa ka simposium ang praktikal nga mga paagi nga sarang naton mapakita ang gugma sa Dios kag sa aton mga kauturan. (Juan 13:​34, 35; 1 Juan 5:3) Ang makapulukaw-sa-tagipusuon nga laygay gikan sa Salmo 19 kag 119 ilakip sa programa. Bisan pa nga ang inspirado nga laygay sa sining mga salmo ginsulat ginatos ka tuig na ang nakaligad, makita naton kon paano ini makabulig sa aton sing personal sa karon.

Ang pamulongpulong publiko nga ihatag sang manugtatap sang distrito natig-uluhan sing “Kahadluki ang Dios kag Tumana ang Iya mga Sugo.” (Manugw. 12:13) Ipakita sang katapusan nga pamulongpulong sang manugtatap sang sirkito kon paano matigayon sang mga pamatan-on ang pinakamaayo sa kabuhi sa karon kag kon ngaa makasalig sila sa isa ka walay katapusan nga palaabuton. Ginahinakpan sang manugtatap sang distrito ang programa paagi sa pagsambit sa madamong benepisyo nga maagom paagi sa pagkabuhi suno sa “harianon nga kasuguan” sang gugma. (Sant. 2:8) Sa pagkamatuod, isa ini ka programa sang asambleya nga luyag tambungan sang tanan!