Bag-ong Programa sa Sirkito nga Asambleya
Anong mapuslanon nga mga benepisyo ang ginabaton mo karon bangod sang paglakat upod kay Jehova? Paano mo mabatuan ang pagsulay nga buslan sang indi teokratikong mga paghimud-os ang mga interes sang Ginharian subong nahauna nga butang sa imo kabuhi? (Mat. 6:33) Nabudlayan ka bala sa paghantop sang husto gikan sa sala sa kalibutan nga daw ginahimo nga husto ang sala? (Heb. 5:14) Ini nga mga butang sabton sa “Manginpulos Karon Paagi sa Paglakat sa mga Dalanon Sang Dios” nga sirkito nga asambleya, sugod sa Pebrero 2000.—Sal. 128:1.
Ang bag-ong bahin sa Sabado sa sining sirkito nga asambleya amo ang presentasyon tuhoy sa isa ka huwaran nga Miting sa Serbisyo. Ang inyo manugtatap sang sirkito magapahibalo sa mga kongregasyon kon ano ang ginaplano agod magatambong ang tanan nga nakahanda sa pagpanginpulos sing bug-os sa programa.
Ang bahin nga natig-uluhan sing “Mga Payunir—Bantayi Sing Maayo ang Inyo Paglakat” magapakita sa aton kon paano ipakita ang kaalam kag pagkarasonable agod mabakal ang nagakaigo nga tion para sa pagpayunir. (Efe. 5:15-17) Ang tema nga “Mag-andam sa mga Paagi nga Daw Husto” magatudlo sa aton kon paano pat-uron kon ano ang kalahamut-an sa Dios sa tanan nga bahin sang kabuhi. Ang pamulongpulong nga “Kon Paano ang Natuman nga Tagna Nagaapektar sa Aton” magabulig sa aton nga pun-on ang aton hunahuna kag tagipusuon sing gugma sa Pulong sang Dios. Ipadaku sang pamulongpulong publiko nga “Mga Dalanon Sang Dios—Daw Ano ka Mapuslanon!” ang mapuslanon nga mga benepisyo nga matigayon karon gikan sa padayon nga pagsunod sa matarong nga mga ginapatuman ni Jehova.
Handum mo bala nga ipakita sing dayag paagi sa pagpabawtismo sa tubig nga luyag mo maglakat sa mga dalanon sang Dios subong isa sang iya dedikado nga mga alagad? Kon amo makighambal sa nagadumala nga manugtatap agod ang nagakaigo nga mga kahimusan sarang mahimo.
Magpamat-od nga tambungan ining suno-sa-tion nga sirkito nga asambleya. Tambungi ang bug-os nga duha-ka-adlaw nga programa, kay “malipayon ang tagsatagsa nga nagakahadlok kay Jehova, nga nagalakat sa iya mga dalanon.”—Sal. 128:1.