Mangayo sing Bulig
1 Ang inspirado nga mga tinaga nga “mabudlay pakigbagayan” nagakaigo gid nga nagalaragway sang aton makahalanguyos nga mga tion. (2 Tim. 3:1) Gani, ano ang sarang mo himuon kon makasumalang ka sing mabudlay nga espirituwal nga mga hangkat nga, sa banta mo, indi mo masarangan atubangon?
2 Handa ka bala sa pagpakighambal sa isa ka hamtong sa espirituwal nga katapo sang kongregasyon? Ang iban mahimo magpangalag-ag sa paghimo sini bangod sa kahuya, sa indi luyag mamilit, ukon sa pagduhaduha nga may isa gid nga makabulig. Matuod, dapat kita manikasog nga atipanon ang aton personal nga mga responsabilidad sa aton bug-os gid nga masarangan, apang dapat kita pirme magbatyag nga hilway sa pagpangayo sing bulig may kaangtanan sa aton espirituwal nga kaayuhan.—Gal. 6:2, 5.
3 Kon Diin Magsugod: Mahimo nga luyag mo palapitan ang imo konduktor sa pagtinuon sa libro kag mangabay kon sarang ka makapangabudlay upod sa iya sa pag-alagad sa latagon. Magahatag ini sa imo sing kahigayunan nga masugid sa iya ang imo handum nga mag-uswag sa espirituwal. Kon isa sia ka ministeryal nga alagad, sugiri sia sang imo pagkinahanglan sing espirituwal nga bulig kag pangabayon niya ang mga gulang sa pagbulig sa imo. Ukon mahimo nga palapitan mo ang bisan sin-o sa mga gulang tuhoy sa mga butang nga ginakabalak-an mo.
4 Ano nga sahi sang bulig ang kinahanglan mo? May butang bala nga nagpaluya sang imo kakugi? Ikaw bala isa ka nagasolo nga ginikanan nga nagapanikasog nga magpabilin nga suod ang imo mga anak sa kongregasyon? Ikaw bala isa ka tigulang nga nagakinahanglan sing bulig? Ukon may problema bala nga nagapaluya sang imo buot? Ang pagpakigbagay sa aton makahalanguyos nga mga tion mahimo nga mabudlay—apang indi imposible. May bulig nga matigayon.
5 Kon Paano Makabulig ang Tigulang nga mga Lalaki: Ang mga gulang nagaulikid gid. Magapamati sila sa imo mga ginakabalak-an. Kon ang iban nga mga manugbantala nagaatubang sing kaanggid nga mga sablag, binagbinagon ini sang mga gulang samtang ginabantayan kag ginatudluan nila ang kongregasyon. Subong “mga huwaran sa panong,” nagapabilin sila nga handa sa pagpangabudlay upod sa imo nga may kalipay. (1 Ped. 5:3) Ang pagpamati sa sining eksperiensiado nga mga utod samtang nagapangatarungan sila sa mga prinsipio sang Biblia sarang makapauswag sang imo ministeryo kag makabulig sa imo sa imo personal nga kabuhi.—2 Tim. 3:16, 17.
6 Si Jesus naghatag sa aton sing madamong “mga dulot nga ginahuman sang mga lalaki.” (Efe. 4:8, ftn.) Nagakahulugan ini nga ang mga gulang nagaalagad sa imo. Handa sila sa pagbulig sa imo. Sila, sa katunayan, “natungod sa imo.” (1 Cor. 3:21-23) Gani sa baylo nga magpangalag-ag, maghambal. Mangayo sing bulig nga ginakinahanglan mo.