“Ang Pulong sang Dios . . . Gamhanan”
1 “Ang pulong sang Dios buhi kag gamhanan,” sulat ni apostol Pablo. (Heb. 4:12) Ano ang iya buot silingon sa sina? Ang pulong, ukon mensahe, sang Dios nga masapwan sa Biblia sarang makaimpluwensia sing daku sa mga tawo. Ang kaalam nga yara sa Biblia may gahom agod bag-uhon ang kabuhi sang isa ka tawo nga mangin maayo. Ang lugpay kag paglaum nga ginahatag sini nagapasuod sa mga tawo sa Manughatag-Kabuhi, si Jehova nga Dios. Paagi sa mensahe sini, ang mga bunayag sing tagipusuon makasugod sa paglakat sa dalan padulong sa kabuhi nga dayon. Apang, agod makita ini nga mga epekto, dapat naton gamiton ang Biblia kon nagapanaksi kita sa iban.
2 Magbasa sing Isa ka Kasulatan sa Tagsa ka Higayon: Madamo nga manugbantala ang daw talagsa lang nagagamit sing Biblia sa ganhaan. Ikaw man bala? Bangod madamo nga tawo ang daw wala sing tion para sa malawig nga paghambalanay, ayhan nangin batasan mo nga magtanyag na lang sing mga literatura ukon magbalikwat sing isa ka kasulatan. Ginapalig-on namon ang tanan nga manugbantala nga manikasog gid sa pagbasa sing di-magkubos isa ka bersikulo gikan sa Biblia kon nagatanyag sing maayong balita, sa amo ginapakita sa tawo nga ang aton mensahe masapwan gid sa Pulong sang Dios.
3 Walay sapayan nga diutay lamang nga mga tawo ang kinabatasan nga nagabasa sing Biblia, sa gihapon ginatahod ini sang kalabanan. Bisan ang masako nga mga tawo masunson nga magahinguyang sing pila ka minuto agod makapamati sing isa ka mensahe nga ginabasa sing direkta gikan sa Pulong sang Dios. Kon ang isa ka nagakaigo nga kasulatan ginabasa sing hanuot kag ginapaathag sing malip-ot, ang gahom sang pulong ni Jehova mahimo nga may yara maayo nga epekto sa nagapamati. Apang paano mo maangot ang imo nagabukas nga komento padulong sa pagbasa sing isa ka bersikulo gikan sa Biblia?
4 Tilawi Ini sa Hilikuton sa Magasin: Isa ka nagalakbay nga manugtatap ang epektibo nga nagagamit sing Kasulatan kon naga-magazine work. May dala sia nga gamay nga Biblia sa iya bulsa. Sa tapos matanyag ang mga magasin kag mapaathag sa makadali ang artikulo, ginabuksan niya sa gilayon ang Biblia kag ginabasa ang isa ka bersikulo nga may kaangtanan sa artikulo. Mahimo ini himuon paagi lamang sa pagpamangkot, “Ano ang masiling mo sa sining makapalig-on nga saad?” kag nian basaha ang isa ka napili nga kasulatan.
5 Himua nga tulumuron nga makapaambit sing isa ukon duha ka bersikulo gikan sa Biblia sa tanan nga nagapamati. Ang nagapahulag nga gahom sini mahimo magbukas sang dalan para magsuod sa Dios ang madamo pa nga tawo.—Juan 6:44.