Gamita sing Maayo ang Biblia
1. Ano ang sarang mo mahimo bilang paghanda sa ministeryo sa latagon?
1 Bisan ano nga literatura ang aton ginaplano nga itanyag sa ministeryo, mapuslanon nga pilion ang nagapahulag sa hunahuna nga teksto agod ipaambit sa mga nagapamati. (Heb. 4:12) Matanyag mo sing epektibo ang publikasyon kon ginapili mo ang teksto nga ginagamit mismo sa publikasyon nga imo ginatanyag. Sa pila ka duog, nasapwan sang mga manugbantala nga mapuslanon nga uyatan na ang Biblia kon nagapalapit sa isa ka tawo ukon kon nagapamalaybalay.
2. (a) Paano naton masugdan ang aton presentasyon paagi sa isa ka teksto? (b) Anong Makasulatanhon nga topiko ang makapainteres sa mga tawo sa teritoryo?
2 Magsugod Paagi sa Isa ka Teksto: Ginasugdan sang pila ka manugbantala ang ila presentasyon paagi sa pagpamangkot sing simple sa tagbalay sang ila pagtamod sa isa ka teksto sa Biblia nga ila dayon basahon. Nagasentro dayon ini sing igtalupangod sa Pulong sang Dios. Ang pila bala sining mga introduksion epektibo sa inyo teritoryo?
◼ “Kon may gahom ka, himuon mo bala ining mga pagbag-o?” Basaha ang Bugna 21:4.
◼ “Ngaa nagakabuhi kita sa subong sini ka ital-ital nga tion?” Basaha ang 2 Timoteo 3:1-5.
◼ “Sa banta mo mangin maayo pa gid ang aton komunidad kon sundon ini nga laygay?” Basaha ang Mateo 7:12.
◼ “Sa banta mo maeksperiensiahan pa bala sang imo kabataan ang mga kahimtangan nga ginlaragway diri?” Basaha ang Salmo 37:10, 11.
◼ “Sa banta mo maabot pa ayhan ang tion nga mangin matuod ining ginasiling diri?” Basaha ang Isaias 33:24.
◼ “Pamilyar ka bala sa pagbag-o sang panguluhan nga ginsambit diri?” Basaha ang Daniel 2:44.
◼ “Luyag mo bala nga ipamangkot kuntani ini sa Dios?” Basaha ang Job 21:7.
◼ “Posible bala nga makita pa naton liwat ang aton napatay nga mga hinigugma?” Basaha ang Juan 5:28, 29.
◼ “Nahibaluan bala sang mga patay ang ginahimo sang mga buhi?” Basaha ang Manugwali 9:5.
3. Paano naton mabuligan ang mga tawo nga mahangpan ang ginabasa naton nga mga teksto sa Biblia?
3 Ipaathag, Iilustrar, Iaplikar: Kon luyag sang tawo nga makigsugilanon, indi magdalidali. Hatagi sing tion nga ipaathag, iilustrar, kag iaplikar ang teksto nga imo ginabasa agod mahangpan niya ini. (Neh. 8:8) Kon mahangpan sang mga tawo kag batunon ang ginatudlo sang Pulong sang Dios, makapabag-o ini sing dalayawon sa ila kabuhi.—1 Tes. 2:13.
4. Paano naton magamit sing maayo ang Biblia sa mga pagduaw liwat?
4 Padayon nga gamita sing maayo ang Biblia samtang ginapalambo mo ang interes. Sarang mo man magamit ini nga paagi kon nagaduaw liwat: (1) Magpili sing nagakaigo nga teksto. (2) Mamangkot sing simple tuhoy sa iya pagtamod sa teksto. Dayon basaha ini. (3) Ipaathag, iilustrar, kag iaplikar ini. Panikasugi nga madugangan ang ihibalo sang tawo sa Pulong sang Dios sa kada pagduaw mo. Mahimo nga sa dili madugay magadumala na ikaw sing pagtuon sa Biblia!