Ang mga Kalipay sa Bug-os Tion nga Pag-alagad

¹ Subong pamatan-on, walay duhaduha nga ginahunahuna mo ang imo palaabuton. Ang Hulubaton 21:5 nagasugid sa aton nga “ang mga plano sang maukod nagapadulong gid sa kaayuhan.” Para gid sa imo kaayuhan kon hunahunaon mo sing serioso ang imo mga tulumuron sa kabuhi. Samtang nagaplano ka para sa palaabuton, binagbinaga ang pagsulod sa bug-os tion nga pag-alagad. Ngaa?

² Pamangkuta ang mga hamtong nga nagpayunir sang pamatan-on pa sila kon ano ang ila masiling kag sa masami palarehas ang ila komento: “Amo yadto ang pinakamaayo nga mga tinuig sang akon kabuhi!” Isa ka utod nga lalaki nga nakaeksperiensia sing mga kalipay sa bug-os tion nga pag-alagad sugod pa sang iya pagkapamatan-on ang nagsiling sang ulihi: “Makaalayaw gid nga balikdon ang pagkapamatan-on kag makasiling ka nga natuman mo ang maalamon nga laygay nga: ‘Dumduma, karon, ang imo Dakung Manunuga sa mga adlaw sang imo pagkapamatan-on.’” (Manugw. 12:1) Nagakinahanglan ini sing maayo nga pagplano karon, ninyo sang imo mga ginikanan, nga ihanda ka agod maeksperiensiahan ining sahi sang kalipay sa tion sang imo pagkapamatan-on.

³ Mga Ginikanan, Ipadaku ang Bug-os Tion nga Pag-alagad: Si Jehova, subong isa ka mainulikdon nga Amay, nagatuytoy sa inyo sa husto nga dalanon. (Isa. 30:21) Sa pag-aman sining mahigugmaon nga panuytoy, nagpahamtang sia sing maayo nga halimbawa para sa inyo subong Cristianong mga ginikanan. Sa baylo nga pabayaan na lamang ang inyo kabataan sa pagpili sang kon ano ang maayo para sa ila, hanasa sila sing maalamon sa dalanon nga dapat nila laktan agod maagom nila ang pagpakamaayo ni Jehova. Nian, kon maghamtong na sila, ang inyo paghanas magabulig sa ila nga “makilala ang husto kag sayop.” (Heb. 5:​14) Natun-an sang mga hamtong gikan sa eksperiensia nga indi nila masaligan ang ila lamang kaugalingon nga pagtamod; dapat sila magsandig kay Jehova sa pagtadlong sang ila banas. (Hulu. 3:​5, 6) Mas nagakinahanglan sini ang mga pamatan-on, nga mas kulang sing eksperiensia sa kabuhi.

⁴ Mga ginikanan, samtang nagatin-edyer na ang inyo mga kabataan, ukon antes pa, makigsugilanon sa ila sing realistiko tuhoy sa ila luyag nga mga karera. Ang mga manuglaygay sa eskwelahan, mga manunudlo, kag mga kaklase magatinguha nga impluwensiahan sila nga pilion ang kalibutanon kag materyalistiko nga mga tulumuron. Buligi ang imo mga kabataan nga pilion ang mga kurso sa eskwelahan nga nagaaman sing praktikal nga paghanas, magasangkap sa ila nga matatap ang ila materyal nga mga kinahanglanon nga wala ginasakripisyo ang mga intereses sang Ginharian. (1 Tim. 6:​6-​11) Sa madamong kaso, ang edukasyon sa hayskul upod ang bokasyonal kag/ukon paghanas samtang nagatrabaho mahimo amo lamang ang kinahanglanon agod matatap niya sing nagakaigo ang iya mga kinahanglanon samtang nagasugod sia sa regular payunir nga ministeryo.

⁵ Palig-una ang mga pamatan-on nga tinguhaan ang hiyas sang pagkadiminyo. Kon luyag nila magpangasawa sa ulihi, mas handa sila nga akuon ang mabug-at nga mga responsabilidad sang pag-asawahay. (Tan-awa ang parapo 19 sang Hunyo 2001 nga suplemento sang Ang Aton Ministeryo sa Ginharian, “Nakahanda ka Bala Pirme?”) Paagi sa paghambal sing positibo tuhoy sa pagpayunir, pag-alagad kon diin daku ang kinahanglanon, pag-alagad sa Bethel, kag misyonero nga hilikuton, ipatudok sa mga pamatan-on bisan gamay pa sila ang handum nga gamiton ang ila kabuhi sa paagi nga nagapahamuot kay Jehova, nagabulig sa iban, kag nagahatag sing kalipay sa ila mismo kaugalingon.

⁶ Mga Pamatan-on, Unaha Anay ang Bug-os Tion nga Pag-alagad: Mga pamatan-on, indi kamo kinahanglan mahangawa kon ano gid bala ang pagpayunir nga hilikuton. Mahimo mo ini matilawan sing part-time paagi sa pag-auxiliary payunir kon san-o posible sa tion nga may klase kag sa tion sang bakasyon. Nian mahibaluan mo kon daw ano gid ka makaalayaw ang payunir nga pag-alagad! Makaplano ka bala nga mag-auxiliary payunir umpisa karon tubtob sa katapusan sining tingadlaw?

⁷ Kon isa ikaw ka pamatan-on nga utod nga lalaki sa organisasyon sang Dios, hunahunaa man sing serioso ang paghandum nga makalipikar subong isa ka ministeryal nga alagad. (1 Tim. 3:​8-10, 12) Dugang pa, binagbinaga ang, pag-aplay para sa pag-alagad sa Bethel ukon mag-eskwela sa Ministerial Training School kon makalab-ot ka na sa husto nga edad. Ang imo eksperiensia sa ministeryo magatudlo sa imo sang importante nga leksion, subong sang kon paano magsunod sa iskedyul, kon paano maorganisar sing maayo ang imo kaugalingon, kon paano makig-angot sa iban, kag kon paano mag-abaga sing responsabilidad. Magahanda ini tanan sa imo sa dalagku pa nga mga pribilehiyo sa pag-alagad sa ulihi.

⁸ Ang kapisan sa pagtuman sang mga hilikuton sang Dios amo ang yabi agod magmadinalag-on sa bug-os tion nga pag-alagad. Ginapalig-on ni apostol Pablo ining panimuot, kag ginpatalupangod niya ang mga pagpakamaayo nga mangin resulta: “Bisan ano ang inyo ginahimo, himua ninyo ini sing bug-os kalag subong nga kay Jehova, . . . kay nakahibalo kamo nga makabaton kamo gikan kay Jehova sang nagakaigo nga padya.” (Col. 3:​23, 24) Kabay nga pakamaayuhon ka ni Jehova sang madamong kalipay sa bug-os tion nga pag-alagad!