Dugang Pa nga mga Utod nga Lalaki ang Ginakinahanglan sa Payunir nga Pag-alagad
1 Si Pablo naglaygay sa aton nga ‘pirme madamo sing ginahimo sa buluhaton sang Ginuo.’ (1 Cor. 15:58) Para sa madamo, nagakahulugan ini sing pag-alagad subong payunir. Kutob sang Septiembre, 1995 tubtob Marso, 1996, kapin sa 1,200 ang gindugang sa mga payunir sa Pilipinas! Walay duhaduha nga madamo pa ang magaaplay sa Septiembre 1, 1996, ang panugod sang bag-ong tuig sang pag-alagad!
2 Sa karon ang mas madamo sa mga nagaalagad subong mga payunir sa sining pungsod mga utod nga babayi. (Sal. 68:11) Daw ano nga kalipay sa kongregasyon kon dugang pa nga mga utod nga lalaki ang magabuylog sa grupo sang bug-os tion nga mga alagad! (Sal. 110:3) Halangpunon nga dapat atipanon sang madamong utod nga lalaki ang mabug-at nga mga obligasyon sa trabaho kag sa pamilya. Ang iban nagapangabudlay man sing lakas sa pag-atipan sa espirituwal nga mga kinahanglanon sang kongregasyon. Ginaapresyar namon ining mga lalaki nga nagapanikasog tungod sa Ginharian.—1 Tim. 4:10.
3 Walay sapayan sina, mahimo bala nga dugang pa sa inyo nga mga utod nga lalaki ang makapayunir? Kon ang imo asawa nagapayunir, makabuylog ka bala sa iya? Kon ikaw retirado, wala ka bala nagaugyon nga wala na sing makaalayaw pa nga paagi sa paghinguyang sang imo tion sangsa bug-os tion nga ministeryo? Kon bag-o ka lang nakatapos sing hayskul, nabinagbinag mo na bala sing maayo kag sing mapangamuyuon ang pribilehiyo sa pagpayunir subong tikang padulong sa dugang pa nga mga pribilehiyo subong sang pag-alagad sa Bethel?—Efe. 5:15-17.
4 Isa ka utod nga lalaki ang nagbaligya sang iya matinin-aron nga negosyo kag nagtrabaho sing part-time agod makapayunir sia. Bangod sang iya maayo nga pagpanguna, tatlo sa iya apat ka kabataan ang nagpayunir sa gilayon pagkatapos sila makaeskwela. Ang ikap-at nalangkag sa pagbuylog sa ila. Ining utod kag ang iya panimalay ginpakamaayo sing bugana.
5 Isa ka Daku nga Ganhaan ang Bukas: Ang payunir nga pag-alagad makabukas sang “daku nga ganhaan nga nagapadulong sa hilikuton.” (1 Cor. 16:9) Ang payunir nga mga utod nga lalaki mahimo magamit sing labi pa sa kongregasyon. Ang makugi nga pagpanghikot sa latagon nagadugang sa ila espirituwal nga pagtubo kag nagaamot sa ila teokratikong pag-uswag. Ang pagpayunir makabukas sang dalan para sa dugang nga mga pribilehiyo sa pag-alagad. Mahimo ini mangin tikang para sa pag-alagad sa Bethel. Pagkatapos sang nahaunang-tuig sang pagpayunir, isa ka pagpakamaayo ang makatuon sa Pioneer Service School. Ang soltero nga ministeryal nga mga alagad kag mga gulang mahimo maghimud-os sa pagtuon sa Ministerial Training School. Huo, ang payunir nga ministeryo nagabukas sang ganhaan padulong sa sining daku pa nga mga pribilehiyo sang pag-alagad sa organisasyon ni Jehova.
6 Ang mga utod nga lalaki nga nagaplano sang ila mga hilikuton agod makapakigbahin sa regular payunir nga pag-alagad makaagom sing daku pa nga kalipay nga bunga sang dugang pa nga paghatag.—Binu. 20:35.