Ang Pulong sang Dios Kamatuoran
1. Anong importante nga impormasyon ang ginaunod sang Biblia?
1 “Ang kaundan sang imo pulong kamatuoran,” sulat sang salmista. (Sal. 119:160) Paagi sa iya inspirado nga Pulong, naghatag si Jehova sing makaalayaw nga mga sabat sa labing importante nga mga pamangkot tuhoy sa kabuhi. Nagahatag sia sing lugpay kag paglaum sa mga ginabudlayan. Kag ginapakita niya sa aton kon paano kita mangin suod sa iya. “Ang pagtuon sing kamatuoran gikan sa Biblia daw kaangay sa pagbiya sa madulom kaayo kag mahagnop nga duog kag pagsulod sa masanag kag maalikaya nga kuarto,” siling sang isa ka mapinasalamaton nga babayi. Nagapanikasog ka bala nga ipaambit ang kamatuoran gikan sa Pulong sang Dios sa tagsa ka kahigayunan?
2. Paano ginapauswag sang Biblia ang kabuhi sang mga tawo?
2 Ang Makapabag-o nga Gahom kag ang Ikasarang Sini sa Pagganyat sa mga Tawo sa Bug-os nga Kalibutan: Ang kamatuoran sa Biblia may gahom sa pagtandog sa mga tagipusuon kag sa pagpabag-o sa kabuhi. (Heb. 4:12) Ang isa ka lamharon nga babayi nga si Rosa nadalahig sa prostitusyon, subong man sa pag-abuso sa alkohol kag sa pagdroga. “Isa ka adlaw, sang ginpung-awan gid ako,” siling niya, “isa ka mag-asawa nga Saksi ang nakighambal sa akon kon paano ang Biblia makabulig sa paglubad sang aton mga problema. Nagsugod ako sa pagtuon sa Pulong sang Dios, nga nasapwan ko nga makawiwili. Sa sulod sang isa ka bulan may kusog na ako nga magbag-o. Bangod may katuyuan na ako karon sa kabuhi, indi ko na kinahanglan ang bulig sang alkohol ukon droga. Kag bangod luyag ko gid nga mangin abyan ni Jehova, determinado ako nga magkabuhi suno sa iya mga talaksan. Kon indi bangod sang praktikal nga kaalam sa Pulong sang Dios, sigurado gid nga nanginmatay na ako.”—Sal. 119:92.
3. Ngaa indi kita magpangalag-ag sa pagpakig-ambit sing mensahe sang Biblia sa iban?
3 Indi kaangay sang kalabanan nga mga libro karon, ang Biblia nagaganyat sa mga tawo gikan sa ‘tanan nga pungsod, tribo, katawhan, kag mga hambal.’ (Bug. 7:9) Kabubut-on sang Dios “nga ang tanan nga sahi sang tawo maluwas kag makadangat sa sibu nga ihibalo sang kamatuoran.” (1 Tim. 2:4) Busa, indi gid kita magdahom nga indi magbaton ang isa ka tawo sang maayong balita bangod lamang sang iya inagihan. Sa baylo, ipaambit ang mensahe sang Ginharian sa tanan, nagahimo sini sing direkta gikan sa Biblia kon posible.
4. Paano naton magamit ang Biblia kon nagapanaksi?
4 Ipadaku ang Kasulatan: Madamo sing kahigayunan nga magamit ang Biblia sa ministeryo. Kon nagapresentar sang mga magasin, tilawi nga basahon ang kasulatan nga yara sa ginpanugda nga presentasyon. Kon nagagamit sing tanyag nga literatura para sa sina nga bulan, nasapwan sang iban nga epektibo kon ilakip ang pagbasa sa ginpili sing maayo nga kasulatan sa ila introduksion. Kon nagaduaw liwat, basaha pirme ang isa ukon kapin pa nga teksto sa Biblia agod mabuligan ang tagbalay nga mag-uswag sa pagtigayon sing sibu nga ihibalo. Kon nagadumala sing pagtuon sa Biblia, isentro ang paghambalanay sa yabi nga mga teksto. Kon wala nagapakigbahin sa pormal nga ministeryo, magdala pirme sing Biblia agod gamiton kon may kahigayunan nga magpanaksi sing di-pormal.—2 Tim. 2:15.
5. Ngaa dapat manikasog kita sa paggamit sing Biblia sa aton ministeryo?
5 Kabay nga mabuligan naton ang iban nga makabenepisyo gikan sa makapahulag nga gahom sang kamatuoran sa Pulong sang Dios paagi sa paggamit sing Biblia sa tagsa ka nagakaigo nga kahigayunan sa aton ministeryo.—1 Tes. 2:13.