Bahin 1—Pagdumala sing Mainuswagon nga mga Pagtuon sa Biblia
Ano ang Isa ka Pagtuon sa Biblia?
1 Sa bug-os nga kalibutan, mga anom ka milyon ka pagtuon sa Biblia ang ginadumalahan sang katawhan sang Dios kada bulan. Paagi sa paggamit sing epektibo nga mga pamaagi sa pagtudlo, sarang naton mabuligan ining mga estudyante sa Biblia nga mag-uswag tubtob sa punto nga magdedikar kag magpabawtismo kag mangin “sangkol man sa pagtudlo sa iban.” (2 Tim. 2:2) Luyag mo bala buligan ang imo estudyante agod makahimo sining pag-uswag? Sugod sa sini nga gua, Ang Aton Ministeryo sa Ginharian magapagua sing pila ka serye sang mga artikulo nga magapaathag sang sadsaran nga mga aspekto sang paghiwat sang progresibo nga mga pagtuon sa Biblia.
2 Kon San-o Magreport Sing Isa ka Pagtuon sa Biblia: Kon regular kag sistematiko ka nga nagahinun-anon sa Biblia sa isa ka tawo, bisan sing malip-ot lamang, nga nagagamit sing Biblia kag sing ginapanugda nga mga publikasyon, nagadumala ikaw sing isa ka pagtuon sa Biblia. Matuod ini bisan kon ang pagtuon ginahimo sa ganhaan ukon paagi sa telepono. Ang pagtuon sarang mareport pagkatapos nga mahiwat ini sing duha ka beses sa tapos mapasundayag ang kahimusan sa pagtuon kag kon may patimaan nga magapadayon ang pagtuon.
3 Ang Ginapatuman nga brosyur kag ang Ihibalo nga libro amo ang mga publikasyon nga ginagamit sa pagdumala sang madamo nga mga pagtuon sa Biblia. Sa tion nga matapos na ining duha ka publikasyon, kon maathag nga ang ginatun-an nagauswag, bisan mahinay pa, kag nga nagalambo ang iya apresasyon sa iya natun-an, nian ang pagtuon sarang mapadayon sa Simbaha ang Dios nga libro. Ang brosyur nga Mahimo Ikaw Mangin Abyan Sang Dios! sarang magamit sa mga tawo nga may limitado nga edukasyon ukon ikasarang sa pagbasa.
4 Ang hilikuton nga pagtuon sa Biblia nangin epektibo sa pagbulig sa minilyon nga mangin matuod nga mga disipulo ni Jesucristo. (Mat. 28:19, 20) Paagi sa pag-aplikar sa mga panugda nga ihatag sang masunod nga mga artikulo sa sini nga serye, sarang ka makadumala sing isa ka progresibo nga pagtuon sa Biblia.