Ang Ginatudlo sang Biblia nga Libro—Aton Panguna nga Bulig sa Pagtuon sa Biblia
1 Nakunyag gid kita nga masaksihan ang pagpagua sang libro nga Ano Gid ang Ginatudlo Sang Biblia? sa “Diosnon nga Pagkamatinumanon” Distrito nga Kombension! Nalipay gid sa pagtigayon ang mga delegado sang ila kopya sang libro sa pagtakop sang programa sang Sabado. Paano magamit ining bag-ong libro sa pagtudlo? Gindesinyo ini agod mangin aton panguna nga bulig sa pagtuon sa Biblia. Bisan sa Marso pa ini itanyag, ang mga manugbantala ginapalig-on nga gamiton na ini sa pagsugod kag pagdumala sing mga pagtuon sa Biblia.
2 Bag-o nga mga Pagtuon sa Biblia: Ang mga manugbantala nga nagadumala sang mga pagtuon sa Biblia sa Ihibalo nga libro ukon sa Ginapatuman nga brosyur dapat mangin maalamon sa pagdesisyon kon paano kag kon san-o nila sugdan ang paggamit sang bag-o nga publikasyon sa pagtuon. Kon bag-o lang ang pagtuon, mahimo ini iliton sa panugod sang bag-o nga libro. Kon madugay na ninyo nga ginatun-an ang Ihibalo nga libro, mahimo mo mapadayon ang pagtuon sa pareho nga kapitulo sa Ginatudlo Sang Biblia nga libro. Kon nagahingapos na kamo sa Ihibalo nga libro, mahimo ninyo tapuson ina.
3 Mahimo nga madamo kita sing kilala nga makabenepisyo gid sa pagtuon sa Ginatudlo Sang Biblia nga libro. Ngaa indi tanyagan ang tagsa ka tawo sing pagtuon sa Biblia sa sining progresibo nga bulig sa pagtuon? Halimbawa, ang mga nakatuon na sa Ginapatuman nga brosyur ukon sa Ihibalo nga libro nga wala nag-uswag sa dedikasyon kag bawtismo mahimo nga luyag magpadayon sa pagtuon sa sining bag-o nga libro. Mahimo gamiton sang mga ginikanan ini nga libro kon nagapaalinton sang sibu nga ihibalo sang kabubut-on sang Dios sa ila mga kabataan.—Col. 1:9, 10.
4 Pagtuon sa Ikaduha nga Libro: May kahimusan pa bala para sa estudyante sang Biblia nga magtuon sang ikaduha nga libro pagkatapos sang Ano Gid ang Ginatudlo Sang Biblia? Huo. Kon nagauswag ang estudyante, bisan pa mahinay, kag nagaapresyar sang iya natun-an, mahimo mapadayon ang pagtuon sa Biblia sa libro nga Simbaha ang Lamang Matuod nga Dios. Nagasalig gid kita nga ang Ginatudlo Sang Biblia nga libro mangin isa ka epektibo gid nga galamiton samtang ginatuman naton ang aton hilikuton nga paghimo sing disipulo.—Mat. 28:19, 20.