Bag-o nga Programa sa Adlaw ang Pinasahi nga Asambleya
Kon may makita ukon mabatian kita nga paandam, apang wala kita mamati sa sini, mahimo mangin makahalalit gid ini. Labi pa gid ka importante ang pagsunod sa espirituwal nga mga panuytoy nga gin-aman ni Jehova. Ipadaku ini sa programa sa adlaw sang pinasahi nga asambleya sa tuig 2005. Ang tema amo “Hatagi Ninyo Sing Igtalupangod kon Paano Kamo Nagapamati.”—Luc. 8:18.
Binagbinagon sang nagaduaw nga humalambal sa iya una nga pamulongpulong kon paano ang laygay sa nagabukas nga mga kapitulo sang inspirado nga sulat ni Pablo sa mga Hebreo maaplikar sa aton karon. Buligan man niya ang tanan sa iya nagatakop nga pamulongpulong nga natig-uluhan, “Hatagi Sing Dalayon nga Igtalupangod ang Instruksion Sang Dios,” sa pag-usisa kon bala nagapamati gid kita kay Jehova, sa iya Anak, kag sa “matutom kag mainandamon nga ulipon.”—Mat. 24:45.
Ang pila ka bahin sang programa mapuslanon gid sa mga pamilya. Ang tema nga “Mga Pamilya nga Walay Tublag nga Nagapamati sa Pulong Sang Dios,” magabulig sa aton nga indi pagtugutan ang mga butang sa kalibutan nga magsablag sa aton pag-uswag sa espirituwal. Magalakip ini sing mga interbyu sa mga naghimo sing mga pagbalhin sa kabuhi agod unahon ang espirituwal nga mga butang. Ang tema nga, “Kon Paano ang Atentibo nga Pagpamati sa Pulong Sang Dios Nagapabakod sa Aton mga Pamatan-on,” magalakip sing mga interbyu sa mga pamatan-on nga nangin matutom sa kamatuoran sa eskwelahan, upod sa ila mga katubotubo, ukon sa ministeryo. Ang tema nga, “Ang mga Bata nga Nagapamati sa Dios kag Nagatuon,” magabulig sa aton nga indi pakadiutayon ang ikasarang sa pagtuon sang mga bata. Ang pag-interbyu sa mga kabataan kaupod sa ila mga ginikanan makabulig sa aton nga mahangpan ang kaayuhan gikan sa paghanas sa mga kabataan sugod sa pagkalapsag sa mga dalanon ni Jehova.
Samtang ‘ginapatalang ni Satanas ang bug-os napuy-an nga duta,’ ginatudluan ni Jehova ang iya matutom nga mga alagad sa dalanon nga dapat nila laktan. (Bug. 12:9; Isa. 30:21) Mangin maalamon kita, malipayon kag makaangkon sing kabuhi nga walay katapusan kon mamati kita sing maayo sa iya mga laygay kag masinulundon nga mag-aplikar sa sini.—Hulu. 8:32-35.