Magbatyag Pirme Sing Pagkahilingagawon!
1 Nahibaluan ni Jesus nga limitado lamang ang iya tion sa duta agod himuon ang hilikuton sang iya Amay. (Juan 9:4) Gani, may pagkahilingagawon nga gintuman niya ang iya ministeryo, kag ginhanas niya ang iya mga disipulo nga himuon man ini. (Luc. 4:42-44; 8:1; 10:2-4) Ikaduha lamang para sa iya ang kasulhayan. (Mat. 8:20) Amo kon ngaa natapos niya ang ginpahimo sa iya ni Jehova.—Juan 17:4.
2 Limitado nga Tion: Limitado man ang tion sa pagbantala sang maayong balita “sa bug-os napuy-an nga duta.” (Mat. 24:14) Ginapakita sang mga tagna sang Biblia nga madugay na kita nga nagakabuhi sa tion sang katapusan. Sa dili madugay “ang mga wala nagakilala sa Dios kag ang mga wala nagatuman sa maayong balita tuhoy sa aton Ginuong Jesus . . . magaantos sing silot nga walay katapusan nga kalaglagan.” (2 Tes. 1:6-9) Ini nga paghukom hinali nga magaabot. (Luc. 21:34, 35; 1 Tes. 5:2, 3) Dapat mahibaluan sang mga tawo ang ila makatalagam nga kahimtangan. Responsabilidad naton nga buligan sila sa pagtigayon sing kahamuot ni Jehova samtang may tion pa.—Sof. 2:2, 3.
3 Paghimo Sang Aton Bug-os nga Masarangan: Ginauna sang mga alagad sang Dios ang pagbantala nga hilikuton bangod nahibaluan nila nga “ang tion nga nabilin ginpalip-ot.” (1 Cor. 7:29-31; Mat. 6:33) Ang iban hungod nga nagsikway sang mga bentaha sa pinansial ukon sang iban nga hilikuton agod madugangan ang ila pagpakigbahin sa ministeryo. (Mar. 10:29, 30) Ang iban padayon nga “madamo pirme sing ginahimo sa hilikuton sang Ginuo” walay sapayan sang nagapadayon nga mga pagtilaw. (1 Cor. 15:58) Madamo ang padayon nga nagabantala sang maayong balita sa sulod sang mga dekada. (Heb. 10:23) Ginapabaloran gid ni Jehova ang tanan nga mga sakripisyo agod sakdagon ang mga intereses sang Ginharian.—Heb. 6:10.
4 Ang paghugod sang aton kabuhi sa pagsimba kay Jehova, nga nagalakip sa pagbantala nga hilikuton, nagabulig sa aton nga dumdumon pirme ang adlaw ni Jehova. Nagaamlig ini sa aton nga indi mawili sa kalibutan ni Satanas kag nagapalig-on sa aton pamat-od nga huptan ang balaan nga paggawi. (2 Ped. 3:11-14) Sa pagkamatuod, ang pagtuman sang aton ministeryo upod ang pagbatyag sing pagkahilingagawon makaluwas sa aton kag sa mga nagapamati sa aton.—1 Tim. 4:16.