Karon Na Gid ang Tion sa Pagbantala!

1. Ngaa karon na gid ang tion sa pagbantala?

¹ “Kahadluki ninyo ang Dios kag hatagi sia sing himaya.” Paagi sa panuytoy sang mga anghel, ginapahayag ini nga mensahe “sa tagsa ka pungsod kag tribo kag hambal kag katawhan.” Ngaa dapat ini ipahayag? ‘Kay nag-abot na ang oras sang paghukom’ sang Dios. Nagakabuhi kita karon sa ‘oras sang paghukom,’ nga sugdan sa paglaglag sining presente nga sistema sang mga butang. Importante gid para sa katawhan nga ‘simbahon ang Isa nga naghimo sang langit kag duta, sang dagat kag mga tuburan sang tubig.’ Wala na sing hilikuton karon nga mas importante ukon mas hilingagawon pa sangsa pagbantala sang “walay katapusan nga maayong balita.” Huo, karon na gid ang tion sa pagbantala!—⁠Bug. 14:6, 7.

2. Paano ginapakita sang mga alagad ni Jehova nga ginabatyag nila ang pagkahilingagawon sang tion?

² Sa nagligad nga napulo ka tuig, ang mga alagad ni Jehova naghinguyang sing halos 12 bilyones ka oras sa pagbantala sing Ginharian kag paghimo sing disipulo. Madamo ang nagpasibu sang ila pangabuhi agod makapakigbahin sing bug-os sa espirituwal nga pagpangani. (Mat. 9:37, 38) Halimbawa, sang 2004, may promedyo nga kapin sa 850,000 ka manugbantala kada bulan ang nagpayunir. Para sa mga regular payunir, nagakinahanglan ini sing promedyo nga 70 ka oras kada bulan sa pagbantala. Sa mga auxiliary payunir naman, 50 ka oras.

3. Ano nga mga pagpasibu ang masami nga ginhimo sang mga manugbantala agod makapayunir?

³ Kon Paano Makapayunir: Bangod nahibaluan nila nga “ang tion nga nabilin ginpalip-ot,” ginatinguhaan sang mga payunir nga mangin simple lang ang ila pagkabuhi. (1 Cor. 7:29, 31) Nagatinguha sila nga mabuhinan ang ila galastuhan agod mangin diutay na lang nga tion ang ila ihinguyang sa sekular nga trabaho. Halimbawa, ang iban nagsaylo sa mas gamay nga balay. Ginsikway sang iban ang di-kinahanglanon nga materyal nga pagkabutang. (Mat. 6:19-21) Sa masami, dapat man nila buhinan ang ila personal nga mga paninguha. Tanan ini ginhimo nila agod mas madamo nga tion kag atension ang ila mahugod sa ministeryo. (Efe. 5:15, 16) Bangod sang pagkapursigido, pagsakripisyo, kag mapinangamuyuon nga pagsalig kay Jehova, madamo nga manugbantala ang nakahimo sing praktikal nga iskedyul agod makapayunir.

4. Anong praktikal nga mga tikang ang makabulig sa imo agod makapayunir?

⁴ Makapayunir ka bala? Ngaa indi mamangkot sa madinalag-on nga mga payunir kon ano ang ila ginhimo? Magpanghikot upod sa ila sa ministeryo, kag batyaga man ang ila kalipay. Binagbinaga ang mga artikulo tuhoy sa pagpayunir sa aton mga publikasyon. Magpahamtang sing praktikal nga mga tulumuron nga makabulig sa imo agod makapayunir. Kon may mga balagbag nga nagaupang sa imo karon agod indi makapayunir, ipangamuyo ini kay Jehova, kag pangabaya sia sa pagbulig sa imo nga malandas ini.—⁠Hulu. 16:3.

5. Paano ang pagpayunir makabulig sa aton sa pagpalambo sang aton ikasarang sa ministeryo?

⁵ Mga Pagpakamaayo kag Kalipay: Ginapauswag sang pagpayunir ang aton ikasarang sa paggamit sang Pulong sang Dios, nga amo ang nagapahalipay pa gid sa aton. “Ang paggamit sing matadlong sa Pulong sang kamatuoran isa gid ka pagpakamaayo,” siling sang isa ka pamatan-on nga babayi nga payunir. “Kon payunir ka, masunson mo ginagamit ang Biblia. Kon nagapamalaybalay ako karon, makahunahuna ako sing mga teksto nga nagakaigo sa tagsa ka tagbalay.”—⁠2 Tim. 2:⁠15.

6. Ano nga paghanas ang ginahatag sang pagpayunir?

⁶ Ginatudluan man kita sang pagpayunir sing madamong importante nga ikasarang sa pangabuhi. Nagabulig ini sa mga pamatan-on kon paano maalamon nga mag-iskedyul sing tion, paano magkinot, kag kon paano makig-angot sa mga tawo. Madamo ang nagpauswag sing dugang pa nga espirituwal nga tulumuron subong resulta sang pagpayunir. (Efe. 4:13) Dugang pa, masami nga nakapribilehiyo ang mga payunir nga maeksperiensiahan ang pagbulig ni Jehova sa ila.—⁠Binu. 11:21; Fil. 4:11-13.

7. Paano ang pagpayunir makabulig sa aton nga magsuod kay Jehova?

⁷ Ayhan ang isa sa pinakadaku nga pagpakamaayo sang pagpayunir amo nga nagabulig ini sa aton nga mangin suod kay Jehova. Makasakdag ini sa aton sa tion sang mga pagtilaw. Ang isa ka utod nga babayi nga nakaagi sing grabe nga kabudlayan nagsiling: “Ang suod nga kaangtanan kay Jehova nga akon napalambo paagi sa akon pagpayunir nakabulig sa akon nga malandas ini.” Nagsiling pa sia: “Nalipay gid ako nga ginhinguyang ko ang akon adulto nga pagkabuhi sa pag-alagad sing bug-os tion kay Jehova. Nagpaposible ini sa akon nga nahimo ang mga butang nga daw indi ko mahimo.” (Binu. 20:35) Kabay nga maangkon man naton ang mga pagpakamaayo samtang ginahimo naton ang aton bug-os nga masarangan sa sining importante gid nga hilikuton, ang pagbantala.—⁠Hulu. 10:22.