Makahimo Bala sing Hamtong nga Desisyon ang Imo Bata?

1. Ano ang tindog sang pamatan-on nga mga Saksi tuhoy sa pagpatughong sing dugo? Maghatag sing isa ka halimbawa.

¹ Isa ka hamtong nga desisyon tuhoy sa ano? Pagpatughong sing dugo. Subong sang ginpakita sa artikulo nga “Maglakat Subong Gintudluan ni Jehova” sa Hunyo 15, 1991, nga gua sang Ang Lalantawan, ang mga bata sang mga Saksi ni Jehova dapat maghimo sing hamtong nga desisyon agod pamatud-an nga importante gid sa ila kaangay sang ila mga ginikanan, ang ila handum sa pagsunod sa sugo sang Dios tuhoy sa dugo. Subong man bala sina ang dapat himuon sang inyo menor de edad nga bata?

2. Anong legal nga talaksan ang gin-aplikar sang isa ka korte sa isa ka menor de edad nga nangindi sa pagpatughong sing dugo, kag ano ang matun-an sang Cristianong mga ginikanan kag sang ila mga bata nga menor de edad gikan sa sini?

² Ano ang Ginasiling sang Kasuguan? Sa pagkasaba sa kaso sang isa ka 17-anyos nga utod nga babayi nga nagdumili sa pagpatughong sing dugo, ang Korte Suprema sang Illinois sa Estados Unidos namatbat: “Kon ang ebidensia maathag kag makapakumbinsi nga ang menor de edad hamtong na sa paghangop sang mga resulta sang iya mga ginahimo [kag] makadesisyon kaangay sang isa ka adulto, nian ang talaksan para sa hamtong nga menor de edad ipadapat sa iya sang kasuguan kag makadesisyon sia kon bala batunon ukon isikway niya ang isa ka pamaagi sang pagbulong.” Busa, sa pagbinagbinag kon bala ang isa ka bata hamtong na sa paghimo sing kaugalingon nga desisyon, mahimo nga interbyuhon sang mga doktor ukon sang mga opisyal ang pasyente agod pamatian ang iya personal nga pagpangindi sa pagpatughong sing dugo. Dapat mahibaluan sing rasonable sang pamatan-on ang kalala sang iya balatian kag ang mga resulta sang iya ginpili nga pagbulong kag maathag kag malig-on nga ipabutyag niya ang iya relihioso nga pagpati sa kasuguan sang Dios tuhoy sa dugo.

3. Anong mga pamangkot ang dapat binagbinagon sing serioso sang mga ginikanan, kag ngaa?

³ Ano ang sarang Isiling sang Imo Bata? Makapabutyag bala sing kinaugalingon ang imo bata sa sini nga isyu? Bug-os tagipusuon bala sila nga nagapati nga sugo gid sang Dios nga ‘maglikaw sa dugo’? (Binu. 15:29; 21:25) Mapaathag bala nila ang ila pagpati pasad sa Kasulatan? Maisugon ayhan nila nga matindugan ang ila malig-on nga desisyon tuhoy sa dugo kon magsiling ang mga doktor nga nabutang sa katalagman ang ila kabuhi, bisan pa wala ang ila mga ginikanan? Bangod “ang tion kag wala ginapaabot nga hitabo nagakahanabo sa [aton] tanan,” paano ninyo mahanda ang inyo kabataan sa wala ginpaabot nga pagtilaw sang ila integridad?—Man. 9:11; Efe. 6:4.

4, 5. (a) Ano ang salabton sang mga ginikanan, kag paano nila ini matuman? (b) Anong mga aman nga matigayon ang makabulig sa mga ginikanan?

⁴ Mga Ginikanan, Ano ang Inyo Himuon? Salabton ninyo ang pagtudlo sa inyo kabataan sa pagtamod sang Dios tuhoy sa dugo. (2 Tim. 3:14, 15) Ang klaro nga paathag masapwan sa Reasoning nga libro, pahina 70-4. Tun-i ini sing maayo upod sa inyo pamilya. Ginagamit ang bahin nga “If Someone Says”—sa pahina 74-6, dumalahi ang isa ka pag-ensayo upod sa inyo kabataan agod mabuligan sila sa pagtigayon sing eksperiensia sa pagpaathag kon ano ang ila pagpati kag kon ngaa. (1 Ped. 3:15) Ang iban pa nga aman sa pagtudlo sa aton tuhoy sa isyu sa dugo nagalakip sang brosyur nga How Can Blood Save Your Life? kag Ang Lalantawan nga Hunyo 15, 2004, pahina 14-24. Dugang pa, ang mga programa sa video nga Transfusion-Alternative Health Care—Meeting Patient Needs and Rights kag No Blood—Medicine Meets the Challenge, nga matigayon karon sa DVD nga natig-uluhan Transfusion Alternatives—Documentary Series, nagahatag sing makapakumbinsi nga impormasyon tuhoy sa pagkarasonable kag pagkaepektibo sang wala sing dugo nga pagbulong kag pag-opera. Natan-aw kag nahinun-anunan na bala sang inyo pamilya sining karon lang ini nga mga video?

⁵ Buligi ang inyo kabataan nga ‘mapamatud-an nila sa ila kaugalingon ang maayo, kalahamut-an, kag himpit nga kabubut-on sang Dios’ tuhoy sa dugo. Nian makahimo sila sing hamtong nga desisyon nga pakamaayuhon ni Jehova.—Roma 12:2.