Ang Aton Ministeryo—Isa ka Buhat Sang Kaawa
1 Natalupangdan ni Jesus nga ang kadam-an nga nagapamati sa iya mensahe ‘ginpanitan kag nag-alaplaag kaangay sang mga karnero nga wala sing manugbantay.’ (Mat. 9:36) Upod ang kalum-ok kag gugma, gintudluan niya sila sang mga dalanon ni Jehova, ginlugpayan, kag mapinalanggaon nga gin-atipan ang ila espirituwal nga mga kinahanglanon. Kon ginapamalandungan naton ang iya mga dalanon, makatuon kita sa paghunahuna kag pagbatyag kaangay ni Jesus, kag mapakita naton ang kaawa sa aton ministeryo.
2 Pamalandungi sing makadali kon paano gintratar ni Jesus ang mga tawo nga nagakinahanglan gid sing bulig nga nagpalapit sa iya. (Luc. 5:12, 13; 8:43-48) Mapatugsilingon gid sia sa mga may pinasahi nga mga kinahanglanon. (Mar. 7:31-35) Ginatalupangod gid niya ang balatyagon sang iban kag mabinalak-on gid sia. Wala sia nagatulok sa nagua nga dagway. (Luc. 7:36-40) Sa pagkamatuod, himpit nga ginpabanaag ni Jesus ang kaawa sang Dios.
3 ‘Napahulag Sang Kaluoy’: Ginhimo ni Jesus ang iya ministeryo indi bangod obligasyon lamang niya ini. “Napahulag sia sang kaluoy” sa katawhan. (Mar. 6:34) Amo man karon, wala lamang naton ginapaalinton ang mensahe kundi ginatinguhaan gid naton nga maluwas ang hamili nga mga kabuhi. Tinguhai nga hangpon kon ngaa subong sina ang reaksion sang mga tawo. Ngaa nabalaka ukon natublag gid sila? Napabay-an bala sila kag ginlimbungan sang butig nga mga manugtatap sang relihion? Ang aton tudok nga interes sa iban mahimo magpahulag sa ila nga mamati sa maayong balita.—2 Cor. 6:4, 6.
4 Makatandog sa tagipusuon ang kaawa. Sa pag-ilustrar: Napatyan sing tatlo ka bulan nga lapsag ang isa ka iloy. Sang nanagbalay ang duha ka Saksi sa ila, ginpasulod niya sila sa tuyo nga balion ang ila argumento tuhoy sa rason sang pagtugot sang Dios sa pag-antos. Apang, nagsiling sang ulihi ang babayi: “Nagpamati sila sa akon nga may daku gid nga kaawa, kag sang manuglakat na sila, naghaganhagan ang akon pamatyag amo nga nagsugot ako nga duawon nila liwat.” Ginatinguhaan mo bala nga magpakita sing kaawa sa tanan nga imo maistorya sa ministeryo?
5 Ang pagpalambo sang kaawa magabulig sa aton nga makapaambit sing matuod nga lugpay sa iban. Sa paghimo sini, mahimaya naton “ang Amay nga may mapinalanggaon nga kaluoy,” si Jehova.—2 Cor. 1:3.