Nahiusa kag Bug-os Kalibutan nga Panikasog nga Ipahibalo ang “Sunda si Cristo!” Distrito nga Kombension Managtag Liwat ang mga Manugbantala Sing Isa ka Pinasahi nga Handbill
1 Sang nagligad nga tuig, ang bug-os kalibutan nga kampanya nga ipahibalo ang “Malapit Na ang Kaluwasan!” Distrito nga Kombension may daku gid nga epekto sa mga interesado. Ang mga nagbaton sing pinasahi nga imbitasyon kag nagtambong nakaeksperiensia sa una nga tion kon daw ano ka dagaya ang espirituwal nga kapiestahan upod sa mga Saksi ni Jehova. (Isa. 65:13) Nakapakig-upod sila sa mainit kag nahiusa nga Cristianong paghiliutod. (Sal. 133:1) Agod buligan ang mas madamo pa nga tawo nga makatambong sa “Sunda si Cristo!” Distrito nga Kombension, magapakigbahin kita liwat sa bug-os kalibutan nga pagpanagtag sang isa ka pinasahi nga handbill.
2 Mga Resulta Sang Nagligad nga Tuig: Base sa mga report nga nabaton gikan sa tanan nga bahin sang kalibutan, dalayawon ang nangin resulta sa pagpahibalo sang “Malapit Na ang Kaluwasan!” Distrito nga Kombension. Halimbawa, sa isa ka siudad, isa ka pamantalaan ang nagbalhag sing anom ka kolumna nga artikulo tuhoy sa kampanya, nga nagasiling: “Agod malab-ot ang tanan antes sang kombension, nagpanikasog gid ang mga Saksi sa pag-agda sa ila mga kaingod—nagpanghikot sing mas malawig nga tion, naglakat sing mas malayo, kag nagpakigsugilanon sing mas madasig.” Sa isa pa ka siudad, di-magkubos tatlo ka pamantalaan ang paborable nga nagreport tuhoy sa aton hilikuton antes sang kombension. Ang isa ka reporter nagsulat sing pila ka malawig nga artikulo nga nagkobre sing kapin sa duha ka pahina sang pang-Domingo nga edisyon sang isa ka pamantalaan. Gindetalye sini ang aton mga pagpati, ang aton paghiliutod, ang pagpanagtag sing handbill, kag ang kombension. Sang ginatanyagan sang isa ka manugbantala sing imbitasyon ang isa ka balay, nagsal-ot ang tagbalay, nga nagasiling: “Ay huo. Bag-o ko lang mabasa ina sa pamantalaan!” Ang isa pa ka tagbalay nagsiling: “Ginabasa ko pa lang gani ang tuhoy sa inyo, ari na kamo dayon! Amo na ang akon imbitasyon?” Nagdugang pa sia, “Maayo gid ining ginahimo sang mga Saksi ni Jehova.”
3 Madamo nga interesado ang nagkadto sa duog nga ginahiwatan sang kombension nga may dala pa nga imbitasyon. Ang iban nga mga interesado naglakbay pa halin sa malayo nga mga siudad agod makatambong. Ang aton mapisan nga mga panikasog nga agdahon ang iban nagresulta sa pagdugang sa kadamuon sang tumalambong. Sa isa ka pungsod, 27 porsiento ang pagtaas sa kadamuon sang nagtambong sangsa nagligad nga tuig. Diri sa Pilipinas, ang nagtambong sang nagligad nga tuig naglab-ot sa 340,215, amo ini ang pinakamadamo nga nagtambong sa kombension.
4 Pagtuptop Sang Teritoryo: Mahimo na ninyo sugdan ang pagpanagtag sang handbill tatlo ka semana antes sang inyo kombension. Dapat panikasugan naton nga kobrehan ang bug-os nga teritoryo sang kongregasyon. Sa mga kongregasyon nga may daku nga teritoryo, mahimo ibilin sang mga manugbantala ang handbill sing mataktikanhon sa mga balay nga wala sing tawo sa katapusan nga semana antes sang kombension. Dapat panikasugan gid sang mga kongregasyon nga ipanagtag ang tanan nga handbill nga ipadala sa ila kag tuptupan ang bug-os nga teritoryo tubtob posible. Ang bisan ano nga sobra dapat ihatag sa mga payunir.
5 Kon Ano ang Ihambal: Mahimo ka magsiling sing kaangay sini: “Nagapakigbahin kami sa bug-os kalibutan nga panikasog nga ipanagtag ining imbitasyon para sa nagapakari nga importante nga okasyon. Ari ang imo imbitasyon. Makita mo sa sina ang iban pa nga detalye.” Mas madamo ka sing mapanagtagan kon lip-uton mo lang ang imo presentasyon. Siempre, kon may pamangkot ang tagbalay dapat mo ini sabton. Kon may nagpakita sing interes, irekord ini kag baliki gilayon.
6 Daw ano gid ka importante nga manikasog kita nga sundon si Cristo! (Juan 3:36) Ang aton nagapakari nga distrito nga kombension makabulig sa aton tanan nga himuon ina. Pat-od nga mapaabot naton nga isa naman ka daku nga panaksi ang mahatag subong resulta sining nahiusa nga panikasog nga ipahibalo ang “Sunda si Cristo!” Distrito nga Kombension. Busa, mangin mapisan sa pag-agda tubtob sa masarangan mo. Kabay nga pakamaayuhon sing bugana ang imo personal nga panikasog samtang nagapakigbahin ka sa sining nahiusa kag bug-os kalibutan nga kampanya.