Himua nga Tulumuron ang Pagdumala sing Pagtuon sa Biblia

¹ “Bayawa ang inyo mga mata, kag lantawa ang kaumhan nga maputi na nga alanyon.” (Juan 4:35) Ining mga ginpamulong ni Jesucristo pat-od gid nga maaplikar sa kahimtangan sang Cristianong mga ministro karon.

² Makasapo gihapon kita pirme sing bunayag sing tagipusuon nga mga tawo nga nagahandum nga matudluan sang mga dalanon ni Jehova. Ang pamatuod sini amo ang kadamuon sang mga ginabawtismuhan kada tuig. Kon luyag mo gid nga makadumala sing pagtuon sa Biblia, ano ang dapat mo himuon?

³ Magpahamtang sing Tulumuron: Una, magpahamtang sing tulumuron nga makasugod kag makadumala sing isa ka regular nga pagtuon sa Biblia. Dumduma pirme ini nga tulumuron samtang nagabantala ka. Sanglit subong mga Cristiano, ginsugo kita nga magbantala kag magpanudlo, dapat naton panikasugan nga madugangan ang aton pagpakigbahin sa hilikuton nga pagdumala sing pagtuon sa Biblia.—Mat. 24:14; 28:19, 20.

⁴ Iban Pa nga Butang nga Dapat Tandaan: Kinahanglan gid mangamuyo sing tinagipusuon ang mga manugbantala sang Ginharian. Kon kaisa makasapo kita sang mga tawo nga nagapangamuyo man sing espirituwal nga bulig. Daku gid nga pribilehiyo nga gamiton kita ni Jehova agod masapwan kag matudluan ini nga mga tawo!—Hag. 2:7; Binu. 10:1, 2.

⁵ Isa ka utod nga babayi ang nangamuyo para makadumala sing isa ka pagtuon sa Biblia ang nagdispley sang mga kopya sang tract nga Luyag Mo Bala Madugangan ang Imo Nahibaluan sa Biblia? sa iya ginaubrahan. Sang may isa ka babayi nga nagkuha sing tract, pagkatapos ginbasa ini, kag ginsulatan ang kupon, ginsugilanon sia sang utod kag nasugdan ang isa ka pagtuon sa Biblia.

⁶ Mahimo ka mabuligan sang mga masigkamanugbantala nga epektibo sa pagsugod kag pagdumala sing pagtuon sa Biblia nga lab-uton ang imo tulumuron nga magdumala sing pagtuon sa Biblia. Ipangamuyo sa Dios ang imo panikasog nga makasapo sing pagtuon sa Biblia, kag hingaliti ang tanan nga bulig nga matigayon mo agod malab-ot ini nga tulumuron. Ayhan sa indi madugay mabatyagan mo man ang kalipay sa pagdumala sing pagtuon sa Biblia.