Ang Pinakalapnag nga Kampanya sa Pagbantala sa Bug-os nga Kalibutan!

Kapin na sa 100 ka tuig nga naorganisar ang mga Saksi ni Jehova sa pagbantala sang maayong balita. (1 Cor. 9:23) Paagi sa sining pinakalapnag nga kampanya sang pagbantala sa bug-os nga kalibutan, ginapaalinton naton ini nga mensahe sa nanuhaytuhay nga lenguahe. Ginabantala naton ini sa kapin sa 230 ka kadutaan. (Mat. 24:14) Apang ngaa importante ini nga hilikuton? Kag paano ini ginahimo sa bug-os nga kalibutan?

Ang video nga Jehovah’s Witnesses—Organized to Share the Good News magasabat sa sini nga mga pamangkot paagi sa detalyado nga presentasyon tuhoy sa nanuhaytuhay nga bahin sang aton internasyonal nga mga hilikuton. Samtang ginatan-aw mo ini binagbinaga ini nga mga pamangkot: (1) Paano ginaorganisar kag ginadumalahan ang aton hilikuton? (2) Paano ang Writing, Translation Services, Art, kag Audio/Video Services Department nakabulig sa pagpaalinton sang maayong balita? (3) Ano ang katuyuan sang aton pag-imprinta sing madamo nga mga balasahon kag masako nga pagdul-ong sini sa mga kongregasyon? (Juan 17:3) (4) Pila ka literatura ang ginaimprinta sa isa ka tuig? (5) Ano ang epekto sang aton pasad sa Biblia nga mga publikasyon? (Heb. 4:12) (6) Ano ang ginhimo agod mahatagan sing espirituwal nga bulig ang mga bulag kag mga apa? (7) Paano ginagastuhan ang aton hilikuton? (8) Ano ang benepisyo sa aton sang pagpanghikot sang Hospital Information Services, Service Department, kag Convention Department? (9) Subong isa sa mga Saksi ni Jehova, paano ini nga video nagpatudok sang imo apresasyon (a) sa panikasog sang organisasyon ni Jehova nga ibantala ang maayong balita? (b) sa kapin sa 100 ka pamilya Bethel sa bug-os nga kalibutan? (c) sa paghanas sa mga manugtatap kag mga misyonero? (d) sa kapuslanan sang pagsugod sang tagsa ka adlaw paagi sa pag-usisa sang isa ka teksto sa Biblia kag sa paghanda sa mga miting kada semana? (e) sa benepisyo sa pagtambong sa aton Cristianong mga miting? (f) sa kon ano ang mangin kahulugan sang dutan-on nga Paraiso? (Isa. 11:9) (g) sa personal nga pagpakigbahin sa hilikuton nga pag-ani?—Juan 4:35.

Anong positibo nga reaksion ang imo natalupangdan sang ginpakita mo ini nga video sa imo mga paryente, mga kakilala, mga ginduaw liwat, kag sa imo mga estudyante sa Biblia? Ngaa indi mo gilayon pag-ipaambit ini nga video kag ang maayong balita sa iban?—Mat. 28:19, 20.