Mapasangkad Mo Bala ang Imo Pag-alagad?
1. Ano ang hilingagawon nga hilikuton sa ministeryo sa latagon, kag ngaa?
1 Sang nakita niya nga madamo katama nga tawo ang nangin interesado sa maayong balita sang Ginharian ginsugo ni Jesus ang iya mga disipulo nga ‘magpakiluoy sa Agalon sang alanyon nga magpadala sang mga mamumugon sa iya alanyon.’ (Mat. 9:37, 38) Bangod yari na kita sa katapusan nga mga tinion sang pagpangani, ang aton hilikuton labi pa gid nga hilingagawon kon ipaanggid sang una. Tungod sini, kinahanglan nga binagbinagon naton kag ipangamuyo kon paano kita makapakigbahin sing bug-os sa ministeryo sa latagon.—Juan 14:13, 14.
2. Ano ang ginhimo sang iban bangod kinahanglan ang madamo nga mamumugon sa latagon?
2 Mas Masangkad nga Pag-alagad: Paagi sa panuytoy kag bulig ni Jehova, nangin posible para sa madamo ang pag-alagad subong payunir. (Sal. 26:2, 3; Fil. 4:6) Ang pila ka kauturan nagapanikasog nga mag-alagad subong mga auxiliary payunir sing isa ka bulan ukon kapin pa kada tuig. Maayo gid ini nga paagi para mapasangkad nila ang ila ministeryo. Ang kalipay nga ila natigayon sa pag-alagad subong mga auxiliary payunir nagpahulag sa ila nga mag-alagad subong mga regular payunir.—Binu. 20:35.
3. Kon payunir ka sang una, ano ang mahimo mo binagbinagon karon?
3 Makapayunir Ka Bala Liwat?: Kon nag-alagad ka sang una subong payunir, wala duhaduha nga nadumduman mo pa ang imo makalilipay nga mga eksperiensia. Nabinagbinag mo na bala sing mapinangamuyuon kon posible nga makapayunir ka liwat? Mahimo ang kahimtangan nga nag-upang sadto sa imo sa pagpayunir wala na karon. Ayhan tion na karon nga makapayunir ka liwat.—1 Juan 5:14, 15.
4. Anong pinasahi nga kahigayunan ang bukas sa aton tanan?
4 Ang hilikuton nga pagpangani nagapadayon gihapon karon kag malapit na ini matapos. (Juan 4:35, 36) Mahimo tanan kita nagabinagbinag sang aton presente nga kahimtangan kon bala mabag-o naton sa pila ka paagi ang aton adlaw-adlaw nga mga hilikuton para mapasangkad naton ang aton pagpakigbahin sa latagon. Ukon kon wala gid ginatugot sang aton kahimtangan nga mapasangkad naton ang aton pag-alagad, makapangita bala kita sing mga paagi nga mangin labi kita ka epektibo? (Mar. 12:41-44) Isa gid ini ka daku nga pribilehiyo para sa tanan nga ang ila kahimtangan nagatugot sa ila nga makapayunir!—Sal. 110:3.