Pagbuligay Para Mabantalaan ang mga Teritoryo nga Sarisari sing Lenguahe

Ang mga tawo masami nga nagapamati sa mensahe sang Ginharian kon mabatian nila ini sa ila kaugalingon nga lenguahe. Mahimo amo ini ang rason kon ngaa sang Pentecostes 33 C.E., ginhatagan ni Jehova sing kahigayunan ang “diosnon nga mga Judiyo halin sa tanan nga pungsod” nga mabatian ang maayong balita sa ila “namat-an nga lenguahe,” bisan pa mahimo makahambal man sila sang komon nga lenguahe, pareho sang Hebreo ukon Griego. (Bin 2:5, 8) Sa mga lugar subong nga sarisari sing lenguahe, mahimo palareho nga lugar ang teritoryo sang mga kongregasyon nga nagahiwat sing miting sa sarisari nga lenguahe. Paano makabuligay ang mga manugbantala sa sini nga mga kongregasyon para mapanaksihan nila ang tanan, pero malikawan nga mairitar ang mga tagbalay bangod pirme ginatuptupan ang teritoryo?

• 

  Makigkomunikar (Hul 15:22): Ang mga manugtatap sang pag-alagad dapat makigkomunikar sa isa kag isa agod makahimo sila sing sistema sa pagbantala sang maayong balita. Kon gamay lang ang ila teritoryo, mahimo gusto sang kongregasyon nga nagabantala sang iban nga lenguahe nga laktawan ninyo ang mga balay sa inyo teritoryo nga nagahambal sang ila lenguahe. Pero, kon indi nila makobrehan sing regular ang ila teritoryo bangod tama ini kalapad, mahimo mas gusto nila nga tuptupan ninyo ang tanan nga balay kag ipabalo lang sa ila kon may nasapwan nga interesado. (od 93 ¶37) Ukon mahimo magpabulig sila sa inyo kongregasyon sa pagpangita sang mga nagahambal sang lenguahe sang ila kongregasyon kag ihatag ang adres sa ila. (km 7/12 5, kahon) Tandai man nga kon kaisa, indi lang isa ka lenguahe ang ginahambal sa isa ka balay. Kon nagatuptop sang teritoryo, dapat sundon ang kasuguan parte sa paggamit sang impormasyon sang mga pumuluyo.

• 

  Magkooperar (Efe 4:16): Sunda sing maayo ang instruksion sang inyo manugtatap sang pag-alagad. May ginatudluan ka bala sa Biblia nga ang gusto nga lenguahe indi lenguahe sang inyo kongregasyon? Mahimo mas madasig sia mag-uswag kon ihatag mo sia sa kongregasyon ukon grupo nga nagagamit sang gusto niya nga lenguahe.

• 

  Maghanda (Hul 15:28; 16:1): Kon ang tagbalay sa inyo teritoryo lain sing lenguahe, tinguhai nga masugid sa iya ang maayong balita. Makahanda ka paagi sa paghibalo kon ano nga mga lenguahe ang posible nga ginahambal sa inyo teritoryo kag i-download sing abanse ang mga Biblia kag mga video sa imo gadyet. Magamit mo man ang JW Language app para matun-an mo ang mga panamyaw sa pila ka lenguahe.