Kon ang Tagbalay Nagahambal sing Tuhay nga Lenguahe
1. Ngaa kinahanglan ang kooperasyon kon nagapanghikot sa teritoryo?
1 Sa bug-os nga kalibutan, masami karon makasalapo ang mga manugbantala sang Ginharian sing mga interesado nga nagahambal sing tuhay nga lenguahe. Agod mabuligan sila sa espirituwal, madamo nga sanga ang nag-organisar sang mga grupo ukon kongregasyon nga nagagamit sing tuhay nga lenguahe. Sanglit nanuhaytuhay nga lenguahe ang mahimo ginagamit sa isa ka lugar, mahimo nga kapin sa isa ka kongregasyon ang nagabantala sa amo man nga teritoryo. Paano magkooperar ang mga kongregasyon agod mapat-od nga mangin organisado ang pagbantala?—1 Cor. 14:33.
2. Kon nagapamalaybalay, paano kita magkooperar sa grupo ukon kongregasyon nga may tuhay nga lenguahe sa aton teritoryo?
2 Maayo nga Kooperasyon: Kon nagabantala sa mga kalye ukon sing di-pormal, puede mapalapitan sang manugbantala ang bisan sin-o, bisan pa yadtong nagahambal sang iban nga lenguahe, kag puede sia makatanyag sing literatura sa lenguahe nga luyag basahon sinang tawo. Apang, kon nagapamalaybalay sa teritoryo nga ginakobrehan man sang iban nga grupo ukon kongregasyon nga may tuhay nga lenguahe, ang manugbantala dapat magkonsentrar lamang sa mga puluy-an sang mga nagahambal sang lenguahe nga ginatatap sang ila kongregasyon. Kon nanuhaytuhay nga kongregasyon ang nagabantala sa amo lang nga teritoryo, importante gid ang paghupot sing maayo nga rekord. Dapat magsugilanunay ang mga manugtatap sang pag-alagad kag maghimo sing kahimusan para sa kaayuhan sang tanan. (Hulu. 11:14) Apang, kon masapwan sa pamalaybalay ang isa ka tawo nga nagahambal sing tuhay nga lenguahe kag wala sing kongregasyon nga nagahambal sinang lenguahe nga malapit sa inyo lugar, dapat panikasugan sang manugbantala nga panaksihan kag tatapon ang interes sinang tawo.
3. Ano dapat ang mangin reaksion naton kon makita naton ang mga manugbantala gikan sa iban nga kongregasyon nga tuhay sing lenguahe nga nagapanghikot sa teritoryo nga ginabantalaan man naton?
3 Pareho nga Hilikuton: Ano ang dapat himuon kon nagtabuay ang mga kauturan sang magkatuhay nga kongregasyon sa teritoryo sa amo man nga adlaw? Bisan pa magkatuhay ang ila lenguahe dapat magpangibabaw sa tunga nila ang Cristianong gugma. Kag ang tanan dapat mabalaka sa mga kinahanglanon sang mga tawo sa teritoryo. (Juan 13:34, 35) Busa, ang mga nagapanguna dapat magpakita sing pagkamakatarunganon kag gugma sa pagdesisyon kon sin-o nga grupo ang masaylo anay sa tuhay nga teritoryo.—Sant. 3:17, 18.
4. Ano nga tagna ang nagakatuman karon?
4 Gintagna sang Biblia nga ang mga tawo gikan sa nanuhaytuhay nga lenguahe makabati sing maayong balita. (Bug. 14:6, 7) Paagi sa maayo nga kooperasyon sang kada isa, malikawan ang doble nga pagtuptop sa teritoryo kag madamo nga wala pa anay mabantalaan ang mapalab-utan sing maayong balita, lakip yadtong nagahambal sing tuhay nga lenguahe.—Efe. 4:16.