Buligi ang Imo Bible Study nga Magdesisyon nga Mag-alagad kay Jehova

1-2. (a) Ngaa nagaalang-alang ang pila ka Bible study nga mag-alagad kay Jehova? (b) Ano ang binagbinagon naton sa sini nga artikulo?

NAGAALANG-ALANG ka bala sadto nga mangin isa ka Saksi ni Jehova? Posible nahadlok ka kay basi maakig sa imo ang imo mga upod sa obra, mga abyan, ukon pamilya. Ukon posible nahadlok ka nga indi mo matuman ang tanan nga ginasugo ni Jehova. Kon naeksperiensiahan mo ini, maintiendihan mo gid ang mga Bible study nga nagaalang-alang magdesisyon nga mag-alagad kay Jehova.

² Kabalo si Jesus nga puede mangin rason ini nga kahadlok para indi mag-alagad kay Jehova ang isa ka tawo. (Mat. 13:​20-22) Gani, padayon niya nga ginbuligan ang mga nagaalang-alang nga magsunod sa iya. Ginpakita niya kon paano buligan ini nga mga tawo para (1) mahibaluan nila kon ano ang nagapugong sa ila, (2) mas palanggaon pa gid nila si Jehova, (3) mabag-o nila ang ila mga prioridad, kag (4) masarangan nila ang mga pagpamatok. Paano naton mailog si Jesus samtang ginagamit naton ang libro nga Magkabuhi sing Wala Katapusan! sa pagbulig sa aton study nga magdesisyon nga mag-alagad kay Jehova?

BULIGI ANG IMO STUDY NGA MAHIBALUAN KON ANO ANG NAGAPUGONG SA IYA

3. Ngaa nag-alang-alang si Nicodemo nga mangin disipulo ni Jesus?

³ Bisan mga anom ka bulan pa lang nga nagsugod si Jesus sa iya ministeryo, kumbinsido na si Nicodemo nga si Jesus ang Mesias. (Juan 3:​1, 2) Pero bangod kilala sia nga lider sang mga Judiyo, nag-alang-alang sia nga mangin disipulo ni Jesus. Gani nagdesisyon sia nga sekreto nga makigkita kay Jesus bangod “nahadlok [sia] sa mga Judiyo.” (Juan 7:13; 12:42) Posible nahadlok sia nga madamo sia sang isakripisyo kon mangin disipulo sia ni Jesus.a

4. Paano ginbuligan ni Jesus si Nicodemo nga mahibaluan kon ano ang gusto sang Dios nga himuon niya?

⁴ Madamo sing nahibaluan si Nicodemo sa Kasuguan ni Moises, pero kinahanglan niya maintiendihan kon ano ang gusto ni Jehova nga himuon niya. Paano sia ginbuligan ni Jesus? Ginhatagan gid sia ni Jesus sing tion kay nakigkita sia kay Nicodemo bisan gab-i na. Dayon, maathag nga ginsugid ni Jesus kay Nicodemo kon ano ang dapat niya himuon para mangin disipulo niya sia: kinahanglan niya maghinulsol sa iya mga sala, magpabawtismo sa tubig, kag magtuo sa Anak sang Dios.​—Juan 3:​5, 14-21.

5. Paano naton mabuligan ang aton study nga mahibaluan kon ano ang nagapugong sa iya nga mag-alagad kay Jehova?

⁵ Bisan pa madamo sing nahibaluan sa Biblia ang aton study, posible kinahanglan niya ang bulig para mahibaluan niya kon ano ang nagapugong sa iya nga mag-alagad kay Jehova. Halimbawa, basi masako sia katama sa iya obra ukon ginapamatukan sia sang iya pamilya. Gani pareho kay Jesus, hatagi sing tion ang imo study. Puede mo sia agdahon nga mangape ukon maglagawlagaw. Sa inyo pag-istoryahanay, posible isugid niya sa imo kon ano ang iya mga kabudlayan. Palig-una ang imo study nga maghimo sang mga pagbag-o, indi para malipay ka, kundi para ipakita nga palangga niya si Jehova.

6. Paano naton mapalig-on ang aton study nga iaplikar ang iya natun-an? (1 Corinto 16:13)

⁶ Kon kumbinsido ang imo study nga buligan sia ni Jehova nga himuon ang husto, mapalig-on sia nga iaplikar ang iya natun-an. (Basaha ang 1 Corinto 16:13.) Daw pareho ka sa isa ka maestra. Sang nagaeskwela ka sadto, sin-o ang paborito mo nga maestra? Posible ang maestra nga mapinasensiahon nga nagbulig sa imo nga makita ang imo mga ikasarang. Dapat man naton ini himuon para mangin epektibo kita sa pagtudlo sang Biblia. Buot silingon, magluwas nga dapat naton tudluan ang aton study parte sa gusto ni Jehova nga himuon naton, dapat man naton sia pasaligon nga masarangan niya ini himuon bangod buligan sia ni Jehova. Paano naton ini mahimo?

BULIGI ANG IMO STUDY NGA MAS PALANGGAON PA GID SI JEHOVA

7. Paano ginbuligan ni Jesus ang mga tawo nga mas palanggaon pa gid si Jehova?

⁷ Kabalo si Jesus nga kon palangga sang iya mga disipulo si Jehova, mapalig-on sila nga iaplikar ang ila mga natun-an. Gani, pirme niya sila ginatudluan parte sa mga butang nga makabulig sa ila nga mas palanggaon pa gid ang ila Amay sa langit. Halimbawa, ginkumparar niya si Jehova sa isa ka tawo nga nagahatag sing maayo nga mga butang sa iya mga anak. (Mat. 7:​9-11) Posible nga indi mahigugmaon ang amay sang pila sa mga nagapamati kay Jesus. Gani, imadyina ang ila nabatyagan sang ginsugid sa ila ni Jesus ang isa ka ilustrasyon. Parte ini sa isa ka mahigugmaon nga amay nga nagbaton sa iya rebelyuso nga anak nga nagbalik. Paagi sa sini, ginbuligan sila ni Jesus nga mahangpan nga palangga gid sila ni Jehova.​—Luc. 15:​20-24.

8. Paano mo mabuligan ang imo study nga mas palanggaon pa gid si Jehova?

⁸ Mabuligan mo man ang imo study nga mas palanggaon pa gid si Jehova paagi sa pagsugid pirme sang Iya dalayawon nga mga kinaiya. Sa kada tion nga nagatuon kamo, buligi ang imo study nga makita kon paano ginapamatud-an sang iya mga natun-an nga palangga kita ni Jehova. Kon ginatun-an ninyo ang parte sa gawad, buligi sia nga mahangpan nga ginhimo ini ni Jehova para sa kada isa sa aton. (Roma 5:8; 1 Juan 4:10) Kon mahangpan sang imo study nga palangga gid sia ni Jehova, mapalig-on sia sini nga palanggaon man si Jehova.​—Gal. 2:20.

9. Ano ang nakabulig kay Michael nga maghimo sang mga pagbag-o sa iya kabuhi?

⁹ Binagbinaga si Michael nga taga-Indonesia. Gintudluan sia sang iya pamilya parte sa kamatuoran halin sang bata pa sia, pero wala sia nagpabawtismo. Sang nag-18 anyos sia, nagkadto sia sa iban nga pungsod para mag-obra bilang drayber sang trak. Sang ulihi, nagpauli sia sa Indonesia kag nagpangasawa sia. Pero, nag-obra sia liwat sa iban nga pungsod gani napahilayo sia sa iya pamilya. Sang ulihi, nagtuon sa Biblia ang iya asawa kag bata nga babayi, kag ginaaplikar na nila ang ila natun-an. Sang napatay ang nanay ni Michael, nagdesisyon sia nga magpauli para atipanon ang iya tatay. Dayon, nagpa-Bible study man si Michael. Sang ginbinagbinag sa iya ang “Usisaa Pa Gid” sang leksion 27 sang libro nga Magkabuhi sing Wala Katapusan!, natandog gid si Michael. Sang ginpamalandungan niya kon daw ano kasakit kay Jehova nga makita ang Iya Anak nga nagaantos, nakahibi sia. Nagapasalamat gid sia sa gawad, gani naghimo sia sang mga pagbag-o sa iya kabuhi kag nagpabawtismo sia.

BULIGI ANG IMO STUDY NGA BAG-UHON ANG IYA MGA PRIORIDAD

10. Paano ginbuligan ni Jesus ang iya mga disipulo nga bag-uhon ang ila mga prioridad? (Lucas 5:​5-11) (Tan-awa man ang piktyur.)

¹⁰ Ginbaton dayon sang mga disipulo ni Jesus nga sia ang ginpromisa nga Mesias, pero kinahanglan nila marealisar nga dapat nila himuon nga prioridad ang pagbantala. Medyo madugay na nga disipulo ni Jesus sanday Pedro kag Andres sang gin-agda sila ni Jesus nga magsunod sa iya sing bug-os tion. (Mat. 4:​18, 19) Maayo sadto ang ila negosyo sa pagpangisda upod sanday Santiago kag Juan. (Mar. 1:​16-20) Sang ‘ginbiyaan nanday Pedro kag Andres ang ila mga pukot,’ posible gid nga ginsigurado nila nga maamanan nila ang ila pamilya samtang nagasunod sila kay Jesus. Ano ang nakabulig sa ila nga bag-uhon ang ila mga prioridad? Suno kay Lucas, may ginhimo nga milagro si Jesus nga nagpabakod sa ila pagsalig nga iaman gid ni Jehova ang ila mga kinahanglanon.​—Basaha ang Lucas 5:​5-11.

11. Paano naton magamit ang aton mga eksperiensia para pabakuron ang pagtuo sang aton study?

¹¹ Indi kita pareho kay Jesus nga makahimo sang mga milagro, pero puede naton masugid ang mga eksperiensia nga nagapakita nga kon ginauna naton si Jehova, buligan gid niya kita. Halimbawa, paano ka ginbuligan ni Jehova para makatambong ka sa mga miting? Posible nga naglisensia ka sa imo boss kag ginpaathag mo sa iya nga indi ka na puede mag-obertaym sa adlaw sang miting. Samtang ginasugid mo sa imo study ang imo mga eksperiensia, ipaathag sa iya nga sang gin-una mo ang pagsimba kay Jehova sa imo kabuhi, ginbuligan ka gid Niya. Bangod sini, nagbakod pa gid ang imo pagtuo sa iya.

12. (a) Ngaa dapat kita mag-upod sang lainlain nga kauturan sa aton study? (b) Paano mo magamit ang mga video para buligan ang imo study nga unahon si Jehova? Maghatag sing halimbawa.

¹² Kon mabatian sang imo study ang mga eksperiensia sang iban nga kauturan parte sa pagbag-o sang ila mga prioridad, makabulig man ini sa ila. Gani upda ang lainlain nga kauturan sa imo Bible study. Pangabaya sila nga isugid kon paano sila nangin Saksi kag kon ano ang ila ginhimo para mauna nila sa ila kabuhi ang pag-alagad kay Jehova. Kag kon nagatuon kamo sang imo study, hatagi sing tion ang pagtan-aw sang mga video sa “Usisaa Pa Gid” ukon sa “Dugang nga Impormasyon” nga seksion sang libro nga Magkabuhi sing Wala Katapusan! Halimbawa, samtang ginabinagbinag ninyo ang leksion 37, ipadaku ang mga prinsipio nga matun-an sa video nga Si Jehova Magaaman sang Aton mga Kinahanglanon.

BULIGI ANG IMO STUDY NGA MASARANGAN ANG MGA PAGPAMATOK

13. Paano ginbuligan ni Jesus ang iya mga disipulo nga masarangan ang mga pagpamatok?

¹³ Sulitsulit nga ginsilingan ni Jesus ang iya mga disipulo nga pamatukan sila sang iban, bisan sang ila mga paryente. (Mat. 5:11; 10:​22, 36) Sang lapit na lang matapos ang pagministeryo ni Jesus, ginpaandaman niya sila nga posible sila patyon. (Mat. 24:9; Juan 15:20; 16:2) Gani, ginpalig-on niya sila nga maghalong sa ila pagministeryo. Halimbawa, ginlaygayan niya sila nga indi magbais sa mga nagapamatok sa ila kag dapat sila maghalong para makapadayon sila sa ila pagbantala.

14. Paano naton mabuligan ang aton study nga masarangan ang mga pagpamatok? (2 Timoteo 3:12)

¹⁴ Kon ipaathag naton sa aton study ang posible ihambal ukon himuon sang iya mga upod sa obra, mga abyan, kag mga paryente, mabuligan naton sia nga masarangan ang mga pagpamatok. (Basaha ang 2 Timoteo 3:12.) Posible nga may mga upod sia sa obra nga magahikay sa iya bangod ginasunod niya ang Biblia. Kag posible nga pakalainon sang iban, bisan sang iya mga paryente, ang iya mga natun-an sa Biblia. Kon binagbinagon naton dayon sa iya ang parte sa pagpamatok, ginabuligan naton sia nga masarangan ini.

15. Ano ang makabulig sa imo study nga masarangan ang pagpamatok sang pamilya?

¹⁵ Kon ginapamatukan ang imo study sang iya pamilya, buligi sia nga mahangpan ang posible nga mga rason kon ngaa naakig sila. Posible nga abi nila kabutigan ang ginatudlo sang mga Saksi ukon malain nga tawo ang mga Saksi. Sa bahin ni Jesus, wala man nalipay ang pila ka miembro sang iya pamilya sa iya pag-alagad. (Mar. 3:21; Juan 7:5) Gani tudlui ang imo study nga mangin mapinasensiahon kag matinahuron kon nagaistorya sia sa iban, pati na sa mga miembro sang iya pamilya.

16. Paano naton mabuligan ang aton study nga mangin matinahuron sa pagsugid sang iya mga natun-an?

¹⁶ Kon daw interesado sa kamatuoran ang mga paryente sang imo study kag pamangkuton nila sia, mas maayo kon indi niya pag-ipaathag dayon sa ila ang tama kadamo nga impormasyon parte sa Biblia. Kay man, posible matak-an ang iya mga paryente kag indi na sila mag-istorya sa iya parte sa Biblia. Gani palig-unon naton ang aton study nga isugid niya ang iya mga natun-an sing malip-ot lang anay. Paagi sa sini, posible manamian ang iya mga paryente nga mamati liwat sa iya sa sunod nga tion. (Col. 4:6) Puede niya sila silingan nga tan-awon ang aton website nga jw.org. Paagi sa sini, puede nila mahibaluan ang parte sa mga Saksi ni Jehova sa tion nga gusto nila.

17. Paano naton mabuligan ang aton study sa pagsabat sa posible ipamangkot sa iya parte sa mga Saksi ni Jehova? (Tan-awa man ang piktyur.)

¹⁷ Para buligan ang aton study sa paghanda sang simple nga sabat sa posible ipamangkot sa iya sang iya mga paryente ukon upod sa obra, puede naton gamiton ang seksion sa jw.org nga “Mga Pirme Ginapamangkot.” (2 Tim. 2:​24, 25) Indi man naton pagkalimtan nga binagbinagon ang seksion nga “Kon Magsiling ang Iban” sa libro nga Magkabuhi sing Wala Katapusan! Palig-unon naton sia nga praktison ang iya sabat. Dayon buligi sia nga mapanami pa gid ang iya sabat. Kon praktison ninyo ini, mas may kompiansa sia nga ipaathag sa iban ang iya mga ginapatihan.

18. Paano naton mapalig-on ang aton study nga mangin indi bawtismado nga manugbantala? (Mateo 10:27)

¹⁸ Ginsugo ni Jesus ang iya mga disipulo nga ibantala ang maayong balita sa mga tawo. (Basaha ang Mateo 10:27.) Kon buligan naton dayon ang aton study nga mangin isa ka indi bawtismado nga manugbantala, matun-an niya dayon nga magsalig kay Jehova. Paano naton sia mapalig-on nga mangin indi bawtismado nga manugbantala? Kon ginpahibalo sa kongregasyon nga may ara espesyal nga kampanya sa pagbantala, buligan naton sia nga binagbinagon kon paano sia makapakigbahin sa sini. Ipaathag sa iya nga mas mahapos magbantala sa tion sang sini nga mga kampanya. Palig-una man sia nga panikasugan nga mangin kalipikado nga hatagan sang bahin sa midweek miting. Hanason sia sa sini kon paano ipaathag sing maayo ang iya mga ginapatihan.

IPAKITA SA IMO STUDY NGA MAY SALIG KA SA IYA

19. Paano ginpakita ni Jesus nga may salig sia sa iya mga disipulo, kag paano naton sia mailog?

¹⁹ Antes napatay kag nagpalangit si Jesus, ginsilingan niya ang iya mga disipulo nga magaabot ang tion nga makaupod nila sia liwat. Wala nila sadto nahangpan nga ang ginapatuhuyan ni Jesus amo ang tion nga mapalangit sila. Bisan pa sini, nagpokus si Jesus sa ila pagkamainunungon, indi sa ila wala nahangpan. (Juan 14:​1-5, 8) Kabalo sia nga kinahanglan ang tion para mahangpan nila ang pila ka butang, pareho sang ila paglaum nga magkabuhi sa langit. (Juan 16:12) Pareho kay Jesus, mapakita naton sa aton study nga may salig kita sa iya nga gusto niya himuon ang makapalipay kay Jehova.

20. Paano ginpakita sang isa ka sister sa Malawi nga may salig sia sa iya study?

²⁰ Dapat naton ipakita sa aton study nga may salig kita sa iya nga gusto niya himuon ang husto. Binagbinaga ang isa ka sister nga si Chifundo nga taga-Malawi. May Bible study sia nga si Alinafe nga isa ka Katoliko. Sang lapit na nila matapos ang leksion 14 sang libro nga Magkabuhi sing Wala Katapusan!, ginpamangkot ni Chifundo ang iya study parte sa paggamit sang mga santos. Naakig si Alinafe kag nagsiling sia, “Pagusto lang ko ‘ya kon magamit ko santos ukon indi!” Abi sadto ni Chifundo mauntat na sa pagtuon si Alinafe. Pero nangin mapinasensiahon si Chifundo kag nagpadayon sila sa pagtuon. Wala sia nadulaan sang paglaum nga mahangpan gid sa ulihi ni Alinafe nga sala ang paggamit sang mga santos. Pagligad sang pila ka bulan, ginpamangkot sa iya ni Chifundo ang pamangkot sa leksion 34: “Ano na ang nabenepisyo mo sang nagtuon ka sa Biblia kag sa matuod nga Dios nga si Jehova?” Amo ini ang ginsiling ni Chifundo nga sabat ni Alinafe: “Madamo sia sing ginsambit nga manami nga mga punto. Nanamian kuno sia sa mga Saksi kay wala kita nagahimo sang mga butang nga ginasiling sang Biblia nga sala.” Wala madugay pagkatapos sini, wala na naggamit si Alinafe sang mga santos kag nagpabawtismo sia.

21. Paano naton mapalig-on ang aton study nga magdesisyon nga magpabawtismo?

²¹ Bisan pa nga si Jehova ang “nagapatubo,” may mahimo kita para padayon nga mag-uswag ang aton study sa iya pagtuon. (1 Cor. 3:7) Magluwas nga dapat naton sia tudluan parte sa gusto ni Jehova nga himuon niya, may dapat pa gid kita himuon. Buligan naton sia nga mas palanggaon pa gid si Jehova. Palig-unon man naton sia nga bag-uhon niya ang iya mga prioridad para mapakita niya nga palangga niya si Jehova. Kag tudluan naton sia nga magsalig kay Jehova kon pamatukan sia. Kon ginapakita naton nga may salig kita sa iya, ginabuligan naton sia nga marealisar nga masarangan man niya ang mga ginapahimo ni Jehova kag magaalagad sia sa iya.