Ano ang Ginasiling sang Biblia Parte sa Kaakig?

Ang sabat sang Biblia

Ang Biblia nagatudlo nga ang indi makontrol nga kaakig makahalit sa isa nga nagapangakig kag sa mga tawo sa iya palibot. (Hulubaton 29:22) Bisan pa may mga tion nga nagakaigo nga magpangakig, ang Biblia nagasiling nga ang mga nagapadayon sa “pagsilabo sang kaakig” indi makabaton sang kaluwasan. (Galacia 5:19-21) Ang Biblia may mga prinsipio nga makabulig sa isa nga makontrol ang iya kaakig.

Sala gid bala nga magpangakig?

Indi. May mga tion nga nagakaigo nga magpangakig. Halimbawa, ang matutom nga si Nehemias “naakig gid” sang nabal-an niya nga ginapigos ang iya mga masigkasumilimba.—Nehemias 5:6.

May mga tion man nga naakig ang Dios. Halimbawa, sang wala gintuman sang iya katawhan sadto ang ila kasugtanan nga sia lang ang ila simbahon kag nagsimba sila sa butig nga mga dios, “naakig gid si Jehova” sa ila. (Hukom 2:13, 14) Bisan pa amo sini, wala ini nagapakita nga maakigon si Jehova nga Dios. Ang iya kaakig pirme nagakaigo kag kontrolado.—Exodo 34:6; Isaias 48:9.

Paano mangin sala ang pagpangakig?

Sala ang pagpangakig kon indi ini makontrol kag kon wala ini sing basihan. Ini nga klase sang kaakig amo pirme ang ginapakita sang indi perpekto nga mga tawo. Halimbawa:

Si Cain “naakig gid” kay wala ginbaton sang Dios ang iya halad. Wala nakontrol ni Cain ang iya kaakig amo nga ginpatay niya ang iya utod.—Genesis 4:3-8.
Ang propeta nga si Jonas “naakig gid” sang ginkaluuyan sang Dios ang mga taga-Ninive. Gintadlong sang Dios si Jonas, kag ginpakita sa iya nga indi ‘husto nga maakig gid sia’ kag dapat sia maluoy sa mahinulsulon nga mga nakasala.—Jonas 3:10–4:1, 4, 11.a

Ini nga mga halimbawa nagapakita nga para sa indi perpekto nga mga tawo, “ang kaakig sang tawo wala nagaresulta sa paghimo sing matarong sa panulok sang Dios.”—Santiago 1:20.

Paano mo makontrol ang imo kaakig?

Hibalua ang mangin resulta sang indi makontrol nga kaakig. Mahimo para sa iban, ang pagpangakig nagapakita nga maisog sila. Ang matuod, ang isa nga indi makakontrol sang iya kaakig may kaluyahon. “Ang tawo nga wala sing pagpugong sa iya kaakig, daw kaangay sang siudad nga narumpag ang pader.” (Hulubaton 25:28; 29:11) Sa baylo, kon panikasugan naton nga kontrolon ang aton kaakig, ginapakita naton ang matuod nga kaisog kag kaalam. (Hulubaton 14:29) Ang Biblia nagasiling: “Ang tawo nga indi dali maakig mas maayo sangsa makusog nga tawo.”—Hulubaton 16:32.
Kontrola ang imo kaakig antes ka pa makahimo sing butang nga hinulsulan mo. Ang Salmo 37:8 nagasiling: “Isikway ang kaakig kag bayai ang kasingkal, indi ka magkaakig kag maghimo sing malaut.” Talupangda nga may ara kita sing pililian kon akig kita—puede naton ini kontrolon antes pa kita “maghimo sing malaut.” Ang Efeso 4:26 nagasiling man: “Kon mangakig kamo, indi kamo magpakasala.”
Kon posible, maghalin ka na kon nagabatyag ka na sing kaakig. “Ang pagsugod sang away kaangay sa pagbukas sang buhangan,” siling sang Biblia. “Gani antes magsugod ang baisay, maghalin ka na.” (Hulubaton 17:14) Bisan pa maalamon nga solbaron dayon ang indi pag-intiendihanay sa iban, mas maayo kon patahawon ninyo anay ang inyo kaakig antes ninyo istoryahan ang problema.
Hibalua ang mga detalye. “Ang paghangop sang tawo nagapahaganhagan sang iya kaakig,” siling sang Hulubaton 19:11. Maalamon kita kon hibaluon naton anay ang tanan nga detalye antes kita maghimo sing konklusion. Kon pamatian naton sing maayo ang tanan nga detalye, malikawan naton nga maakig.—Santiago 1:19.
Mangamuyo nga hatagan ka sing kalinong sa hunahuna. Ang pangamuyo makabulig sa imo nga maeksperiensiahan “ang paghidait sang Dios nga labaw sa tanan nga paghangop.” (Filipos 4:7) Ang pangamuyo isa sa panguna nga paagi nga mabaton naton ang balaan nga espiritu sang Dios, nga makabulig sa aton nga mapakita ang mga kinaiya pareho sang paghidait, pagkamapinasensiahon, kag pagpugong sa kaugalingon.—Lucas 11:13; Galacia 5:22, 23.
Pilia sang maayo ang imo kaupdanan. May tendensia kita nga sundon ang mga batasan sang aton kaupdanan. (Hulubaton 13:20; 1 Corinto 15:33) Gani, ang Biblia nagapaandam: “Indi ka makig-upod sa tawo nga madali maakig, kag indi ka makig-angot sa tawo nga maakigon.” Ngaa? “Agod indi ka mangin pareho sa iya kag masiod mo ang imo kaugalingon.”—Hulubaton 22:24, 25.

Mga teksto sa Biblia parte sa kaakig

Hulubaton 16:32: “Ang tawo nga indi dali maakig mas maayo sangsa makusog nga tawo.”

Buot silingon: Mabakod ka kon makontrol mo ang imo kaakig.

Hulubaton 17:14: “Ang pagsugod sang away kaangay sa pagbukas sang buhangan; gani antes magsugod ang baisay, maghalin ka na.”

Buot silingon: Kon indi na makontrol ang kaakig, maghalin ka na.

Hulubaton 19:11: “Ang paghangop sang tawo nagapahaganhagan sang iya kaakig.”

Buot silingon: Malikawan naton ang indi nagakaigo nga pagpangakig kon hibaluon anay naton ang tanan nga detalye antes maghimo sing konklusion.

Hulubaton 22:24, 25: “Indi ka makig-upod sa tawo nga madali maakig, kag indi ka makig-angot sa tawo nga maakigon, agod indi ka mangin pareho sa iya.”

Buot silingon: Kon makig-upod kita sa mga tawo nga dali maakig, mahimo nga mangin pareho kita sa ila.

Hulubaton 29:11: “Ang buangbuang wala nagapugong sang iya balatyagon.”

Buot silingon: Maalamon kita kon kontrolon naton ang aton emosyon sangsa ini ang magakontrol sa aton.

Galacia 5:22, 23: “Ang mga kinaiya nga ginapatubas sang espiritu amo ang gugma, kalipay, paghidait, pagkamapinasensiahon, maayo nga kabubut-on, kaayo, pagtuo, kalulo, kag pagpugong sa kaugalingon.”

Buot silingon: Ang balaan nga espiritu sang Dios, ukon ang iya gahom, makabulig sa aton nga mapakita ang mga kinaiya nga mabatuan ang kaakig.

Efeso 4:26: “Kon mangakig kamo, indi kamo magpakasala.”

Buot silingon: Indi naton pirme malikawan nga magpangakig, pero makontrol naton ini.

Santiago 1:19: “Ang tagsa ka tawo dapat mangin maabtik sa pagpamati, mahinay sa paghambal, indi dali maakig.”

Buot silingon: Mapahaganhagan naton ang aton kaakig kon maayo kita nga manugpamati.

a Ginapakita nga ginbaton ni Jonas ang pagtadlong sa iya kag wala na naakig, kay gingamit sia sang Dios sa pagsulat sang isa ka libro sa Biblia nga ginsunod sa iya ngalan.