Si Jehova ang Aton Manunuga
1 Minilyon ka tawo ang nagapati nga gintuga sang Dios ang kabuhi. Ang madamo pa nagapati sa ebolusyon. Nian may mga tawo nga indi sigurado kon ano ang patihan. Ang libro nga Life How Did lt Get Here? By Evolution or by Creation? para sa amo sina tanan nga tawo. Ining publikasyon nagahatag sang napanalawsaw sing maid-id nga paathag kon paano nagluntad diri ang kabuhi kag kon ano ang kahulugan sini para sa aton palaabuton. Sa Hunyo, itanyag naton ining matahom nga libro.
2 Ginkilala bisan sang kilala nga mga tawo sa sientipikong komunidad ang pinasahi nga pangatarungan sang libro. Ang isa ka mananalawsaw sa siensia sa Netherlands nagsulat: “Ining libro nagalabaw gid sa tanan nga mga pagpaabot. Ang makusog nga pangatarungan sang mga kapitulo kag mga ilustrasyon mga binag-o gid sing Sientipiko nga mahimo ikaw mangin bulag sa pagbangon sing bisan anong mga pagpamatok sa sini.” Ang isa ka abogado nagpahayag: “Ginbasa ko ini sing apat ka beses kag dayaw gihapon ako sa kadalumon sang pagtuon, kaalam, kag dokumentasyon nga gingamit sa paghimo sini.” Gani makasalig kita nga apresyahon sang iban pa ining libro.
3 Mahimo mo pilion ang isa ka malip-ot nga presentasyon kaangay sini:
◼ Buksi ang pahina 6, kag magsiling: “Madamong tawo ang nagahunahuna nga ang aton matahom nga duta kag ang kabuhi sa sini resulta sang isa ka aksidente. Ano ang ginakabig mo nga isa ka makatarunganon nga paathag sa kon paano ini tanan nagluntad? [Pasabta sia.] Madamong ebidensia ang nagapamatuod sa rekord sang Biblia tuhoy sa isa ka Manunuga nga indi lamang tuman ka gamhanan kundi nagahigugma man sa aton sing daku. Matuod sia nga Dios, kag ang iya ngalan amo si Jehova.” Basaha ang Salmo 83:18, kag ipaathag sa malip-ot kon paano nga katuyuan niya nga himuon ang bug-os nga duta nga isa ka paraiso.
4 Kon luyag mo magdirekta dayon sa punto, mahimo ka makasiling:
◼ “Napaligban mo na bala ining pamangkot?” Ipakita ang titulo, buksi ang pahina 7, basaha ang mga pamangkot sa parapo 2, kag ipaathag nga ang libro nagaaman sing makaalayaw nga mga sabat gikan sa Biblia.
◼ “Ukon mahimo mo tilawan ini:
◼ “Napaligban mo na bala kon paano nagluntad ang duta? Madamo ang nagainsister nga resulta ini sang daku kaayo nga paglupok sa kahawaan. Ano sa banta mo? [Pasabta sia.] Ang Biblia nagatudlo nga gintuga sang Dios ang duta subong aton walay katapusan nga puluy-an. Tuhay ini gikan sa iban nga mga planeta sa aton solar nga sistema. Sa aton nahibaluan, amo lamang ini ang planeta sa uniberso nga may tanan nga masibod nga mga aman nga ginakinahanglan sa pagsakdag sang kabuhi.” Buksi ang parapo 5 sa pahina 130, kag ipaathag kon ngaa ang duta isa gid ka binuhatan sang Batid nga Desinyador.
6 Ang isa pa ka pagpalapit mahimo nga kaanggid sa sini:
◼ “Ang iban nga mga tawo nagahunahuna nga nagtuhaw kita gikan sa ‘mga tawo nga amo.’ Nagasiling sila nga ang hitsura sang aton mga katigulangan kaangay sini. [Ipakita ang laragway sa pahina 89.] Ano ang panghunahuna mo tuhoy sina?” Pasabta sia. Ipakita kon ano ang ginasiling sang parapo 20, kag nian basaha ang Binuhatan 4:24, nga nagapakilala kay Jehova subong ang aton Manunuga kag Manughatag sing Kabuhi. “Ginausisa sini nga libro ang bug-os nga teoriya sang ebolusyon may kaangtanan sa kon ano ang ginasiling sang Biblia.” Patuhuyi ang mga kaundan sa pahina 5, kag ipakita ang pila ka titulo, subong sadtong para sa kapitulo 1, 7, 15, kag 19.
7 Ining libro mahimo mangin isa ka pagpakamaayo sa sinsero nga mga tawo nga madugay na ginlimbungan sang mga wala nagatuo kay Jehova ukon sa iya Pulong. Ang matuod nga impormasyon nga ginaunod sang Creation nga libro magabulig sa ila nga makilala sing maayo ang aton Manunuga, nga nagaulikid sing mahigugmaon sa aton.