Ang Kampanya nga May Resulta

Tatlo ka semana antes sang kombension, ang mga kongregasyon may kampanya liwat sa pagpang-imbitar sa mga interesado sa teritoryo nga magtambong. May resulta bala ang aton kampanya bisan pa ang mga interesado magabiyahe sing malayo para magtambong sa kombension?

Pagkatapos sang distrito nga kombension sining karon lang, isa ka sanga talatapan ang nakabaton sing sulat halin sa babayi nga nakasapo sang imbitasyon sa ila puertahan. Masami sia nagapanago kon manuktok ang mga Saksi ni Jehova. Sia nagsulat: “Matahom ang amon balay, mabuot ang akon bana, kag daw wala na ako sing kinahanglan pa agod mangin malipayon. Pero indi gihapon ako malipayon, kag wala sing katuyuan ang akon kabuhi. Gani nagdesisyon ako nga magbiyahe sing 320 kilometros para magtambong sa programa sa Sabado.” Nanamian sia sa programa amo nga gintawgan niya ang iya bana para ipahibalo nga indi sia makapauli kay matambong pa sia sa Domingo. “Ginpamatian ko ang tanan nga pamulongpulong, madamo nga Saksi ni Jehova ang nakilala ko, kag gusto ko nga indi tani ini matapos.” Pagpauli niya, nagtuon sia kag pagligad sang apat ka bulan nangin di-bawtismado sia nga manugbantala. “Nalipay gid ako nga nasapwan ko ang imbitasyon sa amon puertahan bangod sa karon may katuyuan na ang akon kabuhi!”

Ang pila nga makabaton sang imbitasyon magatambong. Gani, mangin makugi sa sining importante nga kampanya. Dalha ang tanan nga nabilin nga imbitasyon sa kombension, kag gamita ini sa di-pormal nga pagpanaksi.

[Retrato sa pahina 5]

Paano Itanyag ang Imbitasyon?

Mahimo kita magsiling: “Ginapanagtag namon ining imbitasyon sa bilog nga kalibutan. Ari ang imo kopya. Makita mo ang dugang pa nga detalye dira sa imbitasyon.” Mangin mapagsik. Kon nagapanghatag sini sa Sabado ukon Domingo, dapat man naton itanyag ang mga magasin kon nagakaigo.