4 Kev Zam Txim

YOG LI CAS?

Kev zam txim puas yog yus ua txuj coj li nws tsis tau ua txhaum rau yus li? Tsis yog. Yog koj zam txim rau koj tus txij nkawm ces koj yuav tsis cib nyeej, thiab koj tsis niaj hnub ntsw nws qhov txhaum.

VAJLUGKUB TEJ HAUV PAUS NTSIAB LUS: “Ib leeg ua siab ntev rau ib leeg thiab yog leejtwg muaj xaiv muaj lus ib leeg kuj zam ib leeg.”​—Khaulauxi 3:13.

Loob tau hais tias: “Thaum koj hlub ib tug twg, koj tsis tsom nws qhov txhaum tiamsis koj tsom qhov zoo uas nws xav ua xwb.”

VIM LI CAS TSIM NYOG UA?

Kev cib nyeej yuav ua mob rau koj thiab ua rau koj yimhuab tu siab, nyuaj siab ntxiv xwb, tseem rhuav tau koj lub neej thiab.

Kab Lia tau hais tias: “Muaj ib zaug kuv tus txiv ua rau kuv tu siab heev. Nws thov txim los nyuaj kawg li rau kuv zam. Ib ntus tom qab kuv mam li zam tau rau nws. Ua cas kuv yuav khuvxim qhov uas kuv tu siab ntev ua luaj. Qhov uas kuv chim ntev li ntawd ua rau wb ob niam txiv lwj siab ntsuav.”

KOJ YUAV UA LI CAS?

TSHUAJ KOJ TUS KHEEJ

Lwm zaus koj tus txij nkawm ua rau koj tu siab, xav li no:

• Puas yog kuv maj tu siab dhau lawm?

• Nws qhov txhaum loj npaum li cas? Puas tsim nyog nws los thov txim ntawm kuv? Los kuv cia li ua twjywm zam rau nws xwb?

NROG KOJ TUS TXIJ NKAWM THAM

• Yog wb sib ceg, wb sib zam sai npaum li cas?

• Yuav ua li cas wb thiaj sib zam sai dua?

KEV PAB

• Thaum koj tus txij nkawm ua rau koj tu siab, txhob maj xav tias yog nws txhob txwm ua.

• Nrhiav kev zam koj tus txij nkawm, txhob maj liam. Nco ntsoov tias “peb txhua tus ua yuam kev.”​—Yakaunpau 3:2.

Kheenpawli (Kimberly) yog ib tug niam tsev uas hais tias: “Yog tim ob leeg ces yoojyim sib zam. Tiamsis yog tim ib leeg xwb yuav nyuaj zam dua. Ob leeg yuav tsum txo hwjchim kawg kiag, thiaj zoo siab thov txim thiab zam txim.”

VAJLUGKUB TEJ HAUV PAUS NTSIAB LUS: “Kav tsij nrog nws hais kom haum.”​—Mas Tais (Mathai) 5:25, NN.