Ua Siab Ntev

Yexus Coj Li Cas?

YEEB YAJ KIAB: Yexus Ua Siab Ntev Pab Nws Tus Kwv

1. Saib zaj YEEB YAJ KIAB, los sis nyeem Yauhas 7:3-5 thiab 1 Kauleethaus 15:3, 4, 7. Tom qab ntawd, tham txog ob lo lus no:

1. Thaum xub thawj, Yexus cov kwv puas txais yuav txoj xov zoo uas Yexus tshaj tawm?

2. Yexus puas tag kev cia siab rau Yakaunpaus?

Peb Kawm Tau Li Cas Los Ntawm Yexus?

2. Peb yuav tau ua siab ntev rau qhov ntev loo ib txhia mam los txais txoj xov zoo.

Xyaum Yexus

3. Siv tej tswv yim tshiab. Yog muaj tej tug tsis xav kawm Vajlugkub tam sid los txhob yuam nws. Yog zoo sij hawm, tso ib zaj yeeb yaj kiab los sis muab ib phau ntawv ntsig txog peb txoj kev kawm Vajlugkub rau nws saib. Yog peb ua li no, nws yuav pom tias kev kawm Vajlugkub zoo li cas, thiab yuav pab tau nws li cas.

4. Txhob muab ib tug piv rau ib tug. Nyias muaj nyias cwj pwm. Yog koj ib tug txheeb ze los sis ib tug uas koj rov mus xyuas tsis tshua xav kawm Vajlugkub los sis tsis kam txais yuav tej uas phau Vajlugkub qhia, koj yuav tau ua tib zoo xav seb yog tim li cas. Xav seb, puas yog tej kev lig kev cai khuam cheem nws? Puas yog nws tsev neeg los sis tej neeg zej zog tawm tsam nws? Ua siab ntev pub sij hawm rau nws xav txog tej uas koj qhia, xwv nws thiaj pom tias phau Vajlugkub yeej pab tau nws tiag.

5. Thov Vajtswv tsi ntsees txog nws. Thov Yehauvas pab kom koj ua neeg thoob tsib thiab tsis txhob tag kev cia siab. Thiab thov Vajtswv pab koj paub ntsuas seb tus neeg ntawd puas muaj siab kawm tiag, seb yuav tso tseg los yuav rov mus ntxiv.​—1 Kauleethaus 9:26.