Lub 9 Hlis

Vajtswv muab hwj chim rau Yexus kho noob neej tej teeb meem. Tej txuj ci uas Yexus ua qhia tau tias nws muaj hwj chim kho tau txhua yam uas peb ua tsis tau. Xws li nws muaj hwj chim kho tau kev txaug kev txhaum, kev mob kev nkeeg, thiab kev ploj kev tuag. (Mathais 9:1-6; Loos 5:12, 18, 19) Tej txuj ci nws tau ua qhia tau tias nws yeej kho tau “txhua yam kab mob kev nkeeg” thiab tsa tau cov tuag sawv rov los. (Mathais 4:23; Yauhas 11:43, 44) Tsis tas li ntawd, nws muaj hwj chim tswj tau cua daj cua dub thiab ntiab tau dab tawm. (Malakaus 4:37-39; Lukas 8:2) Yehauvas muab lub hwj chim loj kawg nkaus li rau Yexus tuav! Peb tos rawv txhua yam zoo uas yuav muaj tshwm sim thaum Vajtswv lub Nceeg Vaj kav. Tej txuj ci uas Yexus ua thaum nws tseem nyob hauv ntiaj teb qhia tias thaum nws ua Vaj Ntxwv kav Vajtswv lub Nceeg Vaj yav tom ntej, nws yuav ua li ntawd thoob plaws lub ntiaj teb no. w23.04 3 ¶5-7

Yog tias koj nyob hauv ib lub lub koom txoos loj loj thiab thaum koj tsa tes tus coj hu tsis txog koj, tej zaum yuav ua rau koj tsis kam tsa tes teb lawm. Tiam sis tsis txhob tag kev cia siab. Npaj lus teb kom ntau li ntau tau ua ntej txhua txoj kev sib txoos. Yog tus coj hu tsis txog koj thaum thawj los tom qab tej zaum nws kuj yuav hu txog koj. Thaum koj npaj rau Phau Tsom Faj, ua tib zoo xav seb txhua nqe hais dhos rau lub ntsiab loj li cas rau li cas. Yog koj ua yam li no ces koj yuav paub teb rau zaj kawm ntawd. Txuas ntxiv ntawd, npaj kom zoo zoo xwv koj thiaj paub teb rau cov nqe uas muaj ntsis cov, vim sawv daws tsis tshua kam teb rau cov nqe ntawd. Yog tias koj ua raws li hais no lawm los haj tseem hu tsis txog koj ces mus cuag tus coj ua ntej kev sib txoos tias koj xav teb nqe twg rau nqe twg. w23.04 21-22 ¶9-10

Qhov uas Yauxej ua siab sib sib thiab mloog Yehauvas lus pab tau nws ua ib tug txiv tsev zoo heev. Muaj peb zaug Vajtswv hais rau nws kom pab nws tsev neeg. Txhua zaus nws yeej mloog tab txawm tsis yooj yim rau nws ua. (Mathais 1:20; 2:13-15, 19-21) Vim Yauxej mloog Yehauvas lus, Yauxej thiaj tiv thaiv, txhawb, thiab saib xyuas tau Maivliag. Qhov uas Yauxej ua li no tej zaum ua rau Maivliag yim huab hlub thiab saib taus nws. Cov txiv tsev yeej xyaum tau Yauxej es saib seb tej lus hauv phau Vajlugkub pab tau lawv lub cuab lub yig li cas rau li cas. Yog koj mloog cov lus no es hloov koj lub neej ces qhia tias koj hlub koj tus poj niam thiab yuav kho tau neb txoj kev txij nkawm. Muaj ib tug muam nyob teb chaws Vanuatu sib yuav tshaj li 20 lub xyoos lawm tau hais tias: “Thaum kuv tus txiv ua raws li Yehauvas tej lus qhia, kuv hwm nws heev dua. Kuv tsis txhawj thiab kuv tso siab tias nws yuav txiav txim rau qhov zoo.” w23.05 21 ¶5

Cov Yudais uas rov qab los ntawm Npanpiloos yuav yog ib “haiv neeg uas dawb huv” rau Vajtswv. (Kev Cai 7:6) Qhov no tsis tau hais tias lawv yuav tsis tau hloov lawv lub neej kom haum Yehauvas siab. Cov Yudais uas yug hauv lub nroog Npanpiloos thiab lwm cov Yudais twb swm tej kev coj noj coj ua nyob rau hauv lub nroog Npanpiloos tag lawm. Tau ntau ntau xyoo tom qab cov Yudais los rau hauv teb chaws Ixayees, tus Tswv Xeev Nehemis ntseeg tsis taus li tias cov me nyuam uas yug hauv teb chaws Ixayees twb tsis paub cov Yudais tej lus. (Kev Cai 6:6, 7; Nehemis 13:23, 24) Cov me nyuam no yuav ua cas paub hlub thiab teev tiam Yehauvas yog tias lawv twb tsis paub thiab tsis to taub lus Henplais? Lawv yuav ua li cas nkag siab Vajtswv Txoj Lus ua lus Henplais? (Exalas 10:3, 44) Yog li ntawd, cov Yudais no yuav tau hloov ntau yam tiam sis yuav yooj yim dua rau lawv hloov vim lawv nyob rau teb chaws Ixayees uas tseem tab tom txhim kho txoj kev pe hawm Yehauvas dua tshiab.​—Nehemis 8:8, 9. w23.05 15 ¶6-7

Txawm peb muaj siab thiab tswj peb tus kheej npaum li cas los muaj qee zaug muaj ub muaj no los cuam tshuam. Xws li peb tsis paub hais tias yuav muaj xwm txheej thaum twg los raug peb. (Laj Lim Tswv Yim 9:12) Peb kuj ntsib kev nyuaj siab ntxhov plawv ua rau peb qaug zog thiab tsis muaj siab ua dab tsi. (Paj Lug 24:10) Vim peb yog noob txaug neeg txhaum, tej thaum peb yuav ua tsis tau txhua yam zoo ces haj tseem yuav ua rau peb ncav tsis cuag peb lub hom phiaj. (Loos 7:23) Los sis tej thaum peb nkees nkees. (Mathais 26:43) Puas muaj dab tsi pab tau peb rau tej ntwb ntu zoo li no? Nco ntsoov tias thaum muaj dab tsi cuam tshuam tsis yog peb ua tsis tau. Nyob hauv phau Vajlugkub hais tias peb yeej yuav ntsib ntau yam teeb meem thiab kev nyuaj siab. Tsis tas li ntawd, kuj hais ntxiv tias txawm peb ntog lawm los peb yeej sawv tau rov qab los. Qhov uas peb rau siab ntso ua kom tau raws li peb lub hom phiaj tab txawm muaj ub muaj no cuam tshuam qhia tias peb xav ua haum Yehauvas siab. Ntshe Yehauvas zoo siab heev thaum nws pom koj haj tseem kub siab lug ua raws li koj lub hom phiaj! w23.05 30 ¶14-15

Tes hauj lwm tho kev yeej pab tau ib tug tub hluas paub ua hauj lwm nrog txhua hom tib neeg thiab kuj pab tau nws txawj txuag nyiaj. (Filipis 4:11-13) Yog nws ua ib tug pab tho kev ua ntej ces yuav pab tau nws ua ib tug tho kev. Thaum nws ua ib tug tho kev lawd, ces yuav qhib kev rau nws mus ua ntau yam hauj lwm puv ntoob, xws li mus ua ib tug tub ua vaj ua tsev los sis mus Npe-ees. Cov txiv neej Khixatias yuav tsum muaj hom phiaj ua txwj laus los pab cov kwv tij nkauj muam. Phau Vajlugkub hais tias cov txiv neej uas xav ua txwj laus yog ‘xav ua tes hauj lwm uas zoo kawg nkaus.’ (1 Timautes 3:1) Ib tug kwv tij yuav tau ua ib tug tub leg num ua ntej. Cov tub leg num pab cov txwj laus ua ntau yam hauj lwm hauv lub koom txoos. Cov txwj laus thiab cov tub leg num yeej ua siab mos siab muag pab cov kwv tij nkauj muam thiab yeej kub siab lug mus tshaj tawm txoj xov zoo. w23.12 28 ¶14-16

Thaum Yauxiyas muaj 16 xyoo, nws xav kawm txog Yehauvas thiab xav ua kom tau raws li Yehauvas lub siab nyiam. Nyob rau ncua sij hawm ntawd, tib neeg feem coob mus pe tej pej kum dab. Yog li ntawd, Yauxiyas yuav tau ua lub siab loj siab tawv txwv tsis pub kom lawv ua li ntawd. Ua ntej Yauxiyas muaj 20 xyoo, nws muab tej kev pe dab qhuas tshem tawm tag nrho hauv lawv lub teb chaws lawm. (2 Vaj Keeb Kwm 34:1, 2) Txawm koj haj tseem hluas los koj yeej yoog tau Yauxiyas tus yam ntxwv es kawm kom paub Yehauvas thiab nws tej yeeb yam qhuas lug. Yog koj ua li no ces koj yuav xav muab koj lub neej cob rau nws. Qhov uas koj muab koj lub neej cob li no yuav pab tau koj li cas? Muaj ib tug kwv tij hluas npe hu ua Luj (Luke) muaj li 14 xyoos thaum nws ua kev cai raus dej hais tias, “Txij hnub no lawm yav tom ntej kuv yuav muab qhov teev tiam Yehauvas ua thawj yam hauv kuv lub neej thiab kuv tsuas yuav ua kom nws zoo siab.” (Malakaus 12:30) Yog tias koj xav ua ib yam li no rau hauv koj lub neej mas yuav zoo heev! w23.09 11 ¶12-13

Thaum tus tub txib Povlauj sau tsab ntawv no, lub koom txoos hauv Thexalaunikas twb tsis tau muaj ib xyoos ces cov txwj laus yuav tsis paub hauj lwm zoo thiab tej zaum yuav ua tau ntau yam yuam kev. Txawm li los yeej tsim nyog sawv daws hwm lawv. Thaum lub sij hawm uas muaj kev txom nyem loj kawg nkaus los ze zuj zus peb haj yam yuav tau mloog cov txwj laus dua li tam sim no. Thiab thaum ntawd tej zaum cov kwv tij pem lub hauv paus koom haum loj thiab tej ceg Npe-ee yuav nrog tsis tau peb tham li niaj hnub no lawm ces thiaj haj yam tseem ceeb rau peb yuav tau hlub tshua cov txwj laus thiab hwm lawv tam sim no. Txawm yuav muaj dab tsi yav tom hauv ntej los thov peb sawv daws ceev faj zov tos, tsis txhob pheej tsom ntsoov qhov uas cov txwj laus zoo tsis tiav xwb, tiam sis nco ntsoov hais tias Yehauvas thiab Yexus nkawd yog ob tug uas coj cov txwj laus. Ib yam li lub kaus mom hlauv tiv thaiv tus tub rog lub taub hau, peb txoj kev cia siab tias peb yuav dim peb lub txim yuav tiv thaiv peb txoj kev xav. Peb pom tias txhua yam uas lub qab ntuj no muab tau rau peb tsis muaj nuj nqis dab tsi li. (Filipis 3:8) Peb txoj kev vam kev cia siab pab kom peb muaj lub siab tus thiab muaj kev ntseeg ruaj khov. w23.06 11-12 ¶11-12

Cov uas hnov tus poj niam ruam hu yuav tau txiav txim siab seb lawv yuav mus los tsis mus rau hauv nws tsev. Tseem ceeb heev rau peb yuav tsum tsis txhob ua kev plees kev yi. Tus poj niam ruam hais tias: “Cov dej uas nyiag los yeej qab zib dua.” (Paj Lug 9:17) Phau Vajlugkub muab kev pw ua niam txiv ntawm ob niam txiv piv rau cov dej hauv yus lub thoob. (Paj Lug 5:15-18) Thaum ob niam txiv sib yuav raws kev raws cai lawm ces nkawd thiaj li pw tau ua niam txiv tsis txhaum. Tiam sis “cov dej uas nyiag los” tsis zoo li ntawd. Tej zaum cov dej no yog hais txog thaum cov neeg uas mus nrog lwm tus neeg uas tsis yog lawv tus txij nkawm pw ua ke li tus tub sab nyiag ua xwb tsis pub leej twg paub. “Cov dej uas nyiag los” tsuas qab zib, thaum lawv xav hais tias tsis muaj leej twg paub xwb. Lawv rov dag lawv tus kheej xwb rau qhov Yehauvas pom txhua yam uas lawv ua. Tsis muaj ib yam dab tsi uas yuav iab yuav daw tshaj qhov uas peb plam peb txoj kev sib raug zoo nrog Yehauvas. Ces “cov dej uas nyiag los” yeej tsis qab zib hlo li.​—1 Kauleethaus 6:9, 10. w23.06 22 ¶7-9

Koj yuav ua li cas yog koj pom tias koj tsuas thov Vajtswv kom tag kev cai xwb, los sis koj tsis mob siab ua Vajtswv tes hauj lwm li qub lawm? Yog tias, koj pom tau muaj li no rau koj los txhob xav hais tias Yehauvas tso koj tseg lawm. Vim peb yog neeg zoo tsis tiav, muaj tej zaud peb yeej qaug zog thiab. Yog tias koj tsis kub siab li yav thaud lawm ces ua tib zoo xav txog tus tub txib Povlauj. Txawm nws xav xyaum raws li Yexus los tej thaud nws yuam nws lub siab ua xwb. Txawm Povlauj yuav xav li cas los nws yeej npaj siab ua kom tiav li. Ib yam li ntawd, thaum koj qaug zog lawd koj tsis txhob maj txiav txim raws li koj xav. Txawm koj xav ua tsis xav los, cia li npaj siab ua qhov ncaj qhov yog xwb. Ntev mus ntev tuaj koj yuav muaj lub siab kub lug ua lawm.​—1 Kauleethaus 9:16. w24.03 11-12 ¶12-13

Peb kuj qhia tau peb txoj kev hlub rau cov kwv tij nkauj muam es tos txais lawv los ua peb cov phooj ywg kwv luag. (2 Kauleethaus 6:11-13) Muaj coob leej ntau tus kwv tij nkauj muam hauv tej koom txoos nyias los nyias ib qho los thiab nyias muaj nyias cwj pwm. Qhov uas yuav pab tau peb muaj kev hlub rau lawv yog xav ntsoov txog tej yam zoo uas lawv ua. Thaum peb pom lwm tus ib yam li Yehauvas pom ces qhia tau tias peb hlub lawv tiag tiag. Kev hlub tseem ceeb heev rau lub caij uas muaj kev txom nyem loj kawg nkaus. Thaum lub caij ntawd pib, Yehauvas yuav tiv thaiv peb li cas? Cia peb nco ntsoov lub caij thaum Yehauvas qhia kom nws cov tib neeg ua li cas rau li cas thaum muaj neeg tuaj tawm tsam lub nroog Npanpiloos li no tias: ‘Kuv haiv neeg, nej cia li khiav rov qab mus rau hauv nej tej tsev thiab kaw qhov rooj rau. Nkaum tos kom Vajtswv txoj kev chim dhau tso.’ (Yaxayas 26:20) Cov lus no kuj hais cob coos rau cov uas nyob rau lub caij uas muaj kev txom nyem loj kawg nkaus. w23.07 6-7 ¶14-16

Cia lwm tus xam pom tias koj txawj yoog. Rov tshuaj koj tus kheej li no tias: ‘Ua li tib neeg puas pom tias kuv yog ib tug neeg txawj yoog, zam, thiab thev taus lwm tus? Los sis lawv xam pom tias kuv yog ib tug neeg nkhaus, coj nruj, thiab tawv ncauj? Kuv puas mloog lwm tus hais thiab ua raws li lawv lub siab nyiam?’ Yog peb txawj yoog lwm tus ces yuav qhia tau tias peb xyaum tau Yehauvas thiab Yexus nkawd. Peb yuav tau txawj yoog thaum peb lub neej hloov lawm. Tej yam uas hloov ntawd tej zaum yuav ua nyuaj rau peb thiab. Xws li tib ntsais muag xwb peb kuj muaj mob muaj nkeeg, tej kev lag luam los sis tej nom tswv kuj ua rau peb lub neej nyuaj kawg li. (Laj Lim Tswv Yim 9:12) Tsis tas li ntawd, tej zaum thaum Yehauvas lub koom haum txib kom peb mus ua dua lwm yam hauj lwm los sis kom peb tsiv mus nyob rau lwm qhov, tej zaum kuj yuav nyuaj heev rau peb. Peb yeej yoog tau yog peb coj li plaub yam no: (1) xam pom tias txhua yam txawv lawm, (2) xav ntsoov tej yam tom hauv ntej, (3) xav txog tej yam zoo hauv lub neej, thiab (4) mus pab lwm tus. w23.07 21-22 ¶7-8

Thaum Daniyees raug ntes mus rau Npanpiloos uas nyob deb heev ntawm Yeluxalees nws tseem yog tub hluas xwb. Txawm tias nws tseem hluas los muaj cov nom tswv Npanpiloos uas nyiam thiab qhuas nws vim lawv pom nws “zoo nraug” thiab nws yog noob nom noob tswv. (1 Xamuyees 16:7) Twb yog li ntawd, cov Npanpiloos thiaj cob qhia Daniyees ua hauj lwm nyob hauv vaj ntxwv lub loog. (Daniyees 1:3, 4, 6) Yehauvas hlub Daniyees vim nws muab siab npuab Yehauvas. Thaum Yehauvas hais tias Daniyees zoo ib yam li Nau-as thiab Yauj nkawd, Daniyees tsuas muaj kwv lam li 20 xyoo xwb. Txawm li los, Yehauvas yeej suav tias Daniyees yog ib tug neeg ncaj ncees li Nau-es thiab Yauj uas twb teev tiam Yehauvas ntev ntev los lawm. (Chiv Keeb 5:32; 6:9, 10; Yauj 42:16, 17; Exekhees 14:14) Thaum Daniyees laus laus lawm los Yehauvas yeej tseem hlub nws.​—Daniyees 10:11, 19. w23.08 2 ¶1-2

Thaum koj txiav txim siab yuav mus yuav ib lub tsev, koj yeej xav mus saib lub tsev seb zoo li cas rau li cas tim ntsej tim muag tso.Thaum peb nyeem thiab kawm phau Vajlugkub, peb kuj ua tib yam li ntawd. Yog koj nyeem nrawm nroos xwb ces koj tsuas paub tej yam ntiav ntiav xwb. (Henplais 5:12) Yog li ntawd, koj yuav tsum ua zoo li thaum koj mus saib lub tsev es mus tshuaj sab hauv kom zoo zoo. Ib yam uas yuav pab tau koj to taub phau Vajlugkub zoo yog ua tib zoo kawm seb tej uas nyob hauv phau Vajlugkub sib dhos li cas. Rau siab kawm kom koj paub zoo tias qhov tseeb yog dab tsi thiab vim li cas koj ho ntseeg qhov ntawd. Yuav kom peb to taub Vajtswv Txoj Lus txhua fab, peb yuav tau ua tib zoo kawm kom txhij kom txhua. Tus tub txib Povlauj txhawb nws cov kwv tij nkauj muam Khixatias kom rau siab ntso kawm Vajtswv Txoj Lus kom lawv paub tias qhov tseeb “dav li cas, ntev li cas, siab li cas thiab tob li cas.” Yog lawv ua li no ces lawv txoj kev ntseeg yuav zoo “ib yam li tsob ntoo uas tej cag ntsia av tob tob.” (Efexaus 3:14-19) Peb kuj yuav tau ua ib yam li ntawd thiab. w23.10 18 ¶1-3

Phau Vajlugkub qhia txog ntau tus neeg uas ua tau siab ntev. Koj kuj mus kawm tau txog lawv tus qauv. Lawv cov nod ib tug yog Daviv. Thaum Yehauvas xaiv nws los ua cov Ixayees tus vaj ntxwv nws tseem hluas heev ces nws yuav tau ua siab ntev tos ntau ntau xyoo nws mam li tau ua vaj ntxwv. Hos muaj ob tug yog Xime-oos thiab Anas, nkawd ob leeg puav leej rau rau siab pe hawm Yehauvas thaum nkawd ua siab ntev tos tus Mexiyas los. (Lukas 2:25, 36-38) Thaum koj kawm txog lawv, ua zoo xav seb ua li cas lawv thiaj ua tau siab ntev tos thiab koj yuav xyaum lawv cov qauv li cas. Yog koj kawm txog cov uas tsis ua siab ntev los kuj yuav pab tau koj thiab. (1 Xamuyees 13:8-14) Ua zoo xav seb yog vim li cas lawv thiaj tsis ua siab ntev thiab qhov uas lawv tsis ua siab ntev, lawv ho ntsib teeb meem li cas. w23.08 25 ¶15

Tus tub txib Petus yeej npuab siab rau Yexus, nws yeej tsis cia ib yam dab tsi los txwv tau nws. Xws li muaj ib zaug Yexus tau hais ib yam dab tsi uas cov thwj tim tsis nkag siab. (Yauhas 6:68) Ib txhia tib neeg tsis kam raws Yexus qab vim lawv tsis tos seb yog vim li cas rau li cas. Petus tsis coj zoo li ntawd. Nws yeej npuab siab ntsoov thiab hais tias Yexus “thiaj qhia txog txoj sia ntev dhawv mus ib txhis xwb.” Yexus paub hais tias Petus thiab lwm cov tub txib yuav tso nws tseg. Txawm li ntawd los Yexus hais rau Petus tias nws tso siab tias Petus yeej yuav muab siab rau ntseeg. (Lukas 22:31, 32) Yexus paub tias “lub siab mas kub lug tiam sis lub cev qaug zog zis.” (Malakaus 14:38) Tom qab Petus tsis lees paub Yexus los Yexus yeej tsis tso Petus tseg. Thaum Yexus sawv rov qab los, nws los tshwm rau Petus pom thaum Petus nyob ib leeg. (Malakaus 16:7; Lukas 24:34; 1 Kauleethaus 15:5) Qhov no ntshe txhawb tau Petus lub zog kawg li! w23.09 22 ¶9-10

Vajtswv zam tus neeg uas muaj kev ntseeg rau Nws tej kev txhaum. Thaum Vajtswv zam ib tug neeg twg tej kev txhaum lawd, Nws yeej tsis rov qab tsub txim rau tus ntawd ntxiv. (Ntawv Nkauj 32:1, 2) Yog li ntawd, tus uas muaj kev ntseeg, Vajtswv thiaj suav tias nws yog neeg ncaj ncees. Txawm tias Vajtswv hu Anplahas, Daviv, thiab lwm cov uas teev tiam nws ncaj ncees los lawv puav leej tseem yog noob txaug neeg txhaum. Vim lawv txoj kev ntseeg, Vajtswv thiaj suav tias lawv tsis muaj txim li cov uas tsis teev tiam nws. (Efexaus 2:12) Nyob rau hauv tus tub txib Povlauj tsab ntawv rau cov ntseeg hauv Loos, nws piav tias yuav tau muaj kev ntseeg xwv thiaj muaj taus kev sib raug zoo nrog Vajtswv. Anplahas thiab Daviv muaj kev ntseeg nkawd thiaj li cog tau phooj ywg nrog Vajtswv. Peb los yuav tau muaj kev ntseeg peb thiaj cog tau phooj ywg nrog Vajtswv tib yam nkaus. w23.12 3 ¶6-7

Niaj hnub nim no txhua tus Khixatias muaj txoj koob hmoov los pub tau lawv lub sij hawm, lub dag lub zog, thiab tej qhov txhia chaw los txhawb nqa Vajtswv lub Nceeg Vaj. Yog peb ua npaum li peb ua tau rau Yehauvas ces qhia tias peb saib txoj koob hmoov uas peb muaj los pe hawm nws rau nqi. Tus tub txib Povlauj sau txog tej uas peb yuav tau ua thaum peb pe hawm Yehauvas. (Henplais 10:22-25) Tej ntawd yog thov Vajtswv, mus qhia txoj xov zoo, mus kev sib txoos, thiab ib leeg txhawb ib leeg vim hnub kawg twb los ze lawm. Nyob rau hauv phau Tshwm Sim tom yuav kawg, Yehauvas tus tub txib saum ntuj tau hais ob zaug tias: ‘Pe hawm Vajtswv xwb!’ (Tshwm Sim 19:10; 22:9) Qhov uas tus tub txib saum ntuj hais ob zaug qhia tias txoj kev pe hawm Yehauvas tseem ceeb heev. Cia peb nco ntsoov tej tob tob peb tau kawm txog Yehauvas lub tuam tsev ntawm sab kev ntseeg thiab saib txoj koob hmoov uas peb muaj los pe hawm Yehauvas rau nqi! w23.10 29 ¶17-18

“Peb ib leeg yuav tsum hlub ib leeg.” Yexus tau ceeb toom tias “coob tus txoj kev hlub yuav tsuag zuj zus mus.” (Mathais 24:12) Yexus tsis tau hais tias nws cov thwj tim feem coob txoj kev hlub yuav tsuag zuj zus mus. Tiam sis Yexus tsuas yog ceeb toom kom peb txhob cia lub qab ntuj no lub siab txias zias ua rau peb ib tug txoj kev hlub rau ib tug tsuag zuj zus. Yog li ntawd, peb yuav ua li cas peb thiaj paub tias peb txoj kev hlub rau cov kwv tij nkauj muam tseem nyob ruaj khov khwb kho? Ib yam uas pab tau peb paub tias peb txoj kev hlub tseem nyob ruaj khov khwb kho yog nyob ntawm seb peb coj li cas. (2 Kauleethaus 8:8) Xws li Petus tau hais tias: ‘Qhov uas tseem ceeb tshaj plaws huv tib si, yog nej ib leeg yuav tsum hlub ib leeg tiag tiag, rau qhov txoj kev hlub npog tau txhua yam kev txhaum huv tib si.’ (1 Petus 4:8) Ces peb yuav paub tau tias peb txoj kev hlub ruaj khov khwb kho los ntawm seb peb coj li cas thaum peb cov kwv tij nkauj muam ntseeg ua yuam kev los sis ua rau peb tu siab. w23.11 10-11 ¶12-13

Qhov uas peb tsis mloog Yexus cov lus yog peb hlub ib co hauv lub koom txoos tiam sis ho tseg ib co. Zoo ib yam li Yexus, tej zaum peb yuav ncawg ib co dua li lwm cov. (Yauhas 13:23; 20:2) Tiam sis tus tub txib Petus txhawb kom peb nco ntsoov “hlub txhua tus” kwv tij nkauj muam tam li ib tse neeg. (1 Petus 2:17) Petus txhawb kom peb “ib tug yuav tsum hlub ib tug tiag tiag.” (1 Petus 1:22) Nyob rau nqe no, qhov uas “hlub ib tug tiag tiag” yog yuav tau hlub tus neeg ntawd tab txawm nyuaj heev rau peb. Xws li yog muaj ib tug kwv tij hais los sis ua ib yam phuv rau peb lawm, peb yeej xav ua pauj kiag tam sid rov rau nws. Tiam sis Yexus qhia Petus tias qhov uas peb ua pauj ntawd tsis haum Vajtswv siab. (Yauhas 18:10, 11) Petus sau li no tias: ‘Nej tsis txhob ua phem pauj phem, yog leej twg foom phem rau nej, nej tsis txhob foom phem pauj, tiam sis nej cia li thov Vajtswv foom koob hmoov rau nws.’ (1 Petus 3:9) Thaum koj “hlub ib tug tiag tiag” lawm, koj yuav ua zoo rau nws. w23.09 28-29 ¶9-11

Peb xav tsis thoob tias cas me nyuam loj hlob ceev ua luaj. Ib sij huam xwb txawm siv tiav niam tiav txiv lawm. Tiam sis kev ntseeg tsis zoo li ntawd. Yuav kom peb loj hlob los ua ib tug ntseeg uas paub tab, peb yuav tsum muaj kev sib raug zoo nrog Yehauvas. (1 Kauleethaus 13:11; Henplais 6:1) Tsis tas li ntawd xwb, peb yuav tsum muaj lub hwj huam dawb huv pab, peb thiaj muaj tej yeeb yam uas ntxim Yehauvas siab, paub ua neej, thiab txawj npaj rau yav tom ntej. (Paj Lug 1:5) Yehauvas tsim tib neeg kom muaj txiv neej thiab poj niam. (Chiv Keeb 1:27) Tus txiv neej thiab tus poj niam nyias yeej txawv nyias. Xws li Yehauvas tsim kom txiv neej thiab poj niam nyias muaj nyias tes hauj lwm. Yog li ntawd, lawv nyias muaj nyias lub peev xwm kom nyias thiaj ua tau nyias tes hauj lwm.​—Chiv Keeb 2:18. w23.12 18 ¶1-2

Yexus puas xav kom lwm tus siv nws Leej Txiv lub npe? Nws yeej xav. Ib txhia thawj coj ntawm tej kev ntseeg uas nyob rau Yexus lub caij ntseeg tias Vajtswv lub npe dawb huv dhau lawm tsis tsim nyog siv. Tiam sis Yexus tsis cia neeg tej kev cai ntawd txwv tau nws kom txhob siv nws Leej Txiv lub npe. Xws li lub sij hawm thaum Yexus kho tus txiv neej raug dab hauv cheeb tsam Kelaxees. Cov tib neeg ntshai heev thiab thov kom Yexus tawm hauv lawv cheeb tsam mus ces Yexus thiaj tawm mus lawm. (Malakaus 5:16, 17) Tiam sis Yexus xav kom cov neeg ntawd paub Yehauvas lub npe. Yog li ntawd, Yexus thiaj sam hwm kom tus txiv neej uas nws tau kho mus qhia tib neeg txog tej uas Yehauvas tau ua, tsis yog tej uas Yexus tau ua. (Malakaus 5:19.) Yexus kuj xav kom peb mus qhia nws Leej Txiv lub npe kom tib neeg thoob qab ntuj paub thiab! (Mathais 24:14; 28:20) Yog peb ua li ntawd ces peb yuav ua rau peb tus Vaj Ntxwv Yexus zoo siab. w24.02 10 ¶10

Ua neej nyob rau lub qab ntuj no tsuas phem zuj zus ntxiv tiam sis yog ib qho koob hmoov zoo kawg uas peb tau nyob rau hauv Yehauvas lub koom haum. Yehauvas pub kom peb muaj cov kwv tij nkauj muam ntseeg. (Ntawv Nkauj 133:1) Yehauvas pab kom peb tsev neeg muaj kev zoo siab. (Efexaus 5:33–6:1) Thiab nws pab kom peb muaj laj lim tswv yim xwv peb thiaj li thev taus tej kev nyuaj siab uas peb raug thiab muaj kev zoo siab. Peb yuav tau rau siab ntso teev tiam Yehauvas vim muaj qee lub sij hawm lwm tus yuav ua los sis hais qho yam yuam kev rau peb. Tsis tas li ntawd, muaj qee zaug peb yuav ua tau yuam kev ces ho txo tau peb lub zog. Peb yuav tau peem tiag ua Yehauvas tes hauj lwm tab txawm (1) ib tug kwv tij nkauj muam tau ua siab ua qes rau peb, (2) thaum peb tus txij nkawm ua tsis tau raws li siab xav, thiab (3) thaum peb ua tau ib yam twg yuam kev. w24.03 14 ¶1-2

Ntau zaus koj yuav hnov txog tej uas koj cov kwv tij nkauj muam twb txiav txim siab ua rau Yehauvas tes hauj lwm ntxiv. Tej zaum lawv mus kawm lub tsev kawm ntawv, Kev Kawm Rau Cov Qhia Lub Nceeg Vaj los sis cov uas tau khiav mus nyob rau thaj chaw uas cheem tsum cov tshaj tawm. Yog koj ua tau li no yuav yog ib lub hom phiaj zoo heev rau koj thiab. Yehauvas cov tib neeg nrhiav nrhw kev los ua nws tes hauj lwm ntxiv. (Tes Hauj Lwm 16:9) Yog tias koj ua tsis tau li ntawd tam sim no, txhob xav tias koj tsis muaj peev xwm li luag tej. Qhov tseem ceeb tsis yog peb sib tw tiam sis peb xyaum kub siab lug li Yexus es thev mus txog thaum kawg. (Mathais 10:22) Nco ntsoov tias thaum koj ua npaum li koj ua tau, yog koj ua rau Yehauvas zoo siab. Qhov no yog qhov tseem ceeb uas tom qab koj ua kev cai raus dej tas es koj raws Yexus qab mus li.​—Ntawv Nkauj 26:1. w24.03 10 ¶11

Peb Leej Txiv Yehauvas cog lus tias nws yuav zam peb lub txim yog peb tso peb tej kev txhaum tseg. (Ntawv Nkauj 86:5) Yog peb tso peb tej kev txhaum tseg lawm tiag tiag ces peb yeej ntseeg tau tias Yehauvas yuav zam peb lub txim li nws tau hais. Nco ntsoov tias Yehauvas yeej tsis yuam kom peb ua ntau tshaj qhov peb ua tau. Nws yeej ris peb txiaj ntsig rau tej peb ua rau nws, tsuav yog peb ua li peb ua tau xwb. Cia peb xav txog cov uas teev tiam Yehauvas kawg siab kawg ntsws txheej thaum ub uas zoo li tus tub txib Povlauj. Tau ntau lub xyoos, Povlauj kub siab lug mus tshaj tawm txoj xov zoo thiab mus tsa ntau lub koom txoos. Tiam sis tom qab no thaum nws ua tsis tau npaum li nws ib txwm ua, Yehauvas puas tseem txaus siab rau nws? Yehauvas yeej tseem txaus siab rau nws thiab foom koob hmoov rau nws vim nws tseem ua li nws ua tau. (Tes Hauj Lwm 28:30, 31) Tib yam li ntawd, txawm peb lub neej hloov li cas lawm los tsuav yog peb tseem ua li peb ua tau los teev tiam Yehauvas ces nws yeej txaus siab heev rau peb. w24.03 27 ¶7, 9

Yexus tso yam ntxwv rau nws cov thwj tim xyaum kom txawj thov Yehauvas. Thaum Yexus ua Yehauvas tes hauj lwm hauv ntiaj teb no, nws yeej thov Yehauvas tsis so. Yexus khwv heev thiab tib neeg nyob puag ncig nws tas li. Yog li ntawd, nws thiaj lauj sij hawm kom tau thov Vajtswv. (Malakaus 6:31, 45, 46) Thaum tsis tau kaj ntug, nws txawm sawv ntxov tsees mus nyob ib qho thov Vajtswv. Muaj ib zaug Yexus yuav tau ua ib yam tseem ceeb heev nws thiaj thov Vajtswv ib hmos kaj ntug plaws. (Lukas 6:12, 13) Ua ntej hmo Yexus tuag, nws thov Vajtswv tsis so kom pab nws ua tau raws li Vajtswv lub siab nyiam. (Mathais 26:39, 42, 44) Yexus tus yam ntxwv qhia rau peb tias txawm peb yuav khwv npaum li cas los nco ntsoov lauj sij hawm los thov Vajtswv. Peb kuj xyaum tau Yexus es sawv ntxov tsees los sis nyob ib nyuag lig zog thov Vajtswv. Yog peb ua yam li no ces yuav qhia tau rau Yehauvas tias peb ris txiaj ntsig rau txoj kev thov uas nws muab rau peb. w23.05 3 ¶4-5

Nyob hauv cov nqe hnub no qhia tias Yehauvas hlub cov xaiv tseg npaum li tus dej uas ntws mus tsis rov. Cov lus piv txwv no qhia tau ib daim duab rau peb tias Yehauvas hlub cov xaiv tseg npaum li cas. Cov xaiv tseg yeej ntseeg ruaj ruaj tias Vajtswv hlub lawv. (Yudas 1) Tus tub txib Yauhas qhia tias cov xaiv tseg xav li cas thaum nws sau tias: ‘Nej sim ua tib zoo xav saib Leej Txiv hlub peb npaum li cas! Nws hlub peb kawg nkaus li, nws thiaj hu peb ua nws cov me nyuam.’ (1 Yauhas 3:1) Puas yog Yehauvas tsuas hlub cov xaiv tseg xwb? Tsis yog. Yehauvas yeej qhia tias nws hlub peb txhua tus. Yehauvas muab dab tsi qhia tias nws hlub tib neeg? Nws muab tus nqi txhiv. Yeej tsis tau muaj dua ib tug neeg twg yuav hlub peb npaum li no!​—Yauhas 3:16; Loos 5:8. w24.01 28 ¶9-10

Nqe no qhia tau tias thaum Daviv txhawj ntshai, yam uas pab tau nws yog ua tib zoo xav txog tej yam uas Yehauvas tseem yuav ua rau nws yav tom ntej. Daviv paub tias Yehauvas yeej yuav pab nws raws caij raws nyoog. Tsis tas li ntawd, Yehauvas twb xaiv Daviv ua cov neeg Ixayees tus vaj ntxwv uas yuav tuaj tom ntej lawm. (1 Xamuyees 16:1, 13) Yog li ntawd, txhua yam uas Yehauvas tau cog lus tseg, Daviv yeej suav yam li twb muab tiav lawm. Yehauvas yuav tsis tshem txhua yam teeb meem uas peb raug tiam sis tej kev sim siab uas peb ntsib, nws yuav muab tshem huv tib si mus thaum txog lub qab ntuj tshiab. (Yaxayas 25:7-9) Yehauvas twb yog tus tsim ib puas tsav yam ces nws yeej muaj peev xwm tsa tau cov uas tau tas sim neej lawm kom rov muaj sia dua, tshem txhua yam kab mob kev nkeeg mus, thiab tshem txhua tus uas tawm tsam peb.​—1 Yauhas 4:4. w24.01 6 ¶12-13

Xav txog qhov uas koj cob koj tus kheej rau Yehauvas thiab ua kev cai raus dej. Koj ua li ntawd, yeeb vim yog koj xav tuaj Yehauvas tog. Xav txog seb thaum ub thaum koj tseem tsis tau paub Yehauvas, ho muaj dab tsi pab tau koj xam pom tias koj nrhiav tau qhov tseeb lawm. Thaum ntawd koj kawm txog Yehauvas, koj thiaj paub hwm thiab hlub nws uas yog koj Leej Txiv tus uas nyob saum ntuj ceeb tsheej. Koj pib muaj kev ntseeg thiab tso koj tej kev txhaum tseg. Koj lub siab tsis kheev koj ua tej yam phem thiab koj ua lub neej raws li Vajtswv lub siab nyiam. Thaum koj pom tias Vajtswv zam txim pub rau koj mas ua rau koj zoo siab heev. (Ntawv Nkauj 32:2) Koj pib mus kev sib txoos thiab pib qhia rau lwm tus paub txog tej yam zoo zoo uas koj kawm tau. Thaum koj muab koj tus kheej cob rau Yehauvas thiab ua kev cai raus dej tag lawm, koj yeej ua npaum li koj ua tau los mus taug txoj kev uas coj mus tau txoj sia. (Mathais 7:13, 14) Cia li tuav rawv koj txoj kev ntseeg, tso siab plhuav rau Yehauvas thiab coj raws nraim li nws tej lus sam hwm. w23.07 17 ¶14; 19 ¶19

Thaum koj thov Yehauvas tias koj muab koj tus kheej cob rau nws ces koj yuav pom tias koj kov yeej tau txhua yam kev sim siab. Piv txwv li no, koj puas xav thab luag lwm tus txwj nkawm? Koj yeej tsis xav li! Koj twb cog lus rau Yehauvas lawm tias koj yuav tsis ua li ntawd. Tsam neb muaj siab lawm ces neb ho tso tsis taus tseg lawm. Koj kuj ‘tsis mus ua txoj kev phem’ thiab. (Paj Lug 4:14, 15) Xyaum Yexus tus qauv yuav pab tau peb. Nws yeej txiav txim siab ua raws li nws Leej Txiv pom zoo. Zoo ib yam li Yexus, koj yeej txiav txim tau tam sim ntawd tias koj yuav tsis ua tej yam uas Vajtswv tus uas koj cob koj tus kheej rau lawd, tsis pom zoo. (Mathais 4:10; Yauhas 8:29) Thaum koj raug teeb meem los sis raug sim, tej uas koj txiav txim siab ua ntawd yuav ua pov thawj qhia tias koj yog ib tug uas raws Yexus qab mus li. Koj kuj tso siab tau tias Yehauvas yuav pab koj raws Yexus qab mus li thiab. w24.03 9-10 ¶8-10