3 Nyiaj Dhau Tej Kev Ntxhov Siab

Muaj tej kev nyuaj siab uas peb yuav zam tsis dhau. Xws li thaum yus muaj ib tug mob hnyav heev lossis thaum ib tug uas yus hlub tau tas sim neej lawm. Thaum raug tej yam xwm zoo li no, phau Vajlugkub pab tau peb li cas?

KEV MOB KEV NKEEG

Ib tug pojniam hu ua Lauj hais tias: “Kuv mob ib ce lwj ntsuav. Kuv mloog mas zoo li ntsoog tas.” Vim Lauj mob ib ce heev, ua rau nws tsis muaj siab nyeem Vajlugkub. Qhov no ua rau nws ntxhov siab kawg li. Tiamsis Yexus cov lus hauv Mathai 19:26 pab tau nws. Nqe ntawd hais tias: “Vajtswv ua tau txhua yam huvsi.” Lauj thiaj nrhiav lwm txojkev los kawm Vajlugkub. Nws tso phau Vajlugkub thiab tej ntaub ntawv Vajlugkub los mloog.a (Saib cov lus hauv qab taw qhia.) Lauj hais tias: “Yog tsis muaj tej no ces xyov kuv yuav ua li cas tsav tau kuv txojkev ntseeg.”

Tej lub caij uas Lauj ntxhov siab heev, 2 Khaulee 8:12 nplig tau nws siab. Nqe ntawd hais tias: “Yog muaj lub siab kub lug lawm, Vajtswv yuav txais yuav raws li uas yus muaj tsis yog raws li yus tsis muaj.” Nqe Vajlugkub no pab tau Lauj nco ntsoov tias Vajtswv yeej txaus siab rau nws vim nws twb ua npaum li nws ua tau rau Vajtswv lawm.

KEV QUAJ NTSUAG

Diav rov qab hais tias: “Kuv tus ntxhais tas sim neej thaum nws tsuas muaj 18 xyoos xwb. Mob kuv siab kawg li, kuv lub neej tsaus ntuj nti xwb. Kuv xav tias ntshe yuav ua tsis taus neej ntxiv lawm.” Tiamsis Ntawv Nkauj 94:19 nplig tau Diav siab heev. Nqe ntawd hais tias: “Thaum kuv lub siab muaj kev txhawj xeeb ntau, koj kuj nplij kuv lub siab kom xyiv fab.” Diav hais tias: “Kuv thov Yehauvas pab kom kuv tau ib qho haujlwm ua, seb kuv tej kev nyuaj siab puas yuav ploj.”

Diav thiaj siv nws lub sijhawm mus pab tibneeg los paub Vajlugkub. Nws muab nws tus kheej piv rau ib tog txhim kos duab. Txawm lov lawm los tseem zas tau duab. Ib yam li tog txhim kos duab ntawd, txawm nws lub neej tawg tas lawm los tseem pab tau lwm tus thiab. Diav hais tias: “Thaum kuv siv tej nqe Vajlugkub los nplig cov uas kawm lub siab, tseem yimhuab nplig tau kuv thiab.” Diav kuj siv sijhawm kawm txog tej tug hauv phau Vajlugkub uas tau ntsib kev quaj ntsuag. Nws pom tias cov neeg ntawd puavleej thov Vajtswv tsis tseg. Tsis tas li ntawd xwb, nws pom tias tseem ceeb rau nws nyeem Vajlugkub los nplig nws siab.

Thaum Diav kawm Vajlugkub, ua rau nws xav txog tej yam uas yuav muaj los tom hauv ntej. Nqe Vajlugkub hauv Tubtxib Tes Haujlwm 24:15 nplig tau nws heev. Nqe ntawd hais tias: “Cov ncaj ncees thiab cov tsis ncaj puavleej yuav sawv hauv qhov tuag rov los.” Diav hais tias: “Kuv yeej ntseeg tias kuv yuav rov pom kuv tus ntxhais dua rau lub sijhawm uas Vajtswv teem tseg. Kuv yuav pom nws tim ntsej tim muag ib yam li thaum kuv nyuam qhuav yug tau nws.”

a Tej ntaub ntawv uas tau muab kaw cia nyob hauv lub vej xaij jw.org/hmn.

Phau Vajlugkub pab tau peb thaum peb lub neej tsaus ntuj nti

VAJTSWV PAB TAU PEB LI CAS?

Phau Vajlugkub hais tias: “[Yehauvas] nyob ze txhua tus uas thov hu nws, yog txhua tus uas muaj siab thov tiag. Nws pub rau txhua tus uas hwm thiab paub ntshai nws raws li lawv lub siab xav, thiab nws mloog lawv lub suab quaj thov thiab cawm lawv dim.” (Ntawv Nkauj 145:18, 19) Cov nqe Vajlugkub no nplig tau peb siab heev. Cia peb kawm seb Vajtswv teb cov uas xav los cuag nws, tej lus thov li cas.

NWS PUB DAG ZOG

Tej teeb meem uas peb raug ua rau peb qaug zog ntawm sab nqaij tawv thiab sab kev ntseeg. (Paj Lug 24:10) Tiamsis Yehauvas “pub zog rau tus uas tsaug leeg, thiab txhab zog rau tus uas tsis muaj zog.” (Yaxaya 40:29) Tus tubtxib Povlauj tau raug ntau yam kev nyuaj siab. Txawm li ntawd los nws hais tias: “Kuv yeej ua tau txhua yam vim muaj Vajtswv uas txhawb kuv lub zog.” (Filipi 4:13) Vajtswv lub hwj huam dawb huv pab Povlauj nyiaj dhau nws tej kev nyuaj siab. Koj los kuj thov tau Yehauvas pub nws lub hwj huam dawb huv los pab koj thiab.—Luka 11:13.

NWS PUB TSWVYIM

Koj yuav ua li cas thiaj nkag siab thiab txawj muab tej nqe Vajlugkub los siv hauv koj lub neej? Tus thwjtim Yakaunpau sau tias: “Yog nej cov leejtwg tsis muaj tswvyim, cia tus ntawd thov Vajtswv uas muaj lub siab dav pub rau txhua tus tsis thuam leejtwg li, mas Vajtswv yuav pub tswvyim rau nws.” (Yakaunpau 1:5) Yog li ntawd, peb yuav tau thov Yehauvas, nyeem Vajlugkub, thiab xyaum coj raws li Vajlugkub qhia. (Yakaunpau 1:23-25) Thaum peb ua li ntawd, peb yuav pom tias tej tswvyim hauv phau Vajlugkub tseem ceeb tiag.

NWS PUB LUB SIAB TUS

Yog koj ntsib kev ntxhov siab ntau yam, Yehauvas yuav pab tau koj muaj lub siab tus. Nws Txojlus hais tias: “Tsis txhob txhawj rau ib yam dabtsi, tiamsis cia li taij thiab thov thiab ua Vajtswv tsaug qhia txhua yam uas koj cheem tsum rau nws paub. Mas Vajtswv txojkev siab tus uas ntau dhau li neeg nkag siab tau yuav tsom kwm nej lub siab thiab nej tej kev xav cia rau hauv Yexus Khetos.” (Filipi 4:6, 7) Yog li ntawd, zoo rau koj thov Yehauvas pub kom koj muaj lub siab tus.

Koj yuav ua li cas xwb yog tias tu tsis tau koj tej teeb meem sai li koj siab xav? Txhob xav tias Vajtswv tso koj tseg lawm. Txawm muaj teeb meem dabtsi los, Vajtswv yuav pub koj muaj siab tuab thiab pub dag zog rau koj nyiaj dhau. (1 Khaulee 10:13) Phau Vajlugkub cog lus tseg tias yav tom hauv ntej Vajtswv yuav tshem tej teeb meem uas peb muaj mus ib txhis!