Tshaj Tawm Rau “Txhua Yam Neeg”
1. Cov neeg uas txawj qhia txoj xov zoo, zoo ib yam li cov neeg txawj ntaus hlau li cas?
1 Tus kws hlau muaj ntau yam ciaj rauj los siv ntaus hlau, thiab nws paub tias yuav siv tej twj ntawd rau lub caij twg. Ib yam li ntawd, peb muaj ntau yam twj los pab kom peb ua tau tes haujlwm qhia txoj xov zoo. Tej twj ntawd yog dabtsi? Peb muaj tej ntaub ntawv uas qhia txog ntau lub ntsiab, los pab peb tshaj tawm rau “txhua yam neeg.” (1Khl. 9:22) Daim ntawv nyob kem nruab nrab yuav qhia seb peb yuav tseb cov ntaub ntawv no rau leejtwg thiab yuav tseb li cas.
2. Lub caij twg yog lub uas zoo rau peb siv lwm phau ntawv?
2 Peb Yuav Siv Phau Ntawv Twg: Tus kws hlau yeej paub tias yam twj twg zoo ntaus hom hlau twg. Ib yam li ntawd, cov tub tshaj tawm txoj xov zoo yuav tsum paub tias phau ntawv twg thiaj zoo rau tus uas lawv ntsib. Tej zaum txog lub hli uas teem tseg rau peb tseb phau Vajlugkub Qhia. Tiamsis hauv lub tebchaws uas peb nyob feem coob tsis paub Vajtswv, peb yuav ua li cas? Yog tias peb siv lwm phau ntawv uas phim lawv, tej zaum yuav pab tau lawv dua. Thaum peb pab tus neeg ntawd muaj lub siab xav paub ntxiv lawm, peb mam li siv phau Vajlugkub Qhia los kawm nrog nws.
3. Vim li cas peb yuav tsum txawj siv tej twj uas peb muaj?
3 Phau Vajlugkub qhuas txog cov uas txawj ua lawv tes haujlwm. (P.L. 22:29) Niaj hnub no, tsis muaj ib teg haujlwm uas zoo tshaj tes haujlwm “qhia Vajtswv txoj xov zoo.” (Loos 15:16) Yog tias peb xyaum kom txawj siv tag nrho tej twj uas peb muaj, peb yuav “tsis txaj muag” rau peb tes haujlwm.—2Tmt. 2:15.