Tej Uas Pab Kom Peb Txawj Ua Vajtswv Tes Num​—Sau Cov Uas Xav Kawm Vajlugkub Cia

“Cia li ua tib zoo saib koj tus kheej thiab tej uas koj qhia.” (1Tmt. 4:16) Povlauj cov lus no qhia peb tias peb yuav tsum rau siab kom peb txawj qhia Vajlugkub, tsis hais peb yog ib tug tshaj tawm tshiab los yog twb tshaj tawm ntev lawm. Yog li ntawd, daim Tes Num Rau Lub Nceeg Vaj yuav tawm ib zag tshiab hu ua “Tej Uas Pab Kom Peb Txawj Ua Vajtswv Tes Num” los pab kom peb txawj qhia Vajlugkub. Ib zag twg yuav muaj ib yam tshiab rau peb kawm, thiab lub hli ntawd peb yuav mus xyaum zaj ntawd thaum peb mus qhia Vajlugkub. Tom qab lub hli xaus, hmo peb muaj Kev Kawm Ua Vajtswv Tes Num, peb yuav tham seb zaj tshiab ntawd pab tau peb li cas. Yog li ntawd, zaj tawm rau lub hli no yog sau cov uas xav kawm Vajlugkub cia.

Vim Li Cas Ho Tseem Ceeb: Yog peb tsuas mus qhia Vajlugkub nkaus xwb, ces peb twb tsis ua li Yexus tau sam hwm kom peb ua. Peb yuav tsum rov mus xyuas thiab mus kawm Vajlugkub nrog cov uas xav kawm, mus ywg dej rau cov noob uas peb tau tseb lawd, thiaj yog peb ua peb tes haujlwm tiag. (Mth. 28:19, 20; 1Khl. 3:6-9) Peb yuav tsum rov mus nrhiav tus tibneeg uas peb tau ntsib es mus nrog nws tham txog tej kev txhawj xeeb uas nws muaj. Vim li no, thaum peb nrhiav tau ib tug uas xav kawm Vajlugkub, peb yuav tau muab sau cia.