Muab Siab Teev Tiam Yehauvas Thaum Muaj Kev Thaj Yeeb

1. Thaum twg nyuaj rau peb teev tiam Yehauvas?

KOJ SIM XAV SEB, thaum twg nyuaj tshaj rau koj teev tiam Yehauvas, puas yog thaum koj muaj teeb meem ntau los yog thaum koj nyob kaj siab lug? Peb yeej mus cuag Yehauvas thaum peb muaj kev nyuaj siab tiamsis thaum peb muaj kev thaj yeeb thiab tsis muaj kev nyuaj siab dabtsi li, peb ua dabtsi xwb? Peb puas tseem muab siab teev tiam Yehauvas es tsis txhob cia ib yam dabtsi los tab kaum peb? Yehauvas ceeb toom cov Yixalayees tias thaum lawv muaj kev thaj yeeb lawv yuav tsum nco ntsoov Nws.​—2 Kevcai 6:10-12.

2. Vajntxwv Axas tso tau tus qauv zoo li cas rau peb xyaum?

² Vajntxwv Axas tso tau ib tug qauv zoo rau peb xyaum. Nws tsis yog teev tiam Yehauvas thaum muaj kev kub ntxhov xwb tiamsis thaum muaj kev thaj yeeb los nws yeej tseem muab siab teem tiav Yehauvas. Axas “muab siab npuab tus TSWV [“Yehauvas,” NWT ] tas nws sim neej.” (1 Vajntxwv 15:14) Nws rhuav tshem tej kev ntseeg cuav hauv tebchaws Yudas. Phau Vajlugkub hais tias “nws rhuav cov neeg txawv tebchaws tej thaj thiab tej chaw teev dab, tsoo tej ncej zeb thiab ntov tus mlom Aselas povtseg huv tibsi.” (2 Xwmtxheej Vajntxwv 14:3, 5) Nws kuj muab nws pog Ma-akas lub meej mom txo tsis pub ua poj vajntxwv lawm vim nws pog txua ib tug mlom rau tibneeg pe hawm.​—1 Vajntxwv 15:11-13.

3. Hauv zaj no peb yuav tham txog cov lus nug twg?

³ Vajntxwv Axas tsis yog rhuav tshem tej dab mlom xwb tiamsis nws tseem pab cov neeg hauv tebchaws Yudas rov los teev tiam Yehauvas thiab. Tau 10 lub xyoos ‘lub tebchaws tsis muaj tsov tsis muaj rog’ rau qhov Yehauvas pub Axas thiab cov neeg hauv tebchaws Yudas muaj kev thaj yeeb. (2 Xwmtxheej Vajntxwv 14:1, 4, 6) Hauv zaj no peb yuav tham seb (1) Vajntxwv Axas ua dabtsi xwb thaum lub tebchaws muaj kev thaj yeeb, (2) cov Khixatia thaum ub ua dabtsi thaum tsis muaj neeg tawm tsam lawv, thiab (3) yog koj nyob rau lub tebchaws uas nom tswv cia koj teev tiam Yehauvas ywj siab, koj yuav siv koj lub sijhawm los ua dabtsi xwb?

THAUM MUAJ KEV THAJ YEEB VAJNTXWV AXAS UA DABTSI XWB?

4. Raws li 2 Xwmtxheej Vajntxwv 14:2, 6, 7, thaum muaj kev thaj yeeb hauv lub tebchaws, Vajntxwv Axas ua dabtsi xwb?

⁴ Nyeem 2 Xwmtxheej Vajntxwv 14:2, 6, 7. Vajntxwv Axas qhia cov neeg hauv tebchaws Yudas tias Yehauvas yog tus ‘tiv thaiv lawv txhua phab thiab pub lawv nyob kaj siab lug.’ Thaum muaj kev thaj yeeb hauv lub tebchaws, Vajntxwv Axas puas nyob so tsis ua dabtsi? Nws tsis ua li ntawd tiamsis nws txhim kho tej nroog, ua chaw tsom faj, ua ntsa loog thiab rooj loog thaiv tej nroog. Nws hais rau cov neeg hauv tebchaws Yudas tias: “Cheem nimno peb tau kav thiab lub tebchaws yog peb tug.” Qhov uas Vajntxwv Axas hais no txhais tias tsis muaj yeeb ncuab tuaj txwv txiav tsis pub lawv ua ywj siab thiab tsis pub lawv txhim kho lawv lub tebchaws. Nws thiaj hais kom cov neeg hauv tebchaws Yudas siv lub sijhawm no kom muaj qab hau.

5. Vim li cas Vajntxwv Axas thiaj npaj nws cov tub rog?

⁵ Vajntxwv Axas siv lub sijhawm uas muaj kev thaj yeeb los npaj nws cov tub rog. (2 Xwmtxheej Vajntxwv 14:8) Puas yog nws tsis tso siab rau Yehauvas nws thiaj ua li ntawd? Tsis yog, tiamsis Vajntxwv Axas paub tias yog nws lub luag haujlwm los npaj nws cov neeg rau lub sijhawm uas muaj kev kub ntxhov. Vajntxwv Axas paub tias kev thaj yeeb hauv tebchaws Yudas yuav tsis kav ntev. Yeej muaj tiag li nws xav.

COV KHIXATIA THAUM UB UA DABTSI THAUM LAWV TSIS MUAJ KEV TAWM TSAM?

6. Cov Khixatia thaum ub ua dabtsi thaum lawv tsis muaj kev tawm tsam?

⁶ Txawm hais tias cov Khixatia thaum ub raug kev tawm tsam ntau heev los kuj muaj tej lub caij uas lawv muaj kev thaj yeeb thiab. Lub sijhawm ntawd lawv ua dabtsi xwb? Lawv kub siab lug mus tshaj tawm txoj xov zoo thiab rau siab ntso teev tiam Yehauvas. Yehauvas thiaj foom koob hmoov rau lawv thiab “muaj neeg los ntseeg coob zuj zus ntxiv.”​—Tes Haujlwm 9:26-31.

7, 8. Piav seb Paulus thiab Yexus cov thwjtim ua dabtsi xwb thaum Vajtswv qhib kev rau lawv mus tshaj tawm.

⁷ Cov Khixatia thaum ub mob siab tshaj tawm txoj xov zoo. Xws li thaum Paulus nyob hauv Efexus thiab pom tias Vajtswv tabtom qhib hau kev rau nws qhia txoj xov zoo, nws txawm nyob hauv lub nroog ntawd kom nws thiaj tau mus tshaj tawm.​—1 Kauleethaus 16:8, 9.

⁸ Xyoo 49, thaum cov tubtxib thiab cov txwj laus hauv Yeluxalees sib sablaj thiab pom zoo tias lwm haivneeg uas los ntseeg tsis tas ua kevcai txiav los tau, Paulus thiab Yexus cov thwjtim pom tias yog ib lub caij zoo rau lawv mus qhia txoj xov zoo. (Tes Haujlwm 15:23-29) Thaum lawv coj tsab xov no mus hais qhia rau cov koom txoos tas lawd, lawv kub siab lug mus tshaj tawm thiab “sib pab qhia Vajtswv Txojlus.” (Tes Haujlwm 15:30-35) Muaj li cas xwb? Phau Vajlugkub hais tias “cov ntseeg thiaj muaj zog heev thiab niaj hnub muaj neeg los ntseeg coob zuj zus ntxiv.”​—Tes Haujlwm 16:4, 5.

THAUM MUAJ KEV THAJ YEEB NIAJ HNUB NIMNO PEB UA DABTSI?

9. (1) Nyob rau ntau lub tebchaws kev mus tshaj tawm zoo li cas? (2) Yog nom tswv tso cai rau peb mus tshaj tawm, peb yuav tau tshuaj peb tus kheej li cas?

⁹ Niaj hnub nimno, muaj ntau lub tebchaws tej nom tswv tso cai rau peb mus tshaj tawm txoj xov zoo. Lub tebchaws uas koj nyob, nom tswv puas tso cai rau koj mus tshaj tawm? Yog nom tswv tso cai, koj puas siv lub sijhawm no mus tshaj tawm thiab? Lub sijhawm kawg no yog lub sijhawm tshwj xeeb kawg rau Yehauvas cov neeg, lawv kub siab lug mus tshaj tawm thiab mus qhia txoj xov zoo thoob qab ntuj. (Malakaus 13:10) Muaj haujlwm ntau heev rau Yehauvas cov neeg ua!

10. Ob Timautes 4:2 hais kom peb ua dabtsi?

¹⁰ Yog nom tswv tso cai rau koj mus tshaj tawm, koj yuav siv lub sijhawm ntawd li cas? (Nyeem 2 Timautes 4:2.) Ua zoo xav seb yuav ua li cas koj lossis koj tsev neeg ib tug thiaj mus tshaj tawm tau ntau tshaj qub lossis ua ib tug tho kev. Nimno tsis yog lub sijhawm rau peb mus khwv nyiaj khwv txiaj kom peb nplua nuj rau qhov tej peb muaj ntawd, peb yuav coj tsis tau nrog peb thaum kev ceeblaj txom nyem loj kawg li los txog.​—Pajlug 11:4; Mathais 6:31-33; 1 Yauhas 2:15-17.

11. Cov kwvtij nkauj muam ua li cas lawv thiaj pab tau neeg coob li coob tau los paub Yehauvas?

¹¹ Nimno muaj cov tshaj tawm coob tus mus kawm lwm yam lus kom lawv thiaj li mus pab tau lwm haiv neeg los paub Yehauvas. Yehauvas lub koom haum tau tsim tej ntaub ntawv Vajlugkub ua ntau yam lus los pab peb mus tshaj tawm. Xws li xyoo 2010 peb tej ntaub ntawv Vajlugkub tsuas muaj txhais ua li 500 yam lus xwb. Tiamsis niaj hnub no muaj ntau tshaj 1,000 yam lus lawm!

12. Piav seb tibneeg xav li cas xwb thaum lawv hnov Vajtswv Txojlus ua lawv yam lus?

¹² Tibneeg xav li cas xwb thaum lawv hnov Vajtswv Txojlus ua lawv yam lus? Muaj ib tug muam uas hais ib hom lus Afika mus ib lub rooj sib txoos 3 hnub hauv tebchaws U.S.A. ua nws yam lus. Thaum lub rooj sib txoos no xaus, tus muam no hais tias: “Kuv tuaj nyob tebchaws U.S.A. no tau 17 xyoo. Xyoo no yog thawj zaug uas kuv to taub ib puas tsav yam uas lawv hais hauv lub rooj sib txoos.” Peb pom tias yeej raug tus muam no siab heev thaum nws hnov cov lus qhuab qhia ua nws yam lus. Yog koj ua tau, koj puas kam kawm lwm yam lus los pab cov uas nyob hauv koj thaj tsam? Rau qhov yog koj hais lawv yam lus tej zaum lawv yuav xav mloog txoj xov zoo dua. Yeej yuav siv dag siv zog thaum koj kawm lwm yam lus tiamsis koj yuav zoo siab heev.

13. Peb cov kwvtij hauv tebchaws Lav Xias ua dabtsi xwb thaum nom tswv tsis txwv peb tes haujlwm?

¹³ Nyob rau tej lub tebchaws, peb cov kwvtij tshaj tawm tsis tau ywj siab vim nom tswv txwv peb tes haujlwm. Xws li hauv tebchaws Lav Xias (Russia), nom tswv tsim txom peb cov kwvtij tau ntau ntau xyoo. Tiamsis lub 3 Hlis xyoo 1991 nom tswv ho tso cai rau peb cov kwvtij teev tiam Yehauvas ywj siab. Lub sijhawm ntawd hauv tebchaws Lav Xias, Yehauvas Cov Timkhawv tsuas muaj li 16,000 tus xwb. Tiamsis 20 xyoo tom qab ntawd, Yehauvas Cov Timkhawv muaj coob tshaj 160,000 tus lawm. Qhov no qhia tias peb cov kwvtij yeej rau siab ntso mus tshaj tawm rau lub sijhawm uas nom tswv tsis txwv lawv. Tiamsis lub sijhawm ntawd kav tsis ntev. Txawm li ntawd los lawv yeej tseem kub siab lug teev tiam Yehauvas.

YUAV TSIS MUAJ KEV THAJ YEEB TAS MUS LI

14, 15. Yehauvas siv nws lub hwjchim los pab Vajntxwv Axas li cas?

¹⁴ Nyob rau Vajntxwv Axas tiam, kev thaj yeeb hauv tebchaws Yudas tsuas muaj ib nyuag ntu xwb ces txawm muaj 1 plhom tawm tus tub rog tuaj tebchaws Ethi-aupias tuaj ua rog rau lawv. Tebchaws Ethi-aupias tus thawj tub rog Zelas xav hais tias nws cov tub rog yeej yuav tua yeej tebchaws Yudas. Tiamsis Vajntxwv Axas tso siab plhuav rau Vajtswv Yehauvas thiab thov Yehauvas tias: “Tus TSWV [“Yehauvas,” NWT ] uas yog peb tus Vajtswv, nimno thov koj cia li pab peb, peb tso siab rau koj, peb tuav koj lub npe tuaj tua cov tubrog uas coob heev no.”​—2 Xwmtxheej Vajntxwv 14:11.

¹⁵ Txawm hais tias tebchaws Ethi-aupias cov tub rog coob tshaj Vajntxwv Axas cov yuav luag ob npaug los Axas paub tias Yehauvas muaj hwjchim thiab muaj cuab kav pab tau Nws cov neeg. Yehauvas yeej pab Axas raws li Axas tau thov nws. Yehauvas ua rau cov tub rog Ethi-aupias swb thiab tuag tas tsis seem ib tug li.​—2 Xwmtxheej Vajntxwv 14:8-13.

16. Ua cas peb thiaj paub hais tias txojkev thaj yeeb uas peb muaj tamsim no tsuas yog ib ntus xwb?

¹⁶ Peb yeej tsis paub hais tias yav tom hauv ntej yuav zoo li cas tiamsis peb paub tias txojkev thaj yeeb uas peb muaj tamsim no tsuas yog ib nyuag ntu xwb. Yexus twb hais ua ntej lawm tias nyob rau lub sijhawm kawg “txhua haivneeg yuav ntxub” nws cov thwjtim. (Mathais 24:9) Tus tubtxib Paulus los hais tias: “Cov ntseeg Yexus Khetos txhua tus uas xav ua lub neej kom Vajtswv tau ntsejmuag, lawv yeej raug kev tsimtxom.” (2 Timautes 3:12) Xatas chim thiab npau taws kawg, peb tsis txhob xav hais tias peb yuav khiav dim nws txojkev npau taws.​—Tshwmsim 12:12.

17. Peb txojkev ntseeg yuav raug sim li cas?

¹⁷ Tshuav tsis ntev xwb, peb txojkev ntseeg yuav raug sim. Phau Vajlugkub hais tias yav tom hauv ntej yuav muaj kev ceeblaj txom nyem loj kawg uas “txij thaum chivkeeb los txog niaj hnub no” tsis tau muaj dua ib zaug li. (Mathais 24:21) Nyob rau lub sijhawm ntawd tej zaum peb tsev neeg kiag los yuav tawm tsam peb thiab tej nom tswv yuav txwv peb tes haujlwm. (Mathais 10:35, 36) Thaum ntawd, peb puas yuav ua li Vajntxwv Axas es tso siab plhuav rau Yehauvas tias nws yuav pab thiab tiv thaiv peb?

18. Raws li Henplais 10:38, 39, peb yuav ua li cas peb thiaj npaj tau rau thaum peb raug kev tawm tsam?

¹⁸ Yehauvas npaj peb tamsim no kom peb muaj kev ntseeg ruaj khov. Nws siv “tus tubtxib uas ncaj thiab muaj tswvyim” lossis tus qhev ncaj thiab ntse los “faib zaub faib mov” ntawm sab kev ntseeg rau peb raws caij raws nyoog kom peb txojkev ntseeg ruaj khov. (Mathais 24:45) Tiamsis peb txhua leej txhua tus nyias yuav tsum rau siab ntso ua kom nyias txojkev ntseeg ruaj khov.​—Nyeem Henplais 10:38, 39.

19, 20. Thaum peb nyeem 1 Xwmtxheej Vajntxwv 28:9, peb yuav tsum nug peb tus kheej li cas thiab yog vim li cas?

¹⁹ Zoo ib yam li Vajntxwv Axas, peb yuav tsum nrhiav Yehauvas. (2 Xwmtxheej Vajntxwv 14:4; 15:1, 2) Peb nrhiav Yehauvas thaum peb kawm txog nws thiab los ua kevcai raus dej. Peb ua li peb ua tau kom peb txojkev hlub rau Yehauvas ruaj khov. Yog li ntawd, zoo rau peb xav li no, ‘Kuv puas mus koom tej kev sib txoos tsis tu ncua?’ Thaum peb mus tej kev sib txoos, yuav pab kom peb rau siab teev tiam Yehauvas thiab peb yuav tau txais kev txhawb zog los ntawm peb cov kwvtij nkauj muam. (Mathais 11:28) Peb kuj sim xav li no thiab, ‘Kuv puas teem caij los kawm Vajlugkub?’ Yog koj tseem nrog koj tsev neeg nyob, txhua lub limtiam koj puas teem caij los nrog koj tsev neeg pe hawm Vajtswv ua ke? Yog koj nyob koj ib leeg koj puas teem caij los pe hawm Vajtswv thiab? Koj puas rau siab ntso mus tshaj tawm thiab qhia txoj xov zoo rau lwm tus?

²⁰ Vim li cas peb yuav tsum xav txog cov lus nug ntawd? Phau Vajlugkub hais tias Yehauvas “paub txhua yam uas peb xav thiab txhua yam uas peb npaj siab ua lawm.” (Nyeem 1 Xwmtxheej Vajntxwv 28:9.) Yog li ntawd peb yuav tsum tshuaj peb tus kheej ib yam li ntawd thiab. Yog peb paub hais tias muaj tej yam uas peb yuav tau hloov xws li peb lub homphiaj, peb tus cwjpwm, lossis peb txojkev xav ces peb yuav tau thov Yehauvas pab peb hloov. Peb yuav tsum npaj peb tus kheej tamsim no rau tej kev sim siab uas yuav los raug peb yav tom hauv ntej. Lub caij uas peb muaj kev thaj yeeb, cia peb muab siab teev tiam Yehauvas thiab tsis txhob cia ib yam dabtsi los tab kaum peb!