YUAV UA CAS THIAJ KOV YEEJ KEV SIB NTXUB

4 | Vajtswv Yuav Pab Peb Kov Yeej Kev Ntxub Ntxaug

Phau Vajlugkub Qhia Tias:

‘Lub hwj huam dawb huv yuav ua rau neeg muaj lub siab sib hlub, zoo siab, nyob kaj siab lug, ua siab ntev, muaj lub siab dawb siab zoo, zoo siab hlo pab lwm tus, ua siab ncaj, tsis khav theeb thiab paub tswj yus lub siab.’—KALATIAS 5:22, 23.

Nqe No Txhais Tias:

Peb yog neeg txhaum xwb ces yeej tsis yooj yim rau peb hlub lwm leej lwm tus. Yuav tsum muaj Vajtswv lub hwj huam pab, peb thiaj yuav hloov tau peb lub siab. (Phau Ntawv Nkauj 121:2) Yog peb cia Vajtswv pab peb, peb yuav hais tau li tus tub txib Paulus tias: “Kuv yeej ua tau txhua yam vim muaj Vajtswv uas txhawb kuv lub zog.”—Filipis 4:13.

Peb Xyaum Nqe No Li Cas:

“Yehauvas pab kuv, kuv thiaj hloov tau lub niag siab tsiv tsaim no los ua lub siab mos siab muag lawm.”—VADAUM

Taij thov Yehauvas pub nws lub hwj huam dawb huv rau koj. (Lukas 11:13) Thov Vajtswv kom nws pab koj coj tau tus cwj pwm zoo. Kawm txog tej cwj pwm zoo hauv phau Vajlugkub xws li kev hlub, kev sib haum xeeb, ua siab ntev, thiab paub tswj lub siab. Xav seb koj yuav xyaum tej cwj pwm no rau thaum twg. Nrog cov uas coj zoo, lawv thiaj txhawb tau koj hlub thiab ua zoo rau lwm leej lwm tus.—Henplais 10:24.

VADAUM (WALDO)—Piav Nws Lub Neej

Tso Kev Ua Nruj Ua Tsiv Tseg

Thaum Vadaum tseem yau nws ntsib ntau yam kev nyuaj siab uas ua rau nws muaj kev chim puv npo. Nws hais tias: “Kuv ib sij mus nrog cov neeg muag yeeb muag tshuaj sib ntaus. Muaj ib zaug kuv cov yeeb ncuab ntiav ib tug neeg tuaj tua kuv. Kuv raug nkaug ib riag tiam sis kuv khiav dim lawm.”

Thaum Vadaum poj niam pib kawm Vajlugkub nrog Yehauvas Cov Tim Khawv, Vadaum tsis nyiam kiag li. Nws hais tias: “Kuv ntxub cov Tim Khawv heev. Ntau zaus kuv muab lawv cem ua lwj ua liam. Tiam sis txhua zaus lawv tsuas ua lub siab tus tus xwb.”

Ces ntev mus ntev tuaj Vadaum txawm pib kawm Vajlugkub. Nws hais tias: “Yeej tsis yooj yim rau kuv coj raws li tej uas kuv kawm. Kuv lub siab luv dhau lawm, kuv ntseeg tias kuv yeej hloov tsis tau li.” Tiam sis Vadaum kawm tau ib yam hauv phau Vajlugkub uas pab tau nws.

Vadaum hais tias: “Muaj ib hnub tus uas tuaj qhia kuv hais kom kuv nyeem Kalatias 5:22, 23. Nws hais tias yuav kom kuv coj tau li ob nqe no, yuav tsum muaj Vajtswv lub hwj huam pab kuv. Tsis yog kuv lub peev xwm nkaus xwb. Thaum ntawd kuv mam pom tias kuv yeej hloov tau.”

Vim Vadaum tso siab rau Vajtswv nws thiaj tso tau txoj kev ntxub tseg. Nws hais tias: “Kuv tej txheeb ze thiab tej qub phooj ywg ntseeg tsis tau tias kuv hloov hlo kuv tus cwj pwm lawm.” Vadaum kuj hais ntxiv tias: “Vim muaj Yehauvas pab kuv, kuv thiaj hloov tau lub niag siab tsiv tsaim no los ua lub siab mos siab muag lawm.”