Yus Tus Neeg Tas Sim Neej

Ib tug ntxhais hu ua Diav nyob tebchaws Auxitalia hais tias: “Muaj ib hnub kuv tus nus txawm tuag lawm. Kuv ua tsis tau ib yam dabtsi los pab nws li. Nws twb tuag tau ntau lub hli lawm los, tej thaud kuv xav dheev txog nws, mob kuv siab cuag li riam hlais. Muaj tej zaus kuv tseem npau taws rau nws tias ua cas nws cia li tso peb tseg. Kuv khuvxim tias cas thaum nws tseem nyob kuv tsis lauj sijhawm ntau nrog nws ua ke.”

THAUM peb tus neeg tas sim neej lawd yuav ua rau peb nyuaj siab ntau yam. Tej tug yuav tu siab, tej tug ho kho siab, tej tug txhawj ntshai ntau yam. Muaj dua lwm tus tsis pom qab vam khom leejtwg. Kuj muaj cov uas npau taws tias lawv tus neeg tso lawv tseg, lossis khuvxim ntau yam txog nws lub neej. Ntshe yuav tu siab tias xyov puas tsim nyog ua neej nyob lawm thiab.

Tej zaum yus yuav nco yus tus neeg ntev loo yus lub siab mam li nqeg. Txawm yus quaj ntsuag los yeej tsis txhaum, twb yog yus hlub yus tus neeg xwb. Ua li puas muaj dabtsi nplig tau peb lub siab?

DABTSI YUAV NPLIG TAU PEB SIAB?

Ntshe koj xav tias yuav tsis muaj ib hnub rov kaj siab li. Tiamsis cov ntsiab lus nram no yuav nplig tau koj siab.

QUAJ NTSUAG TSIS TXHAUM

Ib tug quaj ntsuag tsis thooj ib tug. Nco ntsoov tias yog yus quaj yuav pab tau yus thiab. Diav hais tias: “Thaum kuv quaj ib pluag tas, kuv lub siab nqeg lawm ntau.” Muaj ib tug pojniam hu ua Ntxoo, nws tus niam hluas cia li tuag lawm. Ntxoo hais tias: “Thaum kuv xav txog nws mas mob kuv siab kawg li. Tiamsis kuv yuav tsum xav txog nws li no, kuv thiaj ua taus ib siab. Zoo ib yam li lub qhov txhab uas muab tev los ntxuav es mob heev nyiaj tsis taus kiag li. Tiamsis dhau ntawd lub qhov txhab yuav nqawm zuj zus.”

QHIA KOJ TEJ KEV NYUAJ SIAB RAU LWM TUS

Muaj tej lub sijhawm koj yuav tsis xav npoo leejtwg. Tiamsis yog koj tsis tham koj tej kev nyuaj siab rau lwm tus ces yuav zoo ib yam li koj ris lub nra hnyav heev es tsis kam leejtwg pab li. Ntses yog ib tug tub hluas 17 xyoo. Nws txiv tau tas sim neej lawm. Nws hais tias: “Lub sijhawm ntawd, kuv nyuaj siab heev tiamsis kuv qheb siab lug nrog lwm tus tham. Kuv tham tom ntej tom qab xwb xyov luag puas to taub kuv li los twb pab tau kuv lawm ntau.” Hauv thawj zaj peb kawm txog Lig, nws hais ntxiv tias: “Thaum kuv qheb siab lug qhia rau lwm tus yeej pab tau kuv tiag. Ua rau kuv pom tias lwm tus kuj nrog kuv mob siab thiab, tsis yog kuv ib leeg xwb.”

CIA LWM TUS PAB

Ib tug kws kho mob hais tias: “Cov uas muaj ib tug tas sim neej lawd yuav quaj ntsuag lawv tus neeg heev. Yog lawv cia lwm tus pab tamsid, feem coob yeej thev taus dua thiab tsis quaj ntsuag ntev npaum twg.” Koj cov phoojywg nruab ze yeej xav pab koj tiamsis tej zaum lawv tsis paub tias yuav pab li cas. Cia lwm tus pab koj. Qhia koj tej kev nyuaj siab rau lwm tus seb koj xav kom lawv pab koj li cas.—Paj Lug 17:17.

TXAV ZE RAU VAJTSWV

Tiaj hais tias: “Kuv tus txiv mob kheeb xawm ces nws txawm tuag lawm. Kuv qhia tsis tau kuv tej kev nyuaj siab rau nws lawm, kuv thiaj qhia rau Vajtswv xwb. Kuv thov Vajtswv txhua hnub kom nws pab kuv ua taus neej mus ntxiv. Nws yeej pab kuv kawg li tiag.” Phiab muaj 22 xyoos thaum nws niam tuag lawm. Nws hais tias: “Qhov uas nplig tau kuv siab tshaj yog kuv niaj hnub nyeem phau Vajlugkub. Tej uas kuv nyeem txhawb tau kuv lub zog heev.”

VAJTSWV YUAV TSA COV TUAG ROV LOS

Tiaj hais ntxiv tias: “Thaum kuv tus txiv nyuam qhuav tso peb tseg mas lo lus cog tseg txog cov tuag pab tsis tau kuv li rau qhov peb cov niam tub xav tau peb txiv nrog peb nyob tamsim ntawd. Tiamsis nimno nws tuag tau 4 lub xyoos lawm, kuv niaj hnub xav txog Vajtswv lo lus cog tseg. Kuv xav ntsoov txog thaum kuv rov pom kuv tus txiv dua, thiaj ua rau kuv xyiv fab ua neej nyob xwb. Cuag li txojkev vam ntawd tuav kuv txojsia ntag.”

Tej zaum yuav siv sijhawm ntev loo koj lub siab mam kaj, lub kua muag mam tu. Txawm li ntawd los, nco ntsoov Diav cov lus no: “Yus yeej xav tias ntshe yus yuav mob siab mus li xwb, tiamsis ntev mus ntev tuaj yus kuj rov kaj siab lawm thiab.”

Txawm koj yuav nco koj tus neeg mus li los, nco ntsoov tias koj txojsia muaj nqes heev thiab yeej tsim nyog koj ua neej nyob. Vajtswv hlub koj heev. Nws yuav pab kom koj lub neej muaj hauv paus hauv ntsis, thiab kom koj muaj kev sib raug zoo nrog tej phoojywg nruab ze. Tsis ntev xwb Vajtswv yeej yuav tsa cov tuag sawv rov los muaj txojsia dua. Nws xav kom koj rov tau nrog koj tus neeg nyob ua ke. Thaum ntawd yuav tsis mob koj siab ib zaug li lawm!

Tej Nqe Vajlugkub Uas Pab Tswvyim

Vajtswv mob siab cov quaj ntsuag.

Ib tug sau nkauj hais rau Vajtswv tias: “Koj . . . khaws kuv tej kua muag rau hauv koj lub thauv, thiab muab sau huvsi cia rau hauv koj phau ntawv lawm.”—Ntawv Nkauj 56:8.

Qheb koj lub siab rau Vajtswv.

‘Kuv qhia kuv tej kev txom nyem rau nws . . . Au Yehauvas,a kuv tsa ncauj thov koj.’—Ntawv Nkauj 142:2, 5.

Koj tseem muaj vam thiab.

“Cov ncaj ncees . . . yuav sawv hauv qhov tuag rov los.”—Tubtxib Tes Haujlwm 24:15.

Vajtswv cog lus tias nws yuav tsa cov tuag sawv rov los. Nws tos ntsoov hnub uas yuav muaj tiav li ntawd.b—Yauj 14:14, 15.

a Phau Vajlugkub qhia tias Vajtswv lub npe hu ua Yehauvas.

b Yog xav paub ntxiv txog qhov uas tsa cov tuag sawv rov los, mus saib zaj kawm 30 hauv phau ntawv Nyob Kaj Siab Lug Mus Ib Txhis uas Yehauvas Cov Timkhawv luam tawm, theej tawm dawb xwb hauv www.pr418.com/hmn.