Ua Siab Tuab Thiab Nyob Sib Haum Xeeb
1 Thaum peb mus tshaj tawm, peb ntsib coob tus uas tsis ntseeg raws li qhov tseeb hauv phau Vajlugkub. Vim li ntawd, peb yuav tau ua siab tuab thiab ‘nrog luag nyob sib haum xeeb’ es tsis txhob ua rau luag chim. (Loos 12:18; Ttx. 4:29) Yog li ntawd, thaum peb mus tshaj tawm txoj xov txog lub Nceeg Vaj, peb yuav ua li cas thiaj ua tau siab tuab thiab nyob sib haum xeeb nrog luag?
2 Xav Seb Yuav Hais Li Cas Thiaj Haum Luag: Tus neeg uas nrog luag nyob sib haum xeeb tsis nyiam sib cav sib ceg. Nco ntsoov tias yog peb nrog tus tswv tsev sib cav txog nws txojkev ntseeg hajyam yuav ua rau nws tsis xav mloog tej uas peb qhia. Yog nws hais tau tej yam uas tsis raws li phau Vajlugkub qhia, peb yuav tau nrhiav ib yam los hais kom haum nws. Yog peb tham txog tej uas lawv thiab peb ntseeg mus tib seem ces peb yuav qhia tau qhov tseeb raug lawv siab.
3 Yog tus tswv tsev hais tej yam uas twb tsis yog rau peb es peb tsis teb li cas rau nws li, puas yog peb kuj ntseeg li nws thiab? Tsis yog. Peb txoj haujlwm tsis yog los nrog lwm tus sib cav txog txhua yam lawv ntseeg uas tsis raws phau Vajlugkub, tiamsis yog los tshaj tawm txoj xov zoo txog lub Nceeg Vaj xwb. (Mth. 24:14) Thaum tus tswv tsev hais ib yam dabtsi tsis yog, peb tsis txhob maj npau taws, tiamsis muab nws tej lus coj los ua tib zoo xav peb thiaj li paub tias nws xav li cas hauv nruab siab xwv peb thiaj pab tau nws.—P.L. 16:23.
4 Txuag Luag Ntsej Muag: Muaj tej lub sijhawm peb yuav tau ua siab tuab siab tawv thaum peb nrog luag sib cam txog tej kev qhia cuav. Txawm li ntawd los, peb yuav tau ua zoo es tsis txhob thuam lossis hais lus siab lawv thiab lawv txojkev ntseeg, peb thiaj nrog lawv sib haum xeeb. Kev khav theeb ua rau luag txav deb, tiamsis kev txo hwjchim thiab ua zoo rub tau cov uas nrhiav qhov tseeb lub siab. Vim li no, peb yuav tau txuag cov uas peb nrog tham ntsej muag es saib taus lawv thiab lawv txojkev ntseeg thiaj yoojyim rau lawv los txais yuav txoj xov uas peb qhia.
5 Tus tubtxib Povlauj muab cov uas nws nrog tham tej kev ntseeg coj los xav kom nws thiaj qhia tau txoj xov zoo raug lawv siab. (Ttx. 17:22-31) Yog li ntawd, Povlauj thiaj “yeem ua txhua yam neeg rau txhua tus kom thiaj siv txhua txojkev pab tau qee leej dim.” (1Khl. 9:22) Cia peb xyaum Povlauj tus qauv es nrog luag nyob sib haum xeeb thiab ua siab tuab tshaj tawm txoj xov zoo.