‘Nrog Luag Nyob Sib Haum Xeeb’
1. Yog tias peb ntsib tej tug uas npau taws heev, Loos 12:18 pab tau peb li cas?
1 Yehauvas cov tibneeg xav nrog txhua tus nyob sib haum xeeb. Tes num uas peb ua pab kom tibneeg nyob sib haum xeeb. (Yxy. 52:7) Tiamsis muaj tej lub sijhawm tej tug yuav npau taws heev rau peb vim peb mus khob lawv qhov rooj. Thaum muaj li ntawd, peb yuav ua siab ntev li cas?—Loos 12:18.
2. Vim li cas peb yuav tsum ua neeg thoob tsib?
2 Ua Neeg Thoob Tsib: Ib txhia npau taws rau peb vim lawv tsis nyiam qhov tseeb. Muaj dua lwm cov uas nyiam txoj xov zoo, tiamsis lawv npau taws vim lawv ntxhov siab rau lwm yam. Tej zaum peb mus rau lub sijhawm uas lawv tsis xyeej, tab kaum lawv haujlwm lawm; lossis tej zaum lawv muaj kev txhawj xeeb ntau yam. Txawm tibneeg tsis nyiam los xij, peb yuav tsum nco ntsoov tias Xatas twb dag ntxias coob leej ntau tus hauv lub qab ntuj no yuam kev lawm, lawv thiaj tawm tsam txoj xov zoo. (2Khl. 4:4) Yog peb thoob tsib, ces peb yuav tsis chim sai thiab tsis tu siab.—P.L. 19:11.
3. Peb yuav tsum saib taus tus tswv tsev li cas?
3 Saib Taus Lwm Tus: Nyias coj nyias ib txoj kevcai, thiab nyias ntseeg nyias lawm ib yam. Tsis zoo rau peb hais lus siab tus tswv tsev, lossis ua saib tsis taus nws. (2Khl. 10:4) Tus tswv tsev muaj cai txiav txim seb nws yuav mloog los tsis mloog txoj xov zoo uas peb qhia. Yog nws hais kom peb tawm mus qhia lwm qhov, peb yuav tsum ua raws li nws hais.
4. Peb yuav hais lus mos muag li cas?
4 Hais Lus Mos Lus Muag: Thaum peb mus qhia Vajlugkub yuav muaj tej tug cem taw tes nki rau peb. Txawm li ntawd los peb yuav tsum hais lus mos lus muag rau lawv xwb. (Khx. 4:6; 1Pt. 2:23) Yog tias zoo nug ces mam li nug seb yog vim li cas nws ho hais tej lus ntawd. Tsis txhob nrog tus tswv tsev sib cav. Tej zaum zoo rau peb tham txog tej yam uas nws nyiam thiab xav paub xwb. Tiamsis yog nws npau taws heev ces tsis txhob tham ntxiv lawm. Zoo dua rau peb mus qhia lwm tus.—P.L. 9:7; 17:14.
5. Vim li cas peb yuav tsum paub coj thiab ua siab ntev thaum peb qhia Vajlugkub?
5 Yog tias peb paub coj thiab ua siab ntev rau tus tswv tsev, nws yuav nco ntsoov peb tus yam ntxwv zoo. Lwm zaus Yehauvas cov Timkhawv mus khob nws qhov rooj, tej zaum nws kuj yuav mloog lawv qhia thiab. (Loos 12:20, 21) Tej tug ntxim tsis kam mloog thiab tawm tsam peb heev, tiamsis tej zaum muaj ib hnub lawv yuav los teev tiam Yehauvas thiab. (Klt. 1:13, 14) Txawm tias tibneeg yuav los paub qhov tseeb thiab tsis paub los, cia peb tswj peb lub siab thiab ua siab ntev rau txhua tus, thiaj qhuas tau Yehauvas thiab ua rau lwm tus qhuas txog txoj xov zoo.—2Khl. 6:3.