Xyuam Xim Thaum Mus Qhia Vajlugkub
1. Vim li cas peb yuav tsum xyuam xim thaum mus qhia Vajlugkub?
1 Tiam peb nyob no neeg “phem thiab nkhaus” kawg li. Vajtswv cov tub qhe thiaj zoo li tus ‘yaj uas nyob hauv pab hma.’ (Mth. 10:16; Flp. 2:15) Peb nyob rau lub caij ntuj fa teb lam, muaj kev kub ntxhov puag ncig peb. Tibneeg nyiam ua nruj ua tsiv thiab muaj tub sab pheej nyiag tibneeg. Tej no ua pov thawj tias, tiam no tsuas muaj “phem heev zuj zus” lawm xwb. (2Tmt. 3:13) Thaum peb mus qhia Vajlugkub, peb yuav xyaum cov nqe Vajlugkub twg, thiaj qhia tias peb “ntse” thiab xyuam xim?—Mth. 10:16.
2. Zoo rau peb mus qhia Vajlugkub lwm qhov, thaum peb pom dabtsi?
2 Xyuam Xim: Paj Lug 22:3 qhia tias tus neeg muaj tswvyim yuav “tsiv nraim” thaum nws pom tej xwm txheej phem. Peb yuav tsum paub ceev faj! Nco ntsoov tias thaj chaw zoo los kuj muaj teeb meem thiab. Tej zaum koj pom tub ceev xwm tuaj ntawm txojkev uas koj tab tom qhia Vajlugkub, lossis koj pom tibneeg tawm tuaj nphoo ntxuas ntawm kev. Tej zaum cov tibneeg uas nyob koog ntawd yuav ceeb toom kom koj ceev faj. Yog muaj li no, thov tsis txhob lam mus xauj lossis nyob ib cag ntsia seb yuav muaj li cas. Peb yuav tsum xyuam xim, es tawm mus qhia lwm qhov.—P.L. 17:14; Yh. 8:59; 1Thxk. 4:11.
3. Thaum peb mus qhia Vajlugkub, lub hauv paus ntsiab lus ntawm Laj Lim Tswvyim 4:9 pab peb li cas?
3 Yuav Tsum Sib Pab: Laj Lim Tswvyim 4:9 qhia tias “ob leeg zoo dua ib leeg.” Tej zaum koj ib txwm mus qhia Vajlugkub koj ib leeg xwb. Puas zoo rau peb ua li ntawd? Muaj tej koog kuj tsis muaj teeb meem dabtsi. Tiamsis lwm koog, tsis zoo rau ib tug muam lossis ib tug hluas, mus qhia Vajlugkub lub tsev rau lub, ib leeg xwb. Hajyam tsis zoo rau nws qhia thaum yav tsaus ntuj thiab. Tseem ceeb rau peb coj ib tug ua peb luag mus. (L.Tsy. 4:10, 12) Peb yuav tsum pab saib xyuas cov kwvtij nkauj muam uas nrog peb mus qhia Vajlugkub thiab. Yog tias koj yuav tawm koog uas nej qhia, mus rau lwm qhov nco ntsoov qhia rau lawv paub.
4. Peb yuav tiv thaiv txhua tus hauv lub koom txoos li cas?
4 Cov txwj laus yog cov uas “zov tu nej” sawvdaws, yog li ntawd lawv tuav tes haujlwm saib xyuas cov kwvtij nkauj muam uas nyob rau koj koog. (Hnpl. 13:17) Yog peb txo hwjchim mloog lawv lus, Yehauvas yuav foom koob hmoov rau peb. (Mkh. 6:8; 1Khl. 10:12) Thov kom Vajtswv cov tub qhe ua timkhawv zoo rau sawvdaws pom, thiab ua neeg xyuam xim rau txhua lub sijhawm.