Pawg Uas Koj Sib Txoos Mus Qhia Vajlugkub Pab Tau Koj Li Cas?
1. Txawm tias peb tsis muaj lub Koom Txoos Kev Kawm Vajlugkub ua tej pawg me hauv tsev lawm los, peb tseem tau kev txhawb zog li cas?
1 Yav tas los peb muaj lub Koom Txoos Kev Kawm Vajlugkub ua tej pawg me hauv tej tsev. Thaum ntawd tsis muaj neeg coob yoojyim zeem phoojywg heev, thiab ib leeg txhawb tau ib leeg txojkev ntseeg. (P.L. 18:24) Vim tsis muaj neeg coob li ntawd, cov kwvtij uas saib xyuas tej pawg, thiaj paub zoo txog tej yam uas sawvdaws tu ncua, thiab txhawb tau lawv lub zog. (P.L. 27:23; 1Pt. 5:2, 3) Tej zaum peb tseem nco thiab tshua txog txojkev sib txoos ntawd. Tiamsis tej pawg uas peb sib txoos mus qhia Vajlugkub tamsim no, kuj txhawb tau sawvdaws ib yam li yav tas los thiab.
2. Peb yuav ntaus thawj hlo nrog cov kwvtij nkauj muam hauv peb pawg, sib raug zoo li cas?
2 Ntaus Thawj Hlo: Tau muab lub koom txoos faib ua tej pawg coob ib yam li yav thaud, los sib txoos mus qhia Vajlugkub ua ke thiab. Yog tias peb siv sijhawm mus qhia Vajlugkub nrog cov kwvtij nkauj muam hauv peb pawg, peb yuav haj yam ncawg lawv thiab nrog lawv sib raug zoo. (Flp. 1:27) Koj twb nrog pes tsawg tus hauv koj pawg, mus qhia Vajlugkub ua ke lawd? Koj puas ua “siab dav” nrog txhua tus mus? (2Khl. 6:13) Tsis tas li ntawd xwb, tej lub sijhawm kuj zoo rau koj caw ib ob tug hauv koj pawg tuaj nrog koj tsev neeg koom hmo pe hawm Vajtswv ua ke, lossis caw lawv tuaj nrog koj noj hmo ua ke zaum puav. Muaj tej lub koom txoos tau npaj kom cov pawg, sib hloo nto tos txais tus kwvtij uas tuaj qhuab qhia hauv lub koom txoos, los noj mov. Txawm tias tus kwvtij yuav nyob noj thiab tsis nyob los xij, pawg ntawd yeej mus koom noj los sib txhawb zog.
3. Hauv cov pawg, muaj kev sib txhawb zog li cas?
3 Txawm tias nimno ib lub lim tiam twg, peb tsuas sib txoos 2 zaug ua ke lawm xwb los, peb tseem muaj cov kwvtij saib xyuas peb tsis tu ncua ib yam li yav thaud thiab. Tau npaj ib co kwvtij los saib xyuas tej pawg uas sib txoos mus qhia Vajlugkub ua ke. Lawv yuav tau txhawb thiab cob lawv pawg kom txawj mus ua Vajtswv tes num. Yog tias tus kwvtij uas saib xyuas koj pawg tsis tau teem caij nrog koj mus tshaj tawm, koj kuj teem caij nrog nws ua ke ib zaug. Tsis tas li ntawd xwb, kuj muaj tus kwvtij uas saib xyuas kev qhia Vajlugkub los txhawb cov pawg thiab. Ib lub hlis twg, nws yuav tau nrog 1 pawg mus qhia Vajlugkub ua ke 1 zaug, rau Hnub 6 (Saturday) thiab Hnub 7 (Sunday). Cov koom txoos tsawg tsawg uas muaj ob peb pawg xwb, ib xyoos twg tus kwvtij yuav nrog 1 pawg mus qhia Vajlugkub ua ke 2 zaug. Koj puas tau teem caij nrog nws mus ua ke, thaum nws tuaj txhawb koj pawg thiab?
4. (a) Yuav sib txoos mus qhia Vajlugkub li cas? (b) Vim li cas ho zoo rau peb qheb tsev rau cov kwvtij sib txoos ua ke mus qhia Vajlugkub?
4 Zoo rau nyias nrog nyias pawg mus qhia Vajlugkub Hnub 6 thiab Hnub 7. Yuav tau npaj tej chaw sib txoos, ib lub nyob rau ib qho, thiab muab teem rau tib lub sijhawm. Ua li no thiaj yoojyim rau cov tshaj tawm mus koom, thiab mus qhia hauv lawv koog. Kuj yoojyim rau cov kwvtij faib haujlwm sai dua kom nyias tau hau ntsoov mus rau nyias koog, tsis tau theem ntev theem ntau. Kuj pab kom tus kwvtij uas saib xyuas ib pawg twg, paub txhua tus uas nyob hauv nws pawg thiab. Tej lub koom txoos ho npaj kom txhua pawg sib txoos mus tshaj tawm ua ke, rau thawj Hnub 6, txhua lub hlis. Lwm cov hais kom sawvdaws sib txoos ua ke mus tshaj tawm tom qab kawm phau The Watchtower tas. Yog tias sawvdaws yuav sib txoos li no, zoo rau tej pawg nyias los zaum ze rau nyias tus kwvtij uas saib xyuas nyias pawg. Yog tias lawv zaum ze nws, yuav yoojyim rau nws siv ob peb feeb los faib lawv ua tej pab mus qhia Vajlugkub ua ntej tus kwvtij uas coj, xaus lus thiab thov Vajtswv.—Mus saib lub ntsiab me hu ua “Koj Puas Kam Qheb Koj Lub Tsev?”
5. Txawm tias peb tsis muaj lub Koom Txoos Kev Kawm Vajlugkub hauv tej tsev lawm los, peb tso siab rau Yehauvas li cas?
5 Txawm tias peb tsis muaj lub Koom Txoos Kev Kawm Vajlugkub ua tej pawg me hauv tsev lawm los, Yehauvas yeej tsom kwm peb txhua txojke, peb yeej tsis tu pluas. (Hnpl. 13:20, 21; Nt.Nk. 23:1) Peb yuav tau “sau” koob hmoov ntau yam los ntawm tej pawg uas sib txoos ua ke mus qhia Vajlugkub, yog tias peb ntaus thawj hlo nrog peb pawg sib raug zoo.—2Khl. 9:6.
[Ntsiab me nyob sab 8]
Koj Puas Kam Qheb Koj Lub Tsev?
Tej txhia koom txoos tau muab ob peb pawg los tso ua ke mus tshaj tawm, Hnub 6 thiab Hnub 7, vim tias tsis tau tsev rau sawvdaws siv los sib txoos. Txojkev sib txoos mus tshaj tawm muaj feem nrog tes haujlwm hauv lub koom txoos. Yog li ntawd, yog ib txoj koob hmoov zoo kawg li rau peb qheb tsev rau lub koom txoos siv. Ua li koj puas kam qheb koj lub tsev thiab? Thov tsis txhob yig li, tsis txhob xav tias koj lub tsev tsis tsim nyog siv los sib txoos. Cov txwj laus mam li muab tsom xam seb koj lub tsev puas nyob ncaj ke, puas muaj cov tshaj tawm uas nyob ze ib ncig ntawm koj. Yog tias koj xav qheb koj lub tsev, thov koj qhia rau tus kwvtij uas saib xyuas koj pawg paub.