Kev Sib Txoos Mus Qhia Vajlugkub Uas Pab Tau Peb Tshaj Txoj Xov Zoo

1. Cov kev sib txoos mus qhia Vajlugkub pab tau peb li cas?

¹ Muaj ib zaug, Yexus tau ntsib nrog nws 70 tus thwjtim ua ntej lawv mus tshaj tawm txoj xov zoo. (Lk. 10:1-11, NWT) Nws txhawb lawv lub zog tias “tus tswv teb,” uas yog Yehauvas, yuav coj lawv txoj hauv kev. Nws kuj qhia kom lawv paub mus tshaj txoj xov zoo, thiab nws muab lawv faib “ua ib nkawg ib nkawg” mus ua ke. Niaj hnub no los, cov kev sib txoos ua ntej mus qhia Vajlugkub yeej zoo tib yam li thaud thiab. Cov kev sib txoos ntawd pab txhawb peb lub zog, qhia kom peb paub tshaj txoj xov zoo, thiab yog lub sijhawm uas muab peb faib kom muaj khub mus qhia Vajlugkub.

2. Kev sib txoos mus qhia Vajlugkub yuav txoos ho ntev lawm xwb?

² Tamsim no, kev sib txoos mus qhia Vajlugkub yog ntev li 10 mus rau 15 feeb nrog rau lub sijhawm muab sawvdaws faib, qhia koog rau sawvdaws mus, thiab thov Vajtswv xaus. Tiamsis pib lub 4 Hlis mus, kev sib txoos mus qhia Vajlugkub yuav muab hloov kom ntev li 5 mus rau 7 feeb lawm xwb. Li no thiaj tsis cuam tshuam cov tho kev lossis cov tshaj tawm lub sijhawm yog tias lawv twb pib mus tshaj tawm ua ntej kev sib txoos mus qhia Vajlugkub lawm. Tiamsis thaum sib txoos mus qhia Vajlugkub tom qab ib txojkev sib txoos twg, yuav tsum siv sijhawm kom luv tshaj 5 mus rau 7 feeb rau qhov sawvdaws twb tau kev txhawb zog tas lawm. Yog ua li no, sawvdaws thiaj muaj sijhawm mus tshaj tawm ntau dua.

3. Yuav npaj tej kev sib txoos mus qhia Vajlugkub li cas thiaj pab tau cov tshaj tawm?

³ Yuav tsum npaj tej kev sib txoos mus qhia Vajlugkub kom pab tau cov tshaj tawm sawvdaws. Muaj ntau lub koom txoos cia tej pawg uas sib txoos mus qhia Vajlugkub nyias ntsib nrog nyias pawg es tsis sau sawvdaws tuaj ua ke rau ib qho chaw xwb. Ua li no nyaj yuav yoojyim dua rau cov tshaj tawm mus koom kev sib txoos mus qhia Vajlugkub thiab mus rau koog uas lawv yuav mus qhia Vajlugkub. Tsis tas li ntawd xwb, yog nyias mus ntsib nrog nyias pawg ces yuav tsis siv sijhawm ntev faib sawvdaws thiab yuav yoojyim rau cov saib xyuas saib cov uas nyob hauv lawv pawg. Pab txwj laus mam txiav txim seb qhovtwg zoo dua, sawvdaws tuaj txoos ua ke lossis nyias mus ntsib nrog nyias pawg. Ua ntej thov Vajtswv xaus, txhua tus yuav tsum paub tias lawv yuav mus nrog leejtwg thiab yuav mus rau qhovtwg.

4. Vim li cas kev sib txoos mus qhia Vajlugkub ho tseem ceeb npaum li lwm txojkev sib txoos thiab?

⁴ Kev Sib Txoos Mus Qhia Vajlugkub Tseem Ceeb Npaum Li Lwm Txojkev Sib Txoos Thiab: Kev sib txoos mus qhia Vajlugkub yog npaj los txhawb cov uas yuav mus tshaj tawm xwb ces tej zaum muaj tej tug hauv lub koom txoos yuav tsis tuaj koom. Txawm li no los, tej kev sib txoos ntawd yeej tseem ceeb npaum li lwm txojkev sib txoos uas lub koom txoos muaj thiab. Yehauvas tau npaj cov kev sib txoos no los pab peb ib leeg txhawb ib leeg kom sib hlub thiab ua haujlwm zoo. (Hnpl. 10:24, 25) Yog li ntawd, tus saib xyuas yuav tau ua zoo npaj xwv tej lus lawv sib tham thiaj qhuas tau Yehauvas thiab txhawb tau cov uas tuaj sib txoos. Yog mus tau, cov uas mus tshaj tawm yuav tsum mus koom kom tau kev sib txoos mus qhia Vajlugkub.

5. (1) Tus saib xyuas kev qhia Vajlugkub yuav tsum npaj li cas rau kev sib txoos mus qhia Vajlugkub? (2) Ib tug muam yuav ua li cas thaum nws coj kev sib txoos mus qhia Vajlugkub?

⁵ Tus Coj Yuav Tau Npaj Li No: Yuav kom ib tug twg npaj tau zaj uas nws yuav tham zoo, nws yuav tsum paub ua ntej seb zaj ntawd yog dabtsi. Tej kev sib txoos mus qhia Vajlugkub los kuj zoo tib yam li ntawd thiab. Thaum cov pawg nyias ntsib nrog nyias pawg, cov uas saib xyuas lossis cov uas pab lawv mam li ua cov coj kev sib txoos mus qhia Vajlugkub. Tiamsis thaum twg txhua pawg yuav tuaj sib txoos ua ke, tus saib xyuas kev qhia Vajlugkub yuav tsum xaiv ib tug los ua tus coj. Muaj ib txhia uas saib xyuas kev qhia Vajlugkub nyiam ua ib daim kom tswj es muab faib rau cov ntawd ib leeg ib daig thiab muab ib daim rhais rau ntawm phab ntsa. Thaum tus saib xyuas kev qhia Vajlugkub xaiv cov kwvtij ntawd, nws yuav tsum ua tib zoo xaiv seb tus twg paub qhia thiab paub faib sawvdaws kom kev sib txoos mus qhia Vajlugkub thiaj mus tau zoo. Yog tej hnub tsis muaj cov txwj laus, cov tub leg num, lossis cov kwvtij uas paub tab thiab ua kevcai raus dej lawm ib tug khoom coj, tus saib xyuas kev qhia Vajlugkub yuav tau xaiv ib tug muam uas paub tab thiab ua kevcai raus dej lawm los ua tus coj.​—Mus saib lub ntsiab “Thaum Ib Tug Muam Yuav Tau Ua Tus Coj.”

6. Vim li cas ho tseem ceeb rau tus coj kev sib txoos ua zoo npaj?

⁶ Thaum twg peb muaj ib zaj yuav tham rau Kev Kawm Tshaj Tawm lossis rau Kev Kawm Ua Vajtswv Tes Num, peb yeej saib zaj ntawd tseem ceeb es ua zoo npaj kom zoo. Peb yeej tsis tos txog thaum peb twb sawv kev tuaj kev sib txoos es mam li xav seb peb yuav tham li cas. Tes haujlwm coj kev sib txoos mus qhia Vajlugkub los peb yuav tsum saib kom tseem ceeb tib yam li ntawd thiab. Zaum no kev sib txoos mus qhia Vajlugkub hajyam luv dua lawm, tseem ceeb rau tus coj yimhuab ua zoo npaj xwv thiaj txhawb tau sawvdaws lub zog thiab thiaj xaus raws sijhawm. Tsis tas li ntawd xwb, yuav tau npaj ua ntej kev sib txoos seb yuav mus qhia rau koog twg.

7. Tus uas coj kev sib txoos kuj tham tau txog dabtsi xwb?

⁷ Tham Txog Dabtsi Xwb: Vim ib koog zoo tsis thooj ib koog, tus qhev ncaj thiaj tsis qhia seb yuav tham txog dabtsi thaum muaj kev sib txoos mus qhia Vajlugkub. Lub ntsiab me “Thaum Sib Txoos Mus Qhia Vajlugkub, Kuj Tham Li Nram No,” muaj tej ntsiab uas kuj siv tau los tham. Feem ntau, kev sib txoos mus qhia Vajlugkub yog ua lus nug thiab lus teb xwb. Tiamsis tej thaud kuj ua yeeb yam qhia sawvdaws lossis tso ib zaj yeeb yaj kiab hauv jw.org/hmn rau sawvdaws saib los tau. Thaum npaj rau kev sib txoos mus qhia Vajlugkub, tus coj yuav tau ua zoo xav seb dabtsi yuav txhawb thiab pab tau cov uas mus qhia Vajlugkub rau hnub ntawd.

8. Yuav tham txog dabtsi thaum sib txoos mus qhia Vajlugkub rau Hnub 6 thiab Hnub 7 xwv thiaj pab tau sawvdaws?

⁸ Rau Hnub 6, muaj coob tus tshaj tawm nyiam tseb Phau Tsom Faj. Cov uas mus qhia Vajlugkub rau hnub ntawd feem coob tsis mus qhia Vajlugkub rau Hnub 1 txog Hnub 5 ces tej zaum yuav nyuaj rau lawv nco tau li lawv tau xyaum rau hmo tsev neeg pe hawm Vajtswv ua ke. Yog li ntawd, tej zaum yuav zoo rau tus coj rov tham txog tus qauv qhia uas nyob rau sab kawg hauv daim Tes Num Rau Lub Nceeg Vaj. Kuj zoo rau nws tham seb yuav siv tej xov xwm hauv zej hauv zos lossis tej kev lig kevcai los tseb Phau Tsom Faj li cas, lossis yog tus tswv tsev txais Phau Tsom Faj lawd, yuav hais li cas rau nws xwv nws thiaj tos peb rov mus xyuas nws rau lwm zaus. Yog muaj ib txhia twb tseb Phau Tsom Faj rau lub hli ntawd lawm, tus coj kuj nug seb lawv tau tseb li cas lossis nug seb lawv puas muaj tej qauv zoo uas lawv xav muab piav rau sawvdaws mloog. Rau Hnub 7, tus coj kuj ua ib yam li Hnub 6 txog phau ntawv uas tau teem tseb rau lub hli ntawd. Peb tseb tau cov ntawv me thiab ntawv loj uas siv kawm Vajlugkub xws li phau Xov Zoo, phau Mloog Vajtswv Lus, thiab phau Vajlugkub Qhia rau hnub twg los tau, yog li ntawd kuj zoo rau tus coj tham seb yuav tseb cov ntaub ntawv no li cas.

9. Thaum tseb ib daim ntawv caw lossis ib daim ntawv tseb rau Hnub 6 thiab Hnub 7, yuav tham li cas xwb?

⁹ Thaum tseb ib daim ntawv caw lossis ib daim ntawv tseb rau Hnub 6 thiab Hnub 7 ces tus coj kuj tham seb yuav tseb Phau Tsom Faj li cas nrog daim ntawv ntawd lossis kuj tham seb yuav ua li cas yog ntsib ib tug uas xav paub ntxiv. Tsis tas li ntawd xwb, lub caij tseb daim ntawv caw lossis daim ntawv tseb, kuj kom sawvdaws tham txog tej qauv zoo uas pab peb pom tias txoj haujlwm no yeej tseem ceeb heev tiag.

10, 11. Yog tias cov tshaj tawm npaj ua ntej, pab tau kev sib txoos mus qhia Vajlugkub li cas?

¹⁰ Cov Tshaj Tawm Yuav Tau Npaj Li No: Cov tshaj tawm los kuj muaj feem pab kom kev sib txoos mus qhia Vajlugkub mus tau zoo. Yog npaj ua ntej, xws li hmo uas tsev neeg pe hawm Vajtswv ua ke ces peb yuav siv tau tej peb npaj los txhawb lwm tus. Zoo rau sawvdaws mus nqa Phau Tsom Faj thiab lwm cov ntaub ntawv uas yuav tseb ua ntej tuaj sib txoos. Yog ua li no, tom qab sib txoos tas sawvdaws thiaj li ncaj nraim mus tom koog uas yuav mus qhia Vajlugkub xwb es thiaj tsis laug sijhawm.

¹¹ Tseem ceeb rau peb npaj kom tuaj txog li ob peb feeb ua ntej pib kev sib txoos mus qhia Vajlugkub. Tseeb tiag, txhua txojkev sib txoos, tsis zoo rau peb tuaj txog lig. Yimhuab tsis zoo rau peb tuaj txog lig thaum peb mus sib txoos mus qhia Vajlugkub rau qhov tuaj lig yuav tab kaum sawvdaws. Yog vim li cas? Vim tias ua ntej tus kwvtij uas coj muab sawvdaws faib, nws twb xav txhij xav txhua tas lawm tias yuav faib li cas thiaj zoo. Thaum muaj ob peb tug xwb, nws kuj kom sawvdaws mus khee tej koog uas ua tsis tau tas. Yog muaj tej tug uas tuaj kotaw tuaj xwb es yuav mus qhia rau ib koog uas nyob deb tsawv, tej zaum nws yuav muab cov no faib nrog cov uas tsav tsheb. Yog yuav mus qhia rau ib koog uas tsis tau luag mus, tej zaum nws yuav muab cov kwvtij faib nrog cov muam ua ke lossis kom lawv nyob sib ze. Tej zaum yuav kom cov laus lossis cov mus tsis tshua taus kev mus qhia rau tej txoj kev uas tiaj lossis rau cov tsev uas tsis nce ntaiv. Tej zaum yuav muab cov tshaj tawm tshiab faib nrog cov uas tshaj tawm tau ntev lawm. Yog tias twb muab sawvdaws faib tas li hais saum no es ib txhia mam tuaj txog ces tej zaum yuav tau rov muab sawvdaws faib dua kom cov uas tuaj lig thiaj muaj khub thiab. Yeej yuav muaj zaum puav uas peb tuaj tsis tau raws sijhawm vim muaj lwm yam los cuam tshuam. Tiamsis yog peb tuaj lig tas zog, ua zoo xav seb yog tim dabtsi. Puas yog tim peb tsis saib kev sib txoos mus qhia Vajlugkub tseem ceeb lossis tim peb tsis npaj ntxov xwb?

12. Yog koj niaj zaus xaiv koj tus khub, zoo rau koj ua li cas?

¹² Thaum tuaj sib txoos mus qhia Vajlugkub, yog cov tshaj tawm xav xaiv lawv tus khub ua ntej pib los tau lossis mam tos tus coj ua tus faib los kuj tau thiab. Yog koj niaj zaus xaiv koj tus khub, koj puas kam ua “siab dav” es tsis txhob xaiv cov qub tas zog tiamsis ib zaug xaiv dua ib tug tshiab nrog koj mus? (2Khl. 6:11-13) Koj puas kam xaiv ib tug uas nyuam qhuav pib tshaj tawm nrog koj mus es pab kom nws txawj qhia Vajlugkub? (1Khl. 10:24; 1Tmt. 4:13, 15) Ua tib zoo mloog thaum tus coj tham thiab mloog seb yuav mus qhia Vajlugkub rau qhovtwg. Thaum kev sib txoos xaus, cia li nrawm nroos mus qhia Vajlugkub. Thiab yog tus coj twb faib tus twg nrog koj lawd, cia li nrog tus ntawd mus xwb, tsis txhob muab hloov.

13. Yog tias sawvdaws rau siab ntso ua lawv feem, tej kev sib txoos mus qhia Vajlugkub yuav pab tau peb li cas?

¹³ Thaum 70 leej uas Yexus tau xa mus qhia Vajlugkub lawd rov qab los, lawv “los zoo siab xyiv fab” heev. (Lk. 10:17) Tseeb tiag, qhov uas Yexus ntsib nrog lawv ua ntej lawv mus tshaj tawm yeej pab tau lawv heev. Niaj hnub no los, tej kev sib txoos mus qhia Vajlugkub yeej pab tau peb tib yam li ntawd thiab. Yog txhua tus rau siab ntso ua lawv feem ces tej kev sib txoos mus qhia Vajlugkub yuav txhawb tau peb lub zog thiab pab tau peb tshaj txoj xov zoo. Tsis tas li ntawd xwb, tej kev sib txoos ntawd yog lub sijhawm uas muab peb faib kom muaj khub xwv peb thiaj ua tau peb tes haujlwm “ua timkhawv rau ib tsoom tebchaws” tiav.​—Mth. 24:14.