Kev Pab Rau Tus Coj Kev Tshaj Tawm

Txojkev sib txoos mus tshaj tawm yeej tseem ceeb ib yam nkaus li peb tej kev sib txoos thiab. Yehauvas yog tus npaj tej kev sib txoos no kom peb ib leeg thiaj txhawb tau ib leeg lub zog. (Henplais 10:24, 25) Txojkev sib txoos mus tshaj tawm yuav tsum ntev li 5 mus rau 7 feeb xwb, tsis hais thaum muab sawvdaws faib ua pab ua pawg, muab tej koog rau sawvdaws mus qhia, thiab thov Vajtswv. (Yog yuav sib ntsib mus tshaj tawm tom qab ib txojkev sib txoos ces siv sijhawm kom tsawg zog.) Tus coj yuav tsum npaj tej yam uas yuav pab tau cov mus qhia Vajlugkub rau hnub ntawd. Muaj tej txhia tsuas mus tshaj tawm tau rau hnub 6 lossis hnub 7 xwb, yog li zoo rau tus coj qhia seb yuav hais li cas thaum mus nrog tibneeg tham. Tus coj kuj qhia tau txog tej yam twg ntxiv?

• Cov qauv lus hauv Lub Neej Thiab Tes Haujlwm Khixatia​—Phau Kawm

• Yuav siv tej xov xwm twg nrog tibneeg tham

• Yog lawv tsis nyiam koj yuav hais li cas

• Yog koj ntsib cov tsis ntseeg Vajtswv, cov uas ntseeg tias tibneeg txia los, cov hais lwm yam lus lossis cov uas muaj dua lwm txojkev ntseeg, koj yuav ua li cas

• Yuav siv peb lub vej xaij jw.org/hmn, lub twj JW Library^®, lossis phau Vajlugkub li cas los pab lwm tus

• Yuav siv phau ntawv twg hauv Cov Twj Mus Ua Vajtswv Tes Num mus qhia

• Yuav hais li cas thaum peb hu xov tooj, sau ntawv, mus teeb laub, rov mus xyuas lossis qhia Vajlugkub rau ib tug

• Kom txhua tus xyuam xim, yoog lwm tus, ua neeg paub cai, tham txog tej yam uas yuav txhawb tau ib leeg ib tug lub zog

• Tso ib zaj yeeb yaj kiab hauv phau Xyaum Kom Txawj Nyeem Txawj Qhia lossis xaiv ib zaj hauv los tham

• Yuav pab thiab txhawb tus uas nrog koj mus qhia Vajlugkub li cas

• Nyeem ib nqe Vajlugkub uas tham txog kev tshaj tawm lossis piav txog tej yam zoo uas koj tau ntsib thaum mus tshaj tawm