Tej Uas Pab Kom Peb Txawj Ua Vajtswv Tes Num—Nug Ib Lo Lossis Tham Ib Qho Cia Rau Lwm Zaus

Vim Li Cas Ho Tseem Ceeb: Thaum peb ntsib ib tug uas nyiam Vajlugkub, zoo rau peb rov mus xyuas nws thaum nws nyob tsev xwv peb thiaj qhia tau qhov tseeb rau nws ntxiv. (1Khl. 3:6) Yog li, thawj zaug peb ntsib nws, peb yuav tsum nug seb lub sijhawm twg nws nyob tsev ua ntej peb mus lwm qhov xwv peb thiaj paub rov mus xyuas nws rau lub sijhawm uas nws xyeej. Tsis tas li ntawd xwb, kuj zoo rau peb nug nws ib los es lwm zaus mam rov mus teb. Yog peb ua li no, yuav ua rau tus tswv tsev tos peb rov mus xyuas nws, thiab yog phau ntawv uas peb muab rau nws muaj cov lus teb rau lo lus nug ntawd ces tej zaum nws yuav xav nyeem phau ntawv ntawd. Thiab yog peb ua li ntawd, lwm zaus yuav yoojyim rau peb nrog tus tswv tsev tham dua, rau qhov peb twb paub tias yuav tham txog dabtsi thiab tus tswv tsev los kuj yuav paub tias peb yuav qhia dabtsi rau nws. Thaum peb rov mus xyuas nws, peb kuj qhia rau nws tias peb rov tuaj teb lo lus uas peb nug nws zaum tas los.

Yuav Tau Ua Li Cas:

Thaum npaj mus qhia Vajlugkub ib lub tsev rau tsev, zoo rau peb npaj ib lo lus mus nug tus tswv tsev es lwm zaus mam rov mus teb. Peb kuj siv ib lo lus nug uas nyob hauv phau ntawv uas peb tseb hnub ntawd, lossis hauv ib phau uas peb siv qhia tibneeg, rau qhov phau ntawd yog phau uas koj yuav siv los qhia nws lwm zaus koj rov mus xyuas nws.
Yog koj paub tias tus uas koj ntsib ntawd nyiam Vajlugkub ces ua ntej koj mus rau lwm qhov, qhia rau nws tias koj xav rov mus nrog nws tham ntxiv. Tom qab ntawd, nug nws lo lus uas koj twb npaj tseg lawm. Muaj tej txhia tibneeg tsis muaj sijhawm li. Yog li ntawd, tej zaum lawv yuav tsis tshua xav teem sijhawm rau koj rov mus xyuas lawv. Yog lawv tsis xav teem sijhawm, koj kuj hais li no: “Yog lwm zaus kuv tuaj tib lub sijhawm no, koj puas xyeej? [Cia nws teb tas tso.] Kuv xav tuaj lwm lub lim tiam tuaj teb lo lus uas kuv nyuam qhuav nug koj. Tiamsis yog lwm zaus kuv tuaj es koj tsis xyeej los tsis ua li cas.”
Yog koj tau teem sijhawm rov mus xyuas tus tswv tsev, yuav tsum mus li tau teem tseg. (Mth. 5:37) Thaum koj rov mus xyuas tus tswv tsev, ua ntej koj yuav mus rau lwm qhov, nco ntsoov nug nws ib los lossis qhia nws seb lwm zaus neb yuav tham txog dabtsi.

Xyaum Li No Rau Lub Hli No:

Thaum npaj mus qhia Vajlugkub, koj kuj npaj ib lo lus mus nug tus tswv tsev es lwm zaus mam rov mus teb. Muab tej uas koj tau npaj qhia rau cov uas nrog koj mus qhia Vajlugkub.