Kawm Ntawm Cov Tshaj Tawm Uas Txawj Qhia Vajlugkub
Peb zoo siab tias muaj cov tshaj tawm uas txawj qhia Vajlugkub hauv lub koom txoos. Ib txhia txawj qhia vim lawv teev tiam Yehauvas tau ntev lawm. Hos ib txhia vim lawv kawm lawv thiaj txawj qhia. Cov tshaj tawm no pom tias Yexus yog tus coj lub koom txoos Khixatia rau tiam kawg no vim txoj xov zoo tsuas ncha deb zuj zus lawm xwb. (Mth. 28:19, 20) Vim lawv kub siab mus ua Vajtswv tes num, Vajtswv thiaj muab “lub hwjchim uas loj kawg nkaus” los pab lawv thaum lawv raug kev nyuaj siab thiab kev sim siab. (2Khl. 4:7) Peb yeej kawm tau ntau yam los ntawm cov tshaj tawm uas txawj qhia Vajlugkub, thiab lawv yeej zoo siab hlo qhia tej uas lawv paub rau peb. (Nt.Nk. 71:18) Yog li ntawd, zoo rau peb nrhiav sijhawm los kawm ntawm lawv. Peb ua li no li cas?
Thaum Mus Ua Vajtswv Tes Num. Yuav kom cov tshaj tawm tshiab lossis cov uas tsis tshua paub qhia Vajlugkub txawj qhia, yuav tsum muaj tus cob. Yog lawv nrog cov uas txawj qhia Vajlugkub es saib seb lawv qhia li cas ces lawv yuav kawm tau ntau yam. (Mus saib daim Tes Num Rau Lub Nceeg Vaj, Lub 1 Hlis xyoo 2015, sab 2, nqe 2, 3.) Thaum koj mus ua Vajtswv tes num nrog cov uas txawj qhia Vajlugkub, pab tau koj li cas xwb?
Koj puas kam hais ib tug tshaj tawm uas txawj qhia Vajlugkub nrog koj mus ua Vajtswv tes num ua ke? Yog tus txawj qhia Vajlugkub ntawd yog ib tug laus, koj kuj coj tus koj qhia Vajlugkub rau mus kawm tom nws tsev zaum puav thiab. Tom qab kawm tas, nug tus txawj qhia Vajlugkub seb nws pom li cas thiab nws puas muaj tej yam uas yuav pab tau koj kom koj yimhuab txawj qhia ntxiv.
Siv Sijhawm Nrog Lawv: Siv sijhawm nrog cov tshaj tawm uas txawj qhia Vajlugkub ua ke koj thiaj paub lawv zoo. Caw ib tug tuaj koom nrog koj tsev neeg pe hawm Vajtswv ua ke es nug nws ob peb los. Yog tus ntawd yog ib tug laus, puas zoo rau koj tsev neeg mus nrog nws pe hawm Vajtswv ua ke tom nws tsev? Koj kuj nug tus ntawd li no: Ua li cas koj thiaj los paub qhov tseeb? Yehauvas tau foom koob hmoov li cas rau koj? Nyob hauv koj thaj tsam koj pom Yehauvas cov tibneeg coob zuj zus li cas xwb? Vim koj siv koj lub neej los teev tiam Yehauvas, koj tau txais tej kev zoo siab xyiv fab twg?
Txawm lawv txawj qhia Vajlugkub los, lawv tsuas pab tau peb raws li tej lawv paub xwb. Cov uas tshaj tawm tau ntev lawm los kuj zoo li peb thiab, lawv nyias txawj lawm nyias ib yam. (Loos 12:6-8) Vim lawv ib txhia laus lawm, tej zaum lawv yuav nrog tsis tau peb ua ke ntev. Txawm li ntawd los, peb yeej kawm tau ntau yam ntawm lawv rau qhov lawv yog cov uas txawj qhia Vajlugkub thiab muaj kev ntseeg.