Tej Uas Pab Kom Peb Txawj Ua Vajtswv Tes Num—Tseb Phau Vajlugkub Qhia

Vim Li Cas Ho Tseem Ceeb: Phau Vajlugkub Qhia yog phau uas peb siv heev tshaj plaws. Tiamsis yuav kom peb siv tau phau no los qhia tibneeg, peb yuav tsum xub muab tseb rau lawv tso. Yog li ntawd, peb sawvdaws yuav tsum rau siab ntso xyaum kom peb txawj tseb phau Vajlugkub Qhia thaum peb mus ua Vajtswv tes num. (P.L. 22:29) Muaj ntau lub ntsiab rau peb siv los tham thaum peb tseb phau Vajlugkub Qhia. Zoo rau koj siv lub uas koj nyiam.

Yuav Tham Li Cas:

Nug ib yam uas koj xav tias tus tswv tsev yuav nyiam uas muaj nyob hauv phau Vajlugkub Qhia ib tshooj ces tom qab ntawd mam nthuav mus rau tshooj ntawd. Koj kuj siv tau cov lus nug uas nyob rau ntawm thawj hauv ib tshooj twg los nug tus tswv tsev. Tom qab tus tswv tsev teb tas, nyeem ib nqes Vajlugkub thiab qhia nws txog ib nqes hauv phau ntawv uas tham txog lub ntsiab ntawd. Ces neb mam tham nqe ntawd ua ke.
Koj kuj siv tej uas nyob rau sab 3-6 los nug tus tswv tsev ces nthuav phau ntawv mus rau tshooj uas teb lo lus nug ntawd. Xws li, koj kuj tham txog ib qho xwm txheej phem uas nyuam qhuav tshwm sim ces tom qab ntawd qhia rau nws tias coob leej ntau tus xav paub txog cov lus nug uas nyob rau sab 3. Lossis koj kuj qhia rau tus tswv tsev tias koj tuaj nrog cov kwvtij zej zog tham txog tej yam zoo uas yuav muaj los tom hauv ntej no. Ces nthuav mus rau sab 4 thiab 5 es nug nws li no, “Koj xav kom muaj tiav raws li daim duab twg?” Lossis koj kuj hais rau nws tias koj tuaj nrog tibneeg tham txog tej lus nug uas tibneeg muaj txog lub neej. Tom qab ntawd, koj mam li muab cov lus nug nyob rau sab 6 rau nws saib thiab nug seb nws nyiam lo twg.
Koj kuj nug kiag tus tswv tsev seb nws puas xav kawm Vajlugkub. Koj kuj hais li no: “Peb muab phau ntawv no pub rau sawvdaws nyeem. Koj puas tau pom dua? [Cia nws teb tas tso.] Yog koj muaj mentsis sijhawm, kuv xav qhia seb koj siv tau phau ntawv no los pab koj kawm Vajlugkub li cas.”

Xyaum Li No Rau Lub Hli No:

Xyaum zaj no rau hmo tsev neeg pe hawm Vajtswv ua ke.
Thaum mus qhia Vajlugkub, qhia rau cov nrog koj ua ke seb koj tau npaj hais li cas rau tus tswv tsev. (P.L. 27:17) Yog cov lus koj tau npaj tsis raug siab ces hloov hais dua lwm yam.