**Tej Uas Pab Kom Peb Txawj Ua Vajtswv Tes Num—Siv Phau Vajlugkub Qhia Los Pib Kawm Vajlugkub Nrog Lwm Tus**

Vim Li Cas Ho Tseem Ceeb: Thaum peb nug tibneeg seb lawv puas xav kawm Vajlugkub, tej zaum coob leej yuav tsis to taub peb. Tej zaum lawv yuav xav tias yuav tau mus kawm ua tsheej pab tsheej pawg li kawm ntaub kawm ntawv. Yog li ntawd, zoo rau peb siv ob peb feeb los ua qauv qhia lawv ntawm taw rooj seb peb kawm Vajlugkub li cas. Yog peb ua li no, lawv yuav pom tias kawm Vajlugkub yog ib qho yoojyim thiab ib pliag xwb lawv twb kawm tau ntau heev.

Yuav Tau Ua Li Cas:

Tom qab neb sib zeem tas, nug tus tswv tsev seb nws puas txhawj txog yav tom hauv ntej.
Qhia rau nws tias muaj coob leej ntau tus kuj xav ib yam li nws thiab. Nthuav mus rau “Cov Ntsiab Lus” hauv phau Vajlugkub Qhia. Piav rau nws tias cov ntsiab lus no qhia txog yav tom hauv ntej, thiab yog rho hauv phau Vajlugkub los. Yog ib phau uas kawm yoojyim heev. Nug seb nws nyiam lub ntsiab lus twg.
Cev phau ntawv rau nws thiab pab nthuav mus rau tshooj uas nws nyiam. Thaum nthuav tau lawm, qhia cov lus nug nyob rau sab ntawd rau nws. Piav rau nws tias tshooj no yuav teb cov lus nug no.
Yog nws xav nyeem, hais kom nws nyeem thawj nqes. Tom qab ntawd, nyeem lo lus nug thiab tham lo lus teb nrog nws. Mus nyeem tej nqe Vajlugkub uas pab teb lo lus nug ntawd thiab. Muab koj phau ntawv rau nws saib kom nws pom seb koj kos cov lus teb li cas.
Nyeem nqe 2, tiamsis tom qab neb nyeem tas, nug seb nws puas xav teb.
Qhuas nws thiab teem sijhawm rov mus kawm kom tas tshooj ntawd.
Yog zoo sijhawm ces tso zaj yeeb yaj kiab Kev Kawm Vajlugkub Zoo Li Cas? hauv lub Vej xaij, jw.org rau nws saib.

Xyaum Li No Rau Lub Hli No:

Thov Yehauvas foom koob hmoov kom koj tau pib kawm Vajlugkub nrog ib tug twg.—Flp. 2:13.
Siv phau Vajlugkub Qhia los pib kawm Vajlugkub nrog lwm tus, lossis thaum mus tshaj tawm tso zaj yeeb yaj kiab Kev Kawm Vajlugkub Zoo Li Cas? rau ib tug twg saib.