Ua Ib Tug Phooj Ywg Zoo

PUAS muaj ib zaug uas koj muaj teeb meem es koj tsis pom qab yuav qhia rau leej twg? Peb nyob rau ib lub sij hawm “muaj kev ntxhov siab heev” ces peb thiaj tsis pom qab yuav nrog ib tug twg tham. (2 Timautes 3:1) Nco ntsoov tias thaum peb muaj teeb meem, yeej muaj ib co tib neeg pab tau peb. Nyob hauv phau Vajlugkub hais tias yeej muaj ib co tseem phooj ywg uas yuav pab tau peb “thaum muaj kev txomnyem.”​—Pajlug 17:17.

COV TSEEM PHOOJ YWG PAB TAU LI CAS?

Tus tub txib Povlauj nrog nws ib co phooj ywg mus tshaj tawm txawv teb chaws. Lawv pab nws ntau yam heev. (Kaulauxais 4:7-11) Thaum Povlauj raug kaw nyob rau hauv Loos lawm los nws cov phooj ywg kuj mus ua tej yam hauj lwm uas nws ua tsis tau rau nws. Xws li Epafauditas pab nqa tej khoom ub khoom no los ntawm cov kwv tij nkauj muam nyob hauv Filipis mus rau Povlauj. (Filipis 4:18) Hos Tikhikus pab nqa cov ntawv uas Povlauj sau mus rau tej koom txoos. (Kaulauxais 4:7) Vim Povlauj muaj cov phooj ywg pab nws, Povlauj thiaj txhawb tau cov koom txoos tab txawm nws raug kaw rau hauv tsev thiab tom qab no kuj raug kaw rau hauv tsev loj cuj. Ua li niaj hnub no koj ho ua tau ib tug phooj ywg zoo rau lwm tus li cas?

Niaj hnub nim no yeej muaj ib co kwv tij nkauj muam ua qhia tias tej phooj ywg yeej txawj sib hlub sib pab. Xws li muaj ib tug tho kev npe hu Elixanpes (Elisabet) hauv teb chaws Xapee (Spain) qhia tias muaj ib tug muam pab nws thaum nws muaj kev nyuaj siab. Thaum Elixanpes niam mob kheeb xawm (cancer), tus muam ntaus ntawv thiab xa ntau ntau nqe Vajlugkub tuaj txhawb nws zog. Elixanpes hais tias: “Thaum kuv pom nws cov lus mas txhawb tau kuv lub zog heev thiab kuv xam pom tias tsis yog kuv ib leeg xwb.”​—Pajlug 18:24.

Peb txhawb tau peb txoj kev sib raug zoo nrog cov kwv tij nkauj muam thaum peb pab lawv mus tshaj tawm txoj xov zoo thiab mus kev sib txoos. Xws li pab tsav tsheb thauj cov kwv tij nkauj muam laus mus kev sib txoos los sis mus tshaj tawm txoj xov zoo. Yog koj ua li no koj yuav txhawb tau lawv thiab lawv yuav txhawb tau koj tib yam nkaus. (Loos 1:12) Muaj ib txhia kwv tij nkauj muam mus tsis tau qhov twg. Ua li koj yuav pab lawv li cas?

PAB COV UAS MUS TSIS TAU QHOV TWG

Peb ib txhia kwv tij nkauj muam mus tsis tau kev sib txoos tim ntsej tim muag vim lawv muaj mob hnyav heev los sis muaj tej yam ua rau lawv mus tsis tau qhov twg. Xws li muaj ib tug hu ua Devem (David) muaj kheeb xawm. Nws mus kho mob tau rau lub hlis ces ncua sij hawm ntawd, nws thiab nws poj niam yuav tau mus kev sib txoos saum huab saum cua xwb.

Cov kwv tij nkauj muam uas nyob hauv nkawd lub koom txoos ho txhawb nkawd li cas? Tom qab kev sib txoos, lawv kuj lauj sij hawm nrog ob tug tham saum huab saum cua. Tsis tas li ntawd thaum Devem thiab nws poj niam tsa tes teb saum huab saum cua tag, lawv kuj ntaus ntawv qhia rau nkawd tias lawv nyiam nkawd cov lus teb. Qhov uas lawv ua li no ua rau Devem thiab nws tus poj niam nkawd tuaj zog thiab xam pom tias sawv daws hlub nkawd kawg li.

Tej zaud kuj zoo rau peb teem sij hawm mus tshaj tawm txoj xov zoo nrog cov kwv tij nkauj muam uas mus tsis tau qhov twg. Peb kuj muab peb tej sij hawm hloov qho me ntsis xwv peb thiaj muaj sij hawm nrog cov uas tawm tsis tau mus qhov twg. (Pajlug 3:27) Ib qho uas zoo rau peb ua yog nrog lawv sau ntawv tshaj tawm los sis hu xov tooj tshaj tawm. Cov txwj laus los kuj npaj tseg kom cov uas mus tsis tau qhov twg tuaj koom txoj kev sib txoos mus tshaj tawm saum huab saum cua. Devem thiab nws poj niam nkawd nyiam kawg li thaum muaj li ntawd. Devem hais tias, “Txawm wb nrog tsis tau lawv ua ke tim ntsej tim muag los qhov uas wb mus nrog wb pawg sib ntsib saum huab saum cua thiab thov Vajtswv txhawb tau wb kawg li.” Tej zaud peb kuj nug seb tus kwv tij los sis nkauj muam uas tawm tsis tau qhov twg puas kam peb coj ib tug uas kawm Vajlugkub tuaj qhia rau hauv nws tsev.

Thaum peb lauj sij hawm nrog cov kwv tij nkauj muam uas tawm tsis tau mus qhov twg mas peb yuav paub lawv thiab lawv tej yeeb yam zoo. Qhov uas peb sib paub zuj zus yuav ua rau peb yim huab sib raug zoo. Xws li thaum peb hnov lawv tshaj tawm Vajtswv Txoj Lus es qhia raug lwm tus siab mas ntshe peb yuav qhuas lawv heev. Thaum koj pab cov kwv tij nkauj muam mus tshaj tawm txoj xov zoo thiab mus kev sib txoos yam li hais no ces koj yuav muaj phooj ywg coob zuj zus ntxiv.​—2 Kauleethaus 6:13.

Lub sij hawm thaum Povlauj muaj kev nyuaj siab, nws tus phooj ywg Titus kuj tuaj saib nws mas txhawb tau nws heev. (2 Kauleethaus 7:5-7) Zaj no qhia tau tias tej lus zoo yeej txhawb tau cov kwv tij nkauj muam lub zog tiam sis Titus tus yam ntxwv qhia kom peb lauj sij hawm nrog lawv ua ub ua no ua ke.​—1 Yauhas 3:18.

SIB PAB THAUM MUAJ KEV TSIM TXOM

Peb cov kwv tij nkauj muam nyob hauv Lav Xias teb txawj sib hlub sib pab kawg li. Xws li tus kwv tij hu ua Xawvnkem (Sergey) thiab nws tus poj niam hu ua Tatianas (Tatyana). Tom qab tub ceev xwm tuaj tshawb nkawd lub tsev tag, lawv coj nkawd mus kom. Lawv kuj tso Tatianas rov qab los tsev lawm. Xawvnkem hais tias: “Thaum Tatianas mus txog tsev, muaj ib tug muam uas siab tawv heev tuaj xyuas kiag nws tam sim ntawd. Kuj muaj cov kwv tij nkauj muam tuaj pab tu wb lub tsev.”

Xawvnkem hais ntxiv tias: “Kuv nyiam nqe Vajlugkub nyob rau ntawm Pajlug 17:17 uas hais tias: ‘Tej phoojywg twb txawj sib hlub txhua lub sijhawm. Yog kwvtij tsis paub sib pab thaum muaj kev txomnyem yuav zoo dabtsi?’ Lub caij uas kuv raug kev tsim txom no kuv yeej xav tau tej phooj ywg pab kuv kawg nkaus li. Kuv xam pom tias nqe Vajlugkub no yeej muaj tseeb tiag. Yehauvas yeej pub kom tej phooj ywg muaj lub siab tawv qhawv tuaj pab kuv.”

Thaum lub sij hawm muaj kev nyuaj siab no peb yeej xav tau tej phooj ywg txoj kev pab. Thaum txog txoj kev txom nyem loj kawg nkaus, peb yim huab xav tau lawv txoj kev pab. Cia peb xyaum kam tiag ua ib tug tseem phooj ywg rau lwm tus tam sim no!​—1 Petus 4:7, 8.