Rau Siab Caw, Tibneeg Yeej Yuav Tuaj
Xyoo no, 3 lub lim tiam ua ntej lub rooj sib txoos loj, peb yuav rov mus caw tibneeg tuaj nrog peb koom. Zoo rau peb mus caw tibneeg, rau qhov cov uas tuaj koom peb kuj nyiam tej lus qhuab qhia, nyiam qhov uas sawvdaws sib pab ua haujlwm, thiab nyiam tus cwj pwm thiab txojkev koom siab uas peb muaj. (Nt.Nk. 110:3; 133:1; Yxy. 65:13, 14) Ua li, yog peb rau siab caw, tibneeg puas yuav tuaj tiag? Cov uas nyob deb puas yuav tuaj koom peb thiab?
Tom qab lub rooj sib txoos loj 2011, muaj ib ceg tau txais ib tsab ntawv uas ib tug pojniam sau tuaj. Tus pojniam no pom ib daim ntawv caw rhais ntawm nws qhov rooj. Nws yog ib tug uas tsis kam qheb qhov rooj thaum Yehauvas cov Timkhawv tuaj. Nws sau hais tias: “Kuv kuj muaj ib lub tsev zoo nkauj heev thiab kuv tus txiv los kuj hlub kuv kawg li. Kuv xav tias kuv twb muaj txhua yam txaus kuv siab lawm. Tiamsis qhov tseeb tiag, kuv twb tsis muaj kev zoo siab thiab kuv lub neej los tsis muaj chaw rau. Li ntawd kuv thiaj txiav txim siab tias kuv yuav mus 200 mais (miles) kev mus koom lub rooj sib txoos loj rau hnub 6.” Tus pojniam no nyiam lub rooj sib txoos loj heev nws thiaj hu xov tooj rau nws tus txiv tias nws yuav pw ib hmos es mus koom hnub 7 thiab. Nws sau ntxiv tias: “Kuv hnov txhua zaj lus qhuab qhia thiab kuv ntsib Yehauvas cov Timkhawv coob tus. Kuv txiav txim siab tias kuv yuav nrog cov neeg no.” Tom qab nws mus txog tsev, nws thiaj pib kawm Vajlugkub. Nws kawm tau 4 lub hlis xwb nws txawm ua ib tug tshaj tawm tsis tau raus dej. Nws sau ntxiv dua tias: “Kuv zoo siab heev uas kuv pom daim ntawv caw rhais ntawm kuv qhov rooj, rau qhov tamsim no kuv lub neej muaj chaw rau lawm!”
Muaj ib txhia uas peb caw yeej yuav tuaj koom nrog peb. Yog li ntawd, rau siab ntso mus caw tibneeg tuaj. Yog tias koj tseb cov ntawv caw tsis tas, thov nqa cov seem tuaj tom lub rooj sib txoos loj, sawvdaws thiaj tau siv mus caw cov uas lawv ntsib tom tej kev.
[Ntsiab me nyob sab 6]
Peb Yuav Caw Tibneeg Li Cas?
Yuav kom peb caw thoob peb thaj tsam, zoo rau peb tsis txhob hais lus ntau ntau. Peb yuav tau kub siab lug mus caw sawvdaws. Thaum peb caw, zoo rau peb hais li no: “Yehauvas cov Timkhawv tseb daim ntawv caw no thoob plaws lub ntiajteb. Kuv muab daim no rau koj. Daim ntawv caw no qhia txog lub ntsiab, qhov chaw nyob, thiab lub sijhawm rau peb lub rooj sib txoos loj.”