KEV PAB RAU THAUM KHOOM KIM ZUJ ZUS TUAJ
Ua Ib Siab Lees Txais
Thaum khoom noj khoom haus pheej nce nqi zuj zus tuaj, tej zaum koj yuav tsis nco qab pom vim hais tias koj cov nyiaj hli kuj nce thiab. Tiam sis thaum khoom noj khoom haus nce es cov nyiaj hli tseem nyob li qub xwb, ces koj mam nco pom thiab txhawj. Yog hais tias koj muaj ib lub cuab lub yig ces haj yam txaus txhawj.
Peb yeej zam tsis dhau qhov no li, tiam sis yog hais tias koj ua ib siab lees txais hais tias txhua yam kim lawm, ces qhov no kuj yuav pab tau koj thiab.
UA IB SIAB LEES TXAIS YUAV PAB TAU KOJ LI CAS?
Thaum koj ua ib siab lees txais tias txhua yam kim zog lawm, yuav pab tau koj li no . . .
Koj yuav ua tau lub siab tus thiab txiav txim siab tau zoo.
Koj yuav ua zoo siv koj cov nyiaj. Xws li, koj yuav them koj cov nuj nqi kom raws sij hawm thiab yuav tsis mus lob ub lob no yuav.
Koj yuav tsis sib cav sib ceg txog nyiaj txiag.
Koj yuav ua zoo luj seb koj cheem tsum dab tsi tiag tiag.
KOJ YUAV UA LI CAS XWB?
Yoog thaum txhua yam nce nqi. Thaum txhua yam nce nqi ces zoo rau koj txawj luj koj tej nyiaj txiag kom zoo zoo. Muaj tej tug siv nyiaj ntau tshaj qhov uas lawv khwv tau los, ces haj yam ua rau lawv nyuaj siab xwb. Yog koj muaj cuab muaj yig ces koj yeej xav mus khwv kom txaus noj txaus haus. Tiam sis nco ntsoov hais tias, koj tsev neeg kuj xav pom koj thiab xav tau koj nrog lawv nyob ua ke.
Muaj tej tug siv nyiaj ntau tshaj qhov uas lawv khwv tau los, ces haj yam ua rau lawv nyuaj siab xwb