Txoj Sia Los Qhov Twg Los?

Vajtswv “yog tus tsim ib puas tsav yam huv tib si.” (Tshwmsim 4:11) Koj puas ntseeg li ntawd? Ib txhia ntseeg tias nyob nyob ces cia li muaj txoj sia xwb tsis muaj tus tsim li. Yog muaj li ntawd tiag ces kuj lam tau lam muaj tib neeg thiab xwb. Tiam sis yog tias Vajtswv Yehauvas ua tus tsim txoj sia ces nws yuav tsum tsim kom muaj hauv paus hauv ntsis, puas yog?a Cia peb mus tham txog zaj uas nyob hauv phau Vajlugkub uas qhia tias txoj sia los qhov twg los thiab seb vim li cas peb thiaj ntseeg tau tias muaj tseeb li ntawd tiag.

1. Lub ntuj thiab lub ntiaj teb los qhov twg los?

Phau Vajlugkub hais tias: “Thaum chivkeeb Vajtswv tsim lub ntuj thiab lub ntiajteb.” (Chivkeeb 1:1) Cov neeg tshawb txuj ci coob tus pom tias lub ntuj thiab lub ntiaj teb yeej muaj qhov pib. Ua li cas Vajtswv thiaj tsim tau txhua yam? Vajtswv siv nws lub hwj chim uas yog nws lub hwj huam dawb huv los tsim ib puas tsav yam uas nyob saum ntuj, tsis hais lub hnub lub hli thiab tej hnub qub huv tib si.​—Chivkeeb 1:2.

2. Vim li cas Vajtswv thiaj tsim lub ntiaj teb?

Yehauvas “tsis tau tsim lub ntiajteb los nyob do cuas tsis muaj dabtsi, tiamsis nws tsim los rau neeg nyob.” (Yaxayas 45:18) Nws tsim tau lub ntiaj teb zoo kawg nkaus thiaj muaj txhij muaj txhua los yug tib neeg txoj sia mus ib txhiab ib txhis. (Nyeem Yaxayas 40:28; 42:5.) Cov neeg tshawb txuj ci hais tias lub ntiaj teb mas tshwj xeeb kawg nkaus li thiab tsis muaj dua lwm lub zoo thooj li lub no. Lub ntiaj teb no thiaj yog tib lub uas muaj txhua yam yug tau tib neeg txoj sia xwb.

3. Tib neeg thiab tsiaj txhu ho sib txawv li cas?

Tom qab nws tsim tau lub ntiaj teb, Yehauvas tsim tej nroj tsuag thiab tej tsiaj txhu. Ces, “Vajtswv thiaj tsim neeg, kom lawv muaj yam ntxwv zoo li Vajtswv ntag.” (Nyeem Chivkeeb 1:27.) Vim li cas tib neeg zoo tsis thooj li lwm yam? Rau qhov Vajtswv tsim tau peb muaj nws tej yeeb yam zoo, peb thiaj txawj sib hlub thiab paub ua ncaj ncees rau lwm tus ib yam li nws. Vajtswv kuj tsim tau peb kom muaj peev xwm kawm tau lwm yam lus, nyiam tej yam uas zoo nkauj heev, thiab nyiam mloog nkauj. Thiab tib neeg tsis zoo li tej tsiaj txhu, rau qhov peb paub pe hawm peb tus Tswv Tsim.

KAWM NTXIV

Phau Vajlugkub qhia tias muaj ib tug Tswv Tsim uas tsim lub ntuj lub teb thiab txoj sia. Cia peb tham txog tej pov thawj uas qhia tias yeej tsim nyog peb ntseeg. Kawm seb tib neeg tej yeeb yam zoo qhia peb li cas txog Vajtswv.

4. Txoj sia puas yog tsim los?

Tib neeg ib leeg qhuas ib leeg thaum lawv tsim tau ib yam twg tiam sis lawv tsuas muab tej uas Vajtswv tsim tau coj los ua qauv xwb. Yog li ntawd, leej twg thiaj yog tus uas tsim nyog peb qhuas? Saib zaj YEEB YAJ KIAB, thiab tham txog lo lus no.

YEEB YAJ KIAB: Kev Ntseeg Vajtswv (2:43)

• Tib neeg saib tej uas Vajtswv tau tsim hauv ntiaj teb no, lawv thiaj muab xyaum coj los tsim tau dab tsi?

Txhua lub tsev yeej muaj tus ua. Tiam sis leej twg yog tus tsim thiab ua tej uas nyob hauv ntiaj teb no? Nyeem Henplais 3:4, thiab tham txog cov lus no:

• Tej uas Vajtswv tsim tau hauv ntiaj teb no, koj nyiam dab tsi tshaj?

• Puas tsim nyog peb ntseeg tias muaj tus tsim ib puas tsav yam? Vim li cas peb thiaj ntseeg tau li ntawd?

Koj puas paub?

Koj mus nrhiav tau tej ntaub ntawv thiab yeeb yaj kiab uas hais txog lub ntsiab no hauv jw.org ntawm sab uas qhia ua ntu zus “Puas Muaj Ib Tug Tsim?” thiab “Txoj Sia Rhawv Li Cas Los.”

“Tej tsev yeej muaj tus ua, tiam sis Vajtswv yog tus tsim ib puas tsav yam”

5. Yeej tsim nyog peb ntseeg qhov uas phau Vajlugkub hais tias Vajtswv yog tus tsim ib puas tsav yam

YEEB YAJ KIAB: Puas Yog Txhua Yam Raug Tsim Los?​—Saib Ib Vuag (3:51)

• Phau Vajlugkub puas qhia tias Vajtswv tsuas siv rau hnub, uas ib hnub muaj 24 txoos teev los tsim lub ntiaj teb thiab txhua yam uas muaj sia xwb?

• Koj puas xav tias zaj uas phau Vajlugkub hais txog qhov uas tsim ib puas tsav yam yeej muaj taus thiab yeej ntseeg tau tiag? Vim li cas koj ho ntseeg li ntawd?

Nyeem Chivkeeb 1:1, thiab tham txog lo lus no:

• Cov kws tshawb txuj ci hais tias ib puas tsav yam yuav tsum muaj chaw pib. Qhov uas lawv hais ntawd thiab tej uas koj nyuam qhuav nyeem tas hauv phau Vajlugkub, puas hais sib xws?

Ib txhia xav tias tej zaum ntshe Vajtswv tsim ib yam me me kom txawj txia mus ua lwm yam. Nyeem Chivkeeb 1:21, 25, 27, thiab tham txog lo lus no:

• Phau Vajlugkub puas qhia tias Vajtswv tsim ib txoj sia kom txawj txia mus ua ntses, ua tsiaj txhu, thiab ua tib neeg? Los yog nws tsim txhua yam kom muaj raws li “nyias yam”?

6. Vajtswv tsis tsim tib neeg kom zoo li lwm yam

Peb tsis zoo li tej tsiaj txhu uas Yehauvas tau tsim. Nyeem Chivkeeb 1:26, thiab tham txog lo lus no:

• Vim peb raug tsim los muaj Vajtswv tus yam ntxwv, qhov uas peb paub hlub thiab khuv leej lwm tus qhia li cas txog Vajtswv?

KOJ KAWM TAU DAB TSI

Yehauvas yog tus tsim ib puas tsav yam thiab txhua yam uas muaj sia.

Rov Tham Dua

• Phau Vajlugkub qhia tias txhua yam tshwm sim los li cas?

• Vajtswv puas yog tsim ib txoj sia kom txawj txia mus ua ntau yam, los sis nws yog tus tsim kiag txhua yam?

• Vim li cas tib neeg ho zoo tsis thooj li lwm yam?

TSHAWB NTXIV

Mus nyeem txog tej nas noog thiab tej tsiaj txhu ces koj yuav pom tias yeej muaj ib tug Tswv Tsim tiag.

“Tej Uas Vajtswv Tsim Qhia Tau Dab Tsi?” (Tsim Dheev! lub 9 Hlis xyoo 2006)

Mus saib seb ib leej txi piav li cas rau nws tus me tub txog tej uas phau Vajlugkub qhia tias Vajtswv yog tus tsim txhua yam.

“Yehauvas . . . Tsim Txhua Yam” (2:37)

Mus kawm seb lub tswv yim uas qhia tias txhua yam txawj txia thiab tej uas hais hauv phau Vajlugkub puas qhia tib yam.

“Vajtswv Puas Yog Tsim Ib Txoj Sia Kom Txawj Txia Mus Ua Ntau Yam?” (Nyeem hauv jw.org/hmn)

Ua tib zoo saib seb tej pob txha txheej thaud thiab tej kev tshawb txuj ci puas qhia tias muaj tus tsim txoj sia tiag los lam cia li muaj xwb.

Txoj Sia Rhawv Li Cas Los​—Tsib Lo Lus Uas Tsim Nyog Nug (ntawv me)