Tus Cwj Pwm Uas Qhuas Tau Vajtswv
1. Thaum Yehauvas cov Timkhawv muaj rooj sib txoos loj hauv ib lub nroog twg, sawvdaws yeej paub li cas?
1 Thaum muaj rooj sib txoos loj hauv ib lub nroog twg, sawvdaws yeej paub zoo tias peb yog leejtwg. Ntau zaus tej tub xov xwm twb tshaj tawm rau zej rau zos ua ntej lawm tias Yehauvas cov Timkhawv yuav tuaj sib txoos hauv lawv lub nroog. Tej tsev so thiab tej khw noj mov los muaj Yehauvas cov Timkhawv puv nkaus. Tsis tas li ntawd xwb, thaum neeg pom peb daim ntawv qhia npe, lawv paub tias peb tuaj rooj sib txoos loj. Yog li ntawd muaj tej yam uas peb yuav tau nco ntsoov ua xwv thiaj qhuas tau Vajtswv thaum peb mus lub rooj sib txoos loj.—1Pt. 2:12.
2. Peb yuav hnav tej tsoos tsho zoo li cas thiaj qhuas tau Vajtswv thaum peb mus lwm qhov?
2 Hnav Tsoos Huv Siab Si: Thaum peb mus koom lub rooj sib txoos loj, yog tias peb hnav tej tsoos tsho huv siab si, lawv yuav qhuas txog peb. Tiamsis yog peb hnav zoo rau lub caij peb mus ua si, mus noj hmo, lossis yos khw, lawv hajyam qhuas peb. Txawm lub sijhawm ntawd peb tsis hnav tej ris tsho uas peb hnav mus tom lub rooj sib txoos loj los, peb yuav tsum hnav tej tsoos tsho kom du lug, thiab raug ntsej muag. Lwm tus yuav tsum pom tias peb txawv ntawm cov tsis teev tiam Yehauvas. (Loos 12:2) Tsis tas li ntawd xwb, peb yuav tsum coj peb daim ntawv qhia npe xwv lwm tus thiaj paub tias peb muaj ib lub rooj sib txoos loj hauv lawv lub nroog. Qhov nov qheb kev rau peb qhia Vajlugkub thiab caw lawv tuaj koom peb thiab. Yog peb coj daim ntawv qhia npe ces peb cov kwvtij nkauj muam kuj yuav paub peb thiab.
3. Peb ua siab ntev thiab paub cai li cas?
3 Ua Siab Ntev Thiab Paub Cai: Nyob rau lub caij lub nyoog no neeg tsuas xam pom lawv tus kheej thiab tsis nco luag txiaj ntsig. Yog peb ua siab ntev thiab paub cai, yuav ua rau cov neeg ua haujlwm tom tej tsev so thiab tej kiab tej khw zoo siab ua haujlwm. (2Tmt. 3:1-5) Thaum peb hom rooj zaum thiab mus nqa tej ntaub ntawv tshiab, peb yuav tsum tsis txhob xam pom peb tus kheej xwb, tiamsis xam pom lwm tus thiab. (1Khl. 10:23, 24) Thawj zaug uas ib tug txivneej mus lub rooj sib txoos loj, nws tau hais tias: “Kuv tsis nco qab ib yam dabtsi uas tham rau hnub ntawd, tiamsis qhov uas cov Timkhawv coj zoo nyob rawv hauv kuv lub siab mus li.”
4. Vim li cas ho zoo rau peb pab ua haujlwm tom lub rooj sib txoos loj?
4 Zoo Siab Pab Ua Haujlwm: Cov tseem Khixatia yuav tsum nquag thiab muaj siab pab ua haujlwm. (Nt.Nk. 110:3) Koj puas zoo siab pab ua haujlwm thaum muaj lub rooj sib txoos loj? Nyob rau ib lub rooj sib txoos loj, muaj li 600 tus kwvtij thiab nkauj muam tau tuaj sib pab tu tsev ua ntej lub rooj sib txoos loj. Cov neeg ua haujlwm hauv lub tsev ntawd thiaj hais tias: “Peb tsis tau pom muaj li no ib zaug li. Xav tsis txog tias tag nrho cov tibneeg no puavleej ua haujlwm pub dawb xwb.” Peb tos ntsoov lub rooj sib txoos loj xyoo 2013. Tsis yog peb mus mloog thiab kawm ntawm Vajtswv xwb, tiamsis yog peb coj tau zoo, ces luag lwm tus yuav qhuas Vajtswv Yehauvas thiab!
[Ntsiab me nyob sab 4-8]
Nco Ntsoov Tej No Rau Lub Rooj Sib Txoos Loj 2013
◼ Sijhawm Pib Thiab Xaus: Yuav qheb qhov rooj rau thaum 8:00 sawv ntxov. Yuav tso suab nkauj thaum 9:20 sawv ntxov, rau 3 hnub tibsi. Thaum hnov suab nkauj nrov, sawvdaws yuav tau mus zaum. Hnub 5 (Friday) thiab Hnub 6 (Saturday) lub rooj sib txoos loj yuav xaus thaum 4:50 tsaus ntuj. Hnub 7 (Sunday) yuav xaus thaum 3:35 tsaus ntuj.
◼ Chaw Nres Tsheb: Nyob rau cov rooj sib txoos loj uas cov kwvtij tau hom chaw nres tsheb tseg lawm, peb nres dawb xwb. Tiamsis zoo rau peb tuaj ntxov, thiaj tau chaw nres. Vim tsis muaj chaw nres tsheb ntau, zoo rau peb thauj lwm tus nrog peb tuaj ua ke. Cov chaw nres tsheb uas tau hom tseg, rau cov uas cev tsis meej xeeb. Cov uas muaj ntaub ntawv nres thiaj nres tau xwb.
◼ Hom Chaw Zaum: Thov xav txog lwm tus. Thov hom rooj rau koj tsev neeg, cov uas nrog koj caij tib lub tsheb, thiab cov uas koj tseem qhia Vajlugkub rau xwb. Cov rooj uas hom tseg rau cov laus zaum tsis muaj ntau lub. Yog li ntawd, yuav tsis txaus tag nrho tsev neeg zaum ua ke. Thov tseg cov rooj ntawd rau cov laus thiab tus uas saib xyuas nws zaum xwb.—1Khl. 13:5.
◼ Ntim Su: Thov ntim su tuaj noj es thiaj tsis tau tawm mus yuav sab nraud. Nqa lub taub txias uas haum lub qab rooj xwb. Tsis pub nqa cov taub txias loj loj, thiab tsis pub nqa lam hwj tuaj.
◼ Pab Nyiaj Siab Dawb: Cov nyiaj uas koj muaj siab dawb pub yuav pab txhawb tes haujlwm tshaj tawm txoj xov zoo thoob qab ntuj. Yog koj sau tshev (check) nyiaj, ces sau rau lub “Christian Congregation of Jehovah’s Witnesses.” Yog koj xav siv koj daim debit/credit pub nyiaj los kuj tau thiab.
◼ Tshuaj: Nco ntsoov tias lub rooj sib txoos loj tsis muaj tshuaj nyob rau hauv. Yog koj noj tshuaj, thov nqa kom txaus noj. Yog koj hno koob tshuaj ntshav qab zib, tom qab siv tas, thov muab pov tseg kom raws kevcai. Tsis pub muab pov tseg rau hauv cov thoob uas txawb puag ncig lub rooj sib txoos loj. Nyob tom tsev so los, yuav tau muab rab koob pov tseg raws kevcai ib yam thiab.
◼ Tej Khau Rau: Ib xyoos twg, muaj coob tus tau ntog raug mob, vim lawv rau tej khau uas tsis zoo rau. Feem coob yog cov uas rau khau luj siab. Zoo rau peb xaiv tej nkawm uas zoo rau, thiaj tsis nyuaj rau peb nce ntaiv thiab taug tej kev uas tsis xwm yeem.
◼ Tsis Hnov Zoo: Cov kwvtij yuav tso tawm cov lus qhuab qhia hauv xov tooj cua thiab. Yog tias koj xav mloog, nco ntsoov nqa ib lub xov tooj cua me me tuaj, thiab nqa txoj hlua mloog ntawm pob ntseg.
◼ Lub Tawb Laub Menyuam Thiab Tej Rooj Tso Pw: Tsis pub nqa lub tawb laub menyuam thiab tej rooj tso pw tuaj rau hauv lub rooj sib txoos loj. Tiamsis yog menyuam lub rooj zaum haum cov rooj ntawm niam txiv ib sab, ces nqa los tau.
◼ Tshuaj Tsw Qab: Ntau zaus, cov rooj sib txoos loj nyob hauv tej tsev uas siv kiv cua thiab siv cua txias uas tsis muaj qhov rais rau cua txeem los hauv tsev. Yog li ntawd, thov xav txog koj cov kwvtij nkauj muam es tsis txhob tsuag tshuaj tsw qab ntau ntau, nyob tsam tsis haum ib txhia.—1Khl. 10:24.
◼ Daim Ntawv Please Follow Up (S-43): Thaum mus lub rooj sib txoos loj, zoo rau koj nqa ib ob daim ntawv taug qab hu ua Please Follow Up. Yog thaum twg koj qhia Vajlugkub rau tibneeg tom tej kiab tej khw, koj thiaj tau daim ntawv ntawd sau lawv npe thiab chaw nyob cia. Tom qab ntawd nqa mus rau Chav Rau Ntawv, lossis nqa mus rau tus ceev ntawv hauv koj lub koom txoos.
◼ Khw Noj Mov: Peb yuav tsum hnav tej tsoos zoo thiab ua neeg paub cai thiaj qhuas Yehauvas lub npe. Hauv lub tebchaws uas koj nyob, yog tias zoo tseg mentsis nyiaj rau tus neeg ua haujlwm, ces nco ntsoov ua li ntawd.
◼ Hom Chaw Pw:
(1) Thov tsis txhob hom ntau chav pw. Hom kom txaus rau koj tsev neeg xwb. Thiab ib chav twg tsis pub muaj coob tshaj luag tso cai.
(2) Tsis zoo rau peb lam tau lam rho npe tom qab peb twb hom chaw pw tas lawm. Yog tias muaj tej xwm loj, ces hu mus sai li sai tau, lwm tus thiaj tau siv chav ntawd thiab. (Mth. 5:37, NW) Yuav tau hu li 2 hnub ua ntej hnub koj teem tseg. Yog tias koj hu ti dhau lawm, ces luag yuav tsis thim cov nyiaj hom chav. Nco ntsoov kom lawv muab ib tug zauv (nab npawb) rau koj, uas qhia tias koj yeej rho npe lawm tiag.
(3) Ib txhia siv daim debit/credit los hom chaw pw. Ntau zaus lub tsev so yuav rho nyiaj hauv koj daim debit/credit los ceev cia kom txaus them chav koj tau hom tseg thiab lwm yam nuj nqes uas koj muaj. Koj yuav siv tsis tau cov nyiaj ceev cia ntawd ib qho li mus txog thaum lawv muab them txhua yam tas.
(4) Thaum txog tom tsev so, yog tsis tau siv lub laub phij xab tamsid, ces txhob mus laub los. Thiab thaum siv tas lawd, yuav tsum xa rov qab tamsid, lwm tus thiaj tau siv.
(5) Hauv lub tebchaws uas koj nyob, yog tias yeej ib txwm muab mentsis nyiaj pub rau tus ua haujlwm uas pab nqa phij xab, ces zoo rau koj ua li ntawd thiab. Thiab txhua hnub zoo rau koj tseg mentsis nyiaj rau tus tu tsev.
(6) Ua zaub ua mov hauv tej chav uas tso cai ua xwb.
(7) Muaj tej lub tsev so pub tshais, kas fes (coffee), los yog dej khov, rau cov tuaj so rau hauv. Thov tsis txhob nqa tshaj li koj yuav noj thiab haus.
(8) Cov neeg ua haujlwm hauv lub tsev so pab thiab saib xyuas coob tus. Yog li ntawd, tsim nyog peb xav txog lawv. Peb yuav tsum coj zoo thiab ua siab ntev rau lawv, lawv thiaj kaj siab ua haujlwm.
(9) Zoo rau cov niam txiv zov rawv lawv cov menyuam txhua lub sijhawm, tsis hais thaum mus da dej ua si, thaum nyob hauv chav tos txais qhua, thiab thaum mus lwm qhov chaw.
(10) Tus nqe hauv daim Recommended Lodging List yog tus nqe them rau txhua hmo. Nco ntsoov koj yuav tau them se nrog thiab. Yog tias lub tsev so kom koj them tshaj li tus nqe uas tau hais tseg lawm, tsis txhob them. Cia li mus qhia cov kwvtij hauv Chav Saib Xyuas Chaw Pw paub sai li sai tau.
(11) Yog tias koj muaj teeb meem li cas tom tsev so, qhia rau Chav Saib Xyuas Chaw Pw paub, lawv thiaj pab tau koj.
◼ Pab Ua Haujlwm: Yog leejtwg xav pab ua haujlwm rau lub rooj sib txoos loj, mus qhia rau cov kwvtij hauv Chav Pab Ua Haujlwm paub. Cov hluas uas tsis tau muaj 16 xyoo kuj pab tau thiab, tiamsis yuav tau nrog lawv niam lawv txiv lossis tus saib xyuas nws ua ke. Yog tias leej niam leej txiv, lossis tus saib xyuas nws, tso cai rau nws nrog ib tug laus ua haujlwm ua ke los kuj tau thiab.